Read Biblia Revisión Chuya Qellqa 1992 – Chuya Qellqa 1992 Isaías 46 Bible Online

Isaías 46 - Biblia Revisión Chuya Qellqa 1992 – Chuya Qellqa 1992 bible

Isaías 46

¹Bel idolom qonqorakuykun, Nebo sutiyuq idolom kumukuykun. Chay idolokunataqa animalkunaman churkuspam apanqaku, pisipasqa animalkunapaqqa llasaq cargam chaykunaqa.

²Chay idolokunam pampaman wichiykunku, huklaw nacionkunaman apasqam kachkanku, paykunaqa manam salvakuyta atinkuchu.

³Jacobpa mirayninkuna uyariwaychik, Israel nacionmanta puchuqkuna uyariwaychik: Manaraq nacechkaptikichikmi ñoqa qepikacharqaykichik, nacesqaykichik punchawmantam marqakacharqaykichik.

⁴Yuyaqña kanaykichikkamapas ñoqaqa hina kaqllam kasaq, soqo umaña kachkaptikichikpas nanachikusqaykichikmi; unanchaqnikichik kasqayraykum apasqaykichik, nanachikuspaymi waqaychasqaykichik.

⁵¿Piman rikchakuqpaqtaq hapiwankichik? ¿Pimantaq tupachiwankichikman? ¿Yaqachu pipas ñoqaman rikchakuq kanman?

⁶Runakunam wayqankumanta qorita hurqomunku, balanzapiñataqmi qollqeta pesanku; chay qorimanta qollqemanta ídolo ruwaqtam maskanku, chay idolopa ñawpaqninpim qonqoraspa yupaychanku.

⁷Hombrokuspam apanku, maymi kananpim sayachinku, chay churasqankupim mana kuyurispa sayarayan. Qapariwan mañakuptinkupas manam rimarinchu, sasachakuyninkumantapas manam salvayta atinchu.

⁸Yaw, mana kasukuqkuna, kayta yuyariychik: “Qamkunaqa rikchapakuspayá allinta yuyaymanariychik”.

⁹Ñawpaq tiempopi imakunam pasakusqantayá yuyariychik. Ñoqallam Diosqa kani, ñoqamanta hukqa manam kanchu. Ñoqaqa Diosmi kani, ñoqaman rikchakuqqa manam pipas kanchu.

¹⁰Ñawpaqmantaraqmi manaraq imapas pasakuchkaptin, hamuq punchawkunapi imakunam pasakunanmanta willakuni. Ñoqam nini: Tanteasqaykunaqa takyanqam, tukuy munasqaykunatam ruwasaq, nispa.

¹¹Intipa qespimunan lawpi kaq runatam qayaruni, payqa anka hinam karumantaraq hamunqa, ñoqapa munasqaytam ruwanqa. Rimasqayman hinam ruwasaq, Tanteasqayman hinam ruwasaq.

¹²Rumi sonqo runakuna uyariychik, allin ruwaymanta karunchasqakuna uyariychik:

¹³Allin ruwayniykunam chayamuchkanña, manam unamunqañachu. Sionpi yachaqkunatam salvasaq, Israel runaykunapim hatunchakusaq.