Read Biblia Revisión Chuya Qellqa 1992 – Chuya Qellqa 1992 Isaías 52 Bible Online

Isaías 52 - Biblia Revisión Chuya Qellqa 1992 – Chuya Qellqa 1992 bible

Isaías 52

¹¡Sión llaqta rikchariy! ¡Atiywan pachakuy! ¡Chuyanchasqa Jerusalén llaqta, suma-sumaq pachaykiwan churakuy! Manañam haykapipas mana iñiq huchasapa runakunaqa yaykumusunkiñachu.

²¡Jerusalén llaqta hatariy! ¡Hawaykipi allpata taspikuy! ¡Kamachikunaykipaq tronoykipi tiyay! ¡presochasqa sipas kaqlla Jerusalén llaqta, ñakarichisuqniki cadenata kunkaykimanta hurqokuy!

³Tayta Diosmi kaynata nin: Qamkunaqa mana imallapaq rantikusqam karqankichik, mana qollqellawantaqmi kutichimusqapas kankichik, nispa.

⁴Chaymi Tayta Dios nirqa: Ñawpaqtam Egiptoman llaqtay rirqa, hinaspam chaypiña yacharqa; chaymantam Asiriañataq yanqamanta ñakarichirqa, nispa.

⁵Kunanñataqmi Tayta Dios kaynata nin: ¿Imatataq kaypi ruwani llaqtayta yanqamanta preso apasqankuta qawaspay? Paykunapi munaychakuqkunam qaparkachachinku, mana tukuytam sapa punchaw kamiwanku, nispa.

⁶Chay punchawpim sutiyta llaqtay reqsinqa, kikiypunim rimasqayrayku chaypi tarikusaq.

⁷¡Mayna kuyayllapaqmi orqonkunata hamuptin allin musoq noticia willakuqpa chakinkunaqa, payqa hawkayaymantam willakun, payqa allin noticiatam willakun, payqa salvacionmantam willakun. Payqa Sión llaqtatam nin: “Diosnikiqa munaychakuq Reymi”, nispa!

⁸Uyariychik, llaqta waqaychaqkunam qaparichkanku, kusikuymantam chulla runa hinalla qaparichkanku, Sión llaqtaman Tayta Diospa kutimusqanta kikinkupuni qawaspankum qaparichkanku.

⁹Jerusalén llaqtapa tuñichisqa perqankuna kusikuymanta qapariychik, Tayta Diosmi llaqtanta llakipayariykun, Jerusalén llaqtatam libraykun.

¹⁰Tayta Diosmi atiyninta llapallan nacionkunaman qawarichin, tukuy hinastinpi kaqkunam Diosninchik salvawasqanchikta yachanqaku.

¹¹¡Babilonia llaqtamanta utqayman lloqsiychik, millakuypaq kaqkunataqa ama llapchaychikchu! ¡Paykunapa chawpinmanta lloqsiychik, Diospa servicionkunata apaqkuna chuyanchakuychik!

¹²Manam kallpayllachu lloqsinkichikqa, nitaqmi ayqechkaq hinachu ripunkichikqa, aswanqa Tayta Diosmi ñawpaqnikichikta rinqa, hina kikintaqmi qepaykichiktapas hamunqa.

¹³Serviqniyqa ima ruwasqanpipas vencenqam, payqa ancha hatunchasqam kanqa, payqa ancha reqsisqam kanqa, altoman hoqarisqam kanqa.

¹⁴Uyallanpas pasaypaq manaña reqsipay kasqanta qawaspankum, manaña runamanpas rikchakusqanta qawaykuspankum achkaq admirakurqaku,

¹⁵chaypim achka nacionkunapas hukmanyanqakuraq, reykunapas qawaykuspankum mana ima rimaytapas atinqakuchu, mana haykapipas rikusqankutam rikunqaku, mana haykapipas uyarisqankutam entiendenqaku.