Read Biblia Revisión Chuya Qellqa 1992 – Chuya Qellqa 1992 Isaías 54 Bible Online

Isaías 54 - Biblia Revisión Chuya Qellqa 1992 – Chuya Qellqa 1992 bible

Isaías 54

¹Tayta Diosmi kaynata nin: ¡Mana wachakuq qolluq warmi, llumpayta kusikuy! ¡Mana wachakuq warmi, qaparispa takiy! Qosanpa saqesqan warmiqa, qosayuq warmimantapas achka wawasapam kanqa.

²Ama iskayrayaspa yachanayki carpata hatunyachiy, yachasqayki carpapa toldonta mastariy; waskankunatapas masyachiy, estacankunatapas allinniqta takay.

³Alleqmanpas ichoqmanpas mastarikunkim, miraynikikunam achka nacionta hapikuykunqaku, purmachisqa llaqtakunapim yachakunqaku.

⁴Ama manchakuychu, manam penqaypichu kanki, ama pinqakuychu manam kamisqachu kanki; warma kaspa penqaypi kasqaykitapas qonqankiñam, viuda kaspayki kamisqa kasqaykitapas manam yuyarinkiñachu.

⁵Unanchaqniki qosaykim kani, Tukuy Atiyniyuq Tayta Diosmi kani, Israelpa libraqnin Chuya Diosmi kani, kay pachapa Diosninwan sutichasqam kani.

⁶Qosan saqeruptin llakisqa sonqoyuq warmita hinam, sipasllaraq kayninpi qosanpa saqesqan warmita hinam, Tayta Dios qayasurqanki, hinaspam nisunki:

⁷“Manam unaypaqchu saqerurqayki, ichaqa llumpay kuyakuywanmi kaqllamanta kuskanchakusun.

⁸Pisi piñakuyniypim ratollapaq qanmanta pakakururqani, ichaqa wiñaypaq kuyakuyniywanmi llakipayarqayki”. Librasuqniki Tayta Diosmi chaynata nin.

⁹Sinchita parachimusqay tiempopim Noeyman juraspay nirqani, kay pachata yakuwan manaña tuytuchinaypaq. Chaynatam kunanpas qanman jurayki, qampaqqa manañam huktawanqa piñakusaqñachu, nitaqmi qaqchasqaykiñachu.

¹⁰Orqokuna suchuruptinpas, moqokuna maymi kasqanmanta asuriptinpas, kuyakuyniymi ichaqa qanmanta mana rakikunqachu, hawka kanapaq pacto ruwasqaypas manam tukunqachu. Llakipayasuqniki Tayta Diosmi chaynata nin.

¹¹¡Llakipayaypaq pisipasqa, mana pipa consuelasqan Jerusalén llaqta! Carbunclo rumipim cimientoykikunata churasaq, zafiro rumipim cimientoykikunata hatarichisaq.

¹²Rubí rumikunamantam torrekikunatapas perqarusaq, carbunclo rumiwanmi punkuykikunatapas ruwarusaq, muyuriqnikipi perqaykikunatapas suma-sumaq rumikunamantam ruwarusaq.

¹³Churikikunatapas ñoqa Tayta Diosmi yachachisaq, paykunaqa hawkayaypim mana tukuyta kawsakunqaku.

¹⁴Allinkuna ruwasqaykim kallpanchasunki, ñakariymantapas karupim tarikunki, manchakuypas manañam hukmanyachisunkiñachu.

¹⁵Sichum pipas contraykipi hatarimuspanqa manam ñoqapa yanapasqaychu hatarimunqa. Pitapas contraykipi hatarimuqtaqa vencenkipunim.

¹⁶Herrerotaqa ñoqam unancharqani, sansata pukuspa tukuy rikchaq armakunata ruwananpaq. Tuñichispa purmachiqtapas ñoqataqmi unancharqani.

¹⁷Contraykipi armakuna ruwasqankupas manam imanasunkichu, juzgadopi acusasuqnikikunatapas upallachinkim. Tukuy chaykunam serviqniykunapa herencian kanqa, ñoqawanmi tukuy imapi vencenqaku. Tayta Diosmi chaynata nin.