Read Biblia Revisión Chuya Qellqa 1992 – Chuya Qellqa 1992 Isaías 55 Bible Online

Isaías 55 - Biblia Revisión Chuya Qellqa 1992 – Chuya Qellqa 1992 bible

Isaías 55

¹Llapallan yakunayasqakuna, yaku tomaq hamuychik; mana qollqeyuqkuna, mikunaykichikpaq trigota mana imallapaq apakuychik, vinotawan lecheta mana qollqellapaq apakuychik.

²¿Imapaqtaq mana mikunaykichik kaqkunapi qollqekichikta tukunkichik? ¿Imapaqtaq mana saksanaykichik kaqkunapi llamkasqaykichikta usuchinkichik? Allinta uyariwaychik hinaspaqa allinnintam mikunkichik, miski mikuykunata mikuptikichikmi sonqoykichikpas kusikunqa.

³Ñoqaman asuykamuspa uyariwaychik, uyariwaspaykichikqa kawsankichikmi. Qamkunawanmi pactota wiñaypaq ruwasaq, rey Davidta kuyasqayraykum payman prometesqaykunata cumplisaq.

⁴Ñoqam payta churarqani llaqtakunapaq testigo kananpaq, kamachiqninku kaspa paykunata maymi rinankuta pusananpaq.

⁵Qamqa mana reqsisqayki runakunatam qayanki, mana reqsisuqniki runakunam qanman kallpamusunki; chaynataqa ruwanqaku ñoqa Diosniki, Israelpa Chuya Diosnin, qamta hatunchasqayraykum.

⁶Tarinapaqraq kachkaptinyá Tayta Diosta maskaychik, hichpallapiraq kachkaptinyá Tayta Diosta qayakuychik.

⁷Mana allinkuna ruwaq runayá mana allin kawsayninta saqechun, millakuypaq yuyaymanaqyá chayna kayninta saqechun. Dios taytamanyá kutirikuchun, payqa llakipayariykunqam, Diosninchikmanyá kutirikuchun payqa kuyapayakuq kayninman hinam pampachaykunqa.

⁸Tayta Diosmi kaynata nin: Tanteasqaykunaqa manam tanteasqaykichik hinachu, ñanniykunapas manam ñannikichik hinachu.

⁹Imaynam hanaq pacha kay pachamantaqa alto-altopi kachkan, chaynam ñanniypas sumaqllaña qamkunapa ñannikichikmantaqa, chaynataqmi tanteayniykunapas ancha allin qamkunapamantaqa.

¹⁰Imaynam parawan lasta cielokunamanta chayamun, ichaqa manaña altoman kutispam allpata nuyun, hinaspa muhukunata wiñachin, tarpuqpaq muhuta ruruchin, kawsaykunata mikunankupaq qespichin,

¹¹chaynam simiymanta lloqsiq palabraykunapas, manam yanqapaqchu willakusqa kanqa, aswanqa munasqaytam ruwanqa, munasqayman hinam kamachisqayta ruwanqa.

¹²Qamkunaqa kusikuywanmi lloqsimunkichik, hawkallam kutimunkichik. Orqokunawan moqokunam qayllaykichikpi takispa qaparinqaku, llapa sachakunam kusikuymanta taqllakunqaku.

¹³Kichkakunapa rantinpim ciprés sachakunaña wiñanqa, Itanakunapa rantinpim arrayankunaña wiñanqa, chaykunawanmi Tayta Diosqa ancha reqsisqa kanqa, wiñaypaq mana tukuq señal hinam chaykunaqa kanqa.