Read Biblia Revisión Chuya Qellqa 1992 – Chuya Qellqa 1992 Isaías 56 Bible Online

Isaías 56 - Biblia Revisión Chuya Qellqa 1992 – Chuya Qellqa 1992 bible

Isaías 56

¹Tayta Diosmi kaynata nin: Mana pimanpas sayapakuspa lliwpaq allinkunallata ruwaychik, munasqayman hina kawsaychik, libranay punchawmi hichpamuchkanña, allin ruwaq kasqayta qawachinay punchawmi chayamuchkanña.

²Mayna kusisqam kamachisqaykunata mana iskayrayaspa kasukuq runaqa, samana punchawta mana sarutyaq runaqa, mana allin ruwaymanta rakikuq runaqa.

³Tayta Diosman hapipakuq huklaw llaqtayuq runaqa amayá nichunchu: “Tayta Diosqa llaqtanmantachá rakiruwanqa”, nispaqa. Qolluq runapas amayá nichunchu: “Ñoqaqa chakisqa sacha hinam kani”, nispaqa.

⁴Chayraykum Tayta Dios kaynata nin: Sichum qolluq runakuna kasuwaspa samana punchawniykunapi samanqaku, chaynataq munasqaykunata ruwaspa pactoytapas kasukunqaku,

⁵hinaptinqa paykunamanmi churikuna qonaymantapas aswan allin kaqkunata qosaq, temploypa perqankunapim sutinkuta qellqachisaq, mana chinkaq wiñaypaq takyaq sutitam qosaq.

⁶Sichu huklaw llaqtayuq runakunapa churinkuna ñoqa Tayta Diosman serviwananpaq hapipakuptinkuqa, ñoqapa sutiyta kuyaspa serviqniyña rikuriruptinkuqa, chaynataq kasuwaspa samana punchawpi samaptinkuqa, hinaspa pacto ruwasqaytapas kasukuptinkuqa,

⁷paykunatam sapaqchasqay orqoman pusasaq, mañakuwananku wasiypim samachisaq; lliw kañana sacrificiotawan ofrendakuna ofrecewasqankutapas chaskisaqmi. Temployqa “llapallan llaqtakunapa mañakunan wasiwan” sutichasqam kanqa.

⁸Israel runakunata preso kasqankumanta kutichimuq Tayta Diosmi kaynata nin: Chay kutichimusqay llaqtamanmi huk runakunatawanraq huñumusaq, nispa.

⁹Purun animalkuna, montepi manchakuypaq animalkuna, mikuq hamuychik.

¹⁰Llaqtay nanachikuqkunaqa ñawsakunam, mana imallatapas yachaqkunam, llapallankupas mana rimariq allqokunam, mana anyakuy atiq allqokunam, wischurayaspa puñuywan arwitakuqkunam, puñukuylla kuyaqkunam.

¹¹Paykunaqa mikuspapas mana saksaq allqokunam, mana imatapas musyaq michiqkunam; sapakama munasqankuman hina kawsaqkunam, kikillankupaq chaskikuy munaqkunam.

¹²Paykunam ninku: “Hamuychik vinota upyakusun, poqosqa aqata sinkananchikkama upyakusun; paqarinpas kunan punchaw hinam kanqa, kunanmantapas aswan allin punchawraqmi kanqa”, nispanku.