Read Biblia Revisión Chuya Qellqa 1992 – Chuya Qellqa 1992 Isaías 59 Bible Online

Isaías 59 - Biblia Revisión Chuya Qellqa 1992 – Chuya Qellqa 1992 bible

Isaías 59

¹Tayta Diospa atiyninqa manam pisirunchu mana salvawananchikpaq hinaqa, rinrinpas manam upayarunchu manaña uyarinanpaq hinaqa.

²Ichaqa mana allinkuna ruwasqaykichikmi Diosmanta rakirusunkichik, huchaykichikraykum mana uyarisunkichikchu.

³Qamkunaqa runa wañuchiqmi kankichik, millakuypaq mana allinkuna ruwaqmi kankichik, simikichikmantapas llullakuywan mana allinkunallam lloqsimun.

⁴Juzgadonmanmi llullakuspa quejakuq rinkichik, juezkunamanpas manam cheqap kaqwanchu rinkichik. Aswanqa yanqakunallapim hapipakunkichik, yanqakunallatam rimankichik, mana allin ruwaykunapa huntasqanmi kachkankichik, chayraykum millakuypaq kaqkunallata rikurichinkichik.

⁵Qamkunaqa maqta urupa runtuntam oqllachkankichik, arañapa llikankunatam awachkankichik; pipas chay runtuta mikuruspanqa wañurunqam, chay runtu toqyaruptinqa maqta urum lloqsiramunqa.

⁶Chay awasqaykichik llikawanqa manam pipas pachataqa ruwanqachu, chaykunawanqa manam pipas pachakunqachu; qamkunapa ruwaynikichikqa ñakarichiyllam, makikichikwanpas ñakariyllatam hatarichinkichik.

⁷Mana allin ruwaymanmi kallpankichik, mana huchayuqta wañuchiqmi kallpankichik; tukuy mana allin ruwaykunallapim yuyaymanankichik, maymanpas ñakarichiq hinaspa purmachiqllam rinkichik.

⁸Hawkalla kawsaytaqa manam reqsinkichikchu, qamkunaqa manam allin ruwayta yachankichikchu. Ñan purisqaykichikpas pantayllam, pipas chayninta puriqqa manam hawka kawsaytaqa tarinqachu.

⁹Chayraykum mana piman sayapakuspa allin arreglo ruwaypas ñoqanchikmanta karunchakurun; kanchaytam suyarqanchik, ichaqa tutayayllam chayaramuwanchik; achkiytam suyarqanchik, ichaqa tutayayllapim purichkanchik.

¹⁰Ñawsa hinam perqakunaman tawnapakuspa purichkanchik, chawpi punchawpipas tutayaypi hinaraqmi mitkakuchkanchik, kallpallanchikpiraq kachkaspapas wañusqa hinañam kachkanchik.

¹¹Ukumarikuna hinaraqmi waqachkanchikpas, paloma hinaraqmi llakikuypaq qoqoqyanchikpas; librasqa kaytam suyarqanchik, ichaqa manam tarinchikchu; salvasqa kaytam suyarqanchik, ichaqa ñoqanchikmantam karunchakurun.

¹²Dios Taytallayku, llumpay mana kasukuqmi kaniku, huchallaykum ñoqaykuta acusawanku, mana kasukusqaykutam reqsikuniku, mana allinkuna ruwasqaykutam reqsikuniku.

¹³Mana kasukuspam qepancharqaykiku, iskay uya kaspaykum traicionarqaykiku; contraykipim hatarirqaniku, runamasiykuta ñakarichinaykupaqmi rimarqaniku, engañanaykupaqmi sonqoykupipas tantearqaniku.

¹⁴Mana pimanpas sayapakuspa allin arreglo ruwaymi karunchakurun, allin ruwaymi chinkarun, plazakunapipas cheqap kaqtaqa manam rimankuñachu, cheqap rimaq runapas manam kanñachu.

¹⁵Cheqap rimaymi chinkarun, mana allinmanta rakikuqpatam tukuy imanta suwarunku. Allin ruway manaña kasqanta rikuspanmi Tayta Dios piñakurun.

¹⁶Tukuy chaykunata allichaq mana kasqanmantam Tayta Dios hukmanyarurqaraq, chaymi kikinpa atiyninwanña salvarqa, allinkuna ruwasqanwanmi takyachirqa.

¹⁷ Allinkuna ruwasqanwanmi qasqonta hinaspa wasanta harkachikunawan hinaraq churakurqa, salvaq kasqanwanmi cascowan hinaraq churakurqa, vengakuyninwanmi pachawan hina churakurqa, piñakuyninwanmi mantonwan hina capakurqa.

¹⁸Sapakamamanmi ruwasqankuman hina pagapunqa, enemigonkunatam payqa ñakarichinqa. Cheqniqninkunamanmi payqa kutichipunqa, lamar qochapa patanpi kaqkunamanmi pagapunqa.

¹⁹Intipa qespimunan lawpi kaqkunam Tayta Diosta manchakunqaku, intipa seqaykunan lawpi kaqkunam atiyninta hatunchanqaku. Payqa lloqlla hinaraqmi hamunqa, Diospa pukuyninpa kallpachimusqan mayu hinaraqmi hamunqa.

²⁰Tayta Diosmi kaynata nin: Sión llaqtapa libraqninmi hamunqa, Jacobpa mirayninmanta wanakuqkunata libraqmi hamunqa, nispa.

²¹Tayta Diosmi nin: “Qamkunawanmi pactota ruwani. Espirituymi qamkunamanta mana rakikunqachu, simikiman churasqay palabraykunam qamkunamanta nitaq miraynikikunamantapas wiña-wiñaypaq mana chinkanqachu”. Ñoqa Tayta Diosmi chaynata nini.