Read Biblia Revisión Chuya Qellqa 1992 – Chuya Qellqa 1992 Isaías 61 Bible Online

Isaías 61 - Biblia Revisión Chuya Qellqa 1992 – Chuya Qellqa 1992 bible

Isaías 61

¹Tayta Diospa Espiritunmi ñoqapi kachkan, Tayta Diosmi sapaqchawaspan kamachiwarqa wakchakunaman allin noticiata willakamunaypaq, llakisqakunata consuelamunaypaq, presochasqakunata kacharimunaypaq, carcelpi kaqkunata libramunaypaq,

² Tayta Diospa kuyapayakuynin watamanta willakamunaypaq, enemigonchikmanta Diospa vengakunan punchawmanta willakamunaypaq, llapallan llakisqakunata consuelamunaypaq.

³Sión llaqtapi llakisqakunaman uchpapa rantinpi coronataña qomunaypaq, waqaypa rantinpi kusikuytaña qomunaypaq, llakipi kaqkunatapas fiesta pachawan pachachimunaypaq. Paykunatam sutichanqaku: “Allinkuna ruruq Sachakuna, Tayta Diospa Atiyniyuq kayninta qawachiq Plantakuna” nispanku.

⁴Ñawpaqmantaraq tuñichisqa llaqtakunatam musoqmanta hatarichinqaku, ñawpaq watakunapi purmachisqakunatam musoqmanta tiyarichinqaku, ñawpaq miraykunapa purmachisqankunatam musoqyachinqaku.

⁵Ovejankunatapas huklaw llaqtayuqkunam michinqaku, uvas chakraykichikkunapipas mana reqsisqa runakunam llamkanqaku.

⁶Qamkunaqa “Tayta Diospa Sacerdoten” nispa sutichasqam kankichik, “Diospa Serviqnin” nispa sutichasqam kankichik. Wakin nacionkunapa kapuqninkunatam mikunkichik, paykunapa reqsisqa kayninwanmi alabakunkichik.

⁷Hatun penqaypi kasqaykichikpa rantinpim, usuchisqa kasqaykichikpa rantinpim, herenciaykichikpiña kusikuymanta qaparinkichik; chayraykum allpaykichikpi achka-achka kapuqniyuq kankichik, hinaspam wiñaypaq kusikunkichik.

⁸Ñoqa Tayta Diosqa allin ruwaytam kuyani, suwakuytawan mana allin ruwaykunatam ichaqa cheqnini. Hapipakunaykichik kasqayraykum imam kaqta pagapusqaykichik, hinaspaymi qamkunawan wiñaypaq pactota ruwasaq.

⁹Miraynikikunapas huklaw nacionkunapa reqsisqanmi kanqaku, willkaykichikkunapas llaqtakunapa reqsisqanmi kanqaku. Llapallan rikuqninkunam yachanqaku “Tayta Diospa bendecisqan miraykuna” kasqankuta.

¹⁰Isaiasmi kaynata nirqa: Tayta Diospim llumpayta kusikuni, Diosniypim sonqomanta kusikuni. Salvakunapaq pachawanmi pachaykachiwan, allin ruway capawanmi churaykachiwan, noviota hinam coronaykachiwan, alhajakunawan adornasqa noviata hinam adornaykuwan.

¹¹Imaynam muhukuna allpamanta wiñan, imaynam plantakuna huertapi ikllimuspa wiñan, chaynatam Tayta Diospas allin ruwaykunata wiñachinqa, hinaptinmi lliw nacionkuna Tayta Diosta yupaychanqaku.