Read Biblia Revisión Chuya Qellqa 1992 – Chuya Qellqa 1992 Isaías 65 Bible Online

Isaías 65 - Biblia Revisión Chuya Qellqa 1992 – Chuya Qellqa 1992 bible

Isaías 65

¹Tayta Diosmi kaynata nin: Mana mañakuqniykunam maskawarqaku, mana maskaqniykunam tariwarqaku. Mana qayakuqniy nacionkunatam nirqani: “Kaypim kachkani”, nispay.

²Mana kasukuspa llutanpi kawsaq llaqtamanmi, sonqonpa munasqallanpi puriq llaqtamanmi, makiykunata sapa punchaw haywarirqani.

³Kay llaqtaqa chaylla-chaylla piñachiwananpaqmi animalkunata idolonkuman huertakunapi ofrecenku, ladrillo altarkunapim inciensota kañanku.

⁴Paykunaqa sepulturakunapim tiyanku, pakasqa machaykunapim achikyanku, kuchi aychatam mikunku, mankankupipas millakuypaq caldokunatam yanunku.

⁵Paykunam ninku: “Chayllapi sayay, ama asuykamuwaykuchu; ñoqaykuqa llumpay chuyam kaniku”, nispanku. Chay runakunaqa senqayta qonchiq qosni hinam, tukuylla punchaw rataq nina hinam.

⁶Tukuy kaykunaqa qayllaypim qellqasqa kachkan, manam qasillallachu kasaq, ruwasqankuman hinam paykunamanqa kutichipusaq.

⁷Mana allinkuna ruwasqaykichikmantam, ñawpaq taytaykichikkunapas orqokunapi inciensota kañaspa piñachiwasqankumantam, pagapusqaykichik, nispa.

⁸Tayta Diosmi kaynata nin: Runam yakusapa uvasta tarispa nin: “Ama kaytaqa usuchisunchu, kachkanraqmi yakun”, nispa. Chaynatam ñoqapas serviqniykunata kuyasqayrayku ruwasaq, paykunataqa manam pasaypaqtachu chinkachisaq.

⁹Jacobpa churinkunatam mirachisaq, Judapa mirayninkunam orqoykunata hapikuykuspanku chaypi yachanqaku, akllakusqaykunam chay allpata chaskinqaku, serviqniykunam chaypi yachanqaku.

¹⁰Sarón pampapas ovejakunapa huntasqanñam kanqa, Acor qechwapas uywakunapa mikunanñam kanqa, maskaqniy runakunapaqmi chayna kanqa.

¹¹Qamkunatam ichaqa, ñoqamanta karunchakurusqaykichikrayku, sapaqchasqay orqoyta qonqarusqaykichikrayku, “suerte qokuq”, nispa Gad idoloman, “allin destino qokuq”, nispa Meni sutiyuq idoloman, mikuytawan vinota qosqaykichikrayku,

¹²guerrapi wañunaykichikpaq citaykichik, qonqoraykachispam kunkaykichikta kuchusunkichik. Qamkunaqa qayaptiypas manam uyariwarqankichikchu, rimapayaptiypas manam kasuwarqankichikchu; aswanqa qawachkaptiymi mana allinkunata ruwarqankichik, mana munasqay kaqkunatam akllarqankichik, nispa.

¹³Chayraykum ñoqa Tayta Dios kaynata nini: Serviqniykunaqa mikusqam kanqaku, qamkunañataqmi yarqaymanta kankichik; serviqniykunam yakuta tomanqaku, qamkunañataqmi yakumanta ñakarinkichik; serviqniykunaqa kusisqam kanqaku, qamkunañataqmi penqaypi tarikurunkichik.

¹⁴Serviqniykunaqa sonqonkupi kusisqam takinqaku, qamkunam ichaqa llaki sonqoyuq qaparkachankichik, ñakarispam llakipi tarikuspa waqankichik.

¹⁵Akllakusqaykunaqa sutikichiktapas yuyarinqaku runakunata ñakanallankupaqñam: “Paykunata hinayá Tayta Dios wañuchisunki”, ninankupaq. Serviqniykunatam ichaqa musoq sutiwan sutichasaq.

¹⁶Pipas kay nacionpi bendicionta mañakuspanqa cheqap Diosmantam mañakunqa, pipas kay allpapi juraspaqa hapipakunapaq Diosraykum juranqa. Ñawpaq ñakariykunaqa qonqasqañam kanqa, qayllaymanta chinkachisqañam kanqa.

¹⁷Hanaq pachatawan kay pachatam musoqmanta unanchasaq, ñawpaq kaqkunaqa qonqasqañam kanqa, manañam pipas yuyarinqañachu.

¹⁸Aswanqa unanchasqaykunawanmi wiñaypaq kusikunkichik, Jerusalenmanwan runankunaman kusikuyta apamusqayraykum wiñaypaq kusikunkichik.

¹⁹Ñoqapas Jerusalenraykum anchata kusikusaq, chaypiqa waqaypas manañam uyarikunqañachu, llakimantapas manañam qaparinqakuñachu.

²⁰Chayllaraq naceq wawakunapas chaypiqa manañam wañunqakuchu, yuyaqkunapas unaytam kawsakunqaku; pachak watayuq kachkaspa wañukuyqa warmallanpiraq wañukuy hinam kanqa; pachak watanman manaraq chayachkaspa wañukuyñataqmi ñakasqapaq hapisqa kanqa.

²¹Wasikunatam hatarichinqaku hinaspam chaypi yachanqaku, uvaskunatam plantanqaku hinaspam rurunta mikunqaku.

²²Wasikunata hatarichisqankupiqa manañam sapaq runakunaqa yachanqakuñachu, Uvas plantasqankutapas manañam sapaq runakunaqa mikunqakuñachu. Runaykunaqa sachakuna hinam una-unay watakunata kawsanqaku. Akllakusqaykunaqa llamkasqankupa ruruntam mikunqaku.

²³Llamkasqankupas manam yanqapaqchu kanqa, churinkupas manam chayllaqa wañunqakuchu, paykunapas chaynataq mirayninkupas, Tayta Diospa bendecisqan miraykunam kanqaku.

²⁴Manaraqpas mañakamuwachkaptinkum paykunataqa contestasaq, manaraqpas rimayta tukuchkaptinkum paykunataqa uyarisaq.

²⁵Atoqwan malta ovejapas kuskankum mikunqaku, leonpas toro hinam pajataña mikunqa, maqta urupas allpatañam mikunqa. Chuyanchasqay orqopiqa manañam ima mana allin ruwanakuypas kanqañachu, nispa.