Read Biblia Revisión Chuya Qellqa 1992 – Chuya Qellqa 1992 Isaías 9 Bible Online

Isaías 9 - Biblia Revisión Chuya Qellqa 1992 – Chuya Qellqa 1992 bible

Isaías 9

¹Chaywanpas ñakariqkunapaqqa manam tutayayllachu kanqa. Ñawpaq tiempokunapim Neftalí ayllutawan Zabulón aylluta Tayta Dios ñakarichirqa. Hamuq tiempokunapiñataqmi, lamar qochaman rina ñanpa chaynataq Jordán mayupa waklawninpi kaq Galileata, gentil runakunapa kananta, ancha reqsisqata ruwanqa.

²Tutayaypi kawsaqkunam hatun achkiyta rikuykunku, llumpay tutayaypi yachaqkunamanmi achkiy kanchariykun.

³Runakunata mirachispaykim kusikuywan sonqonkuta huntaykunki. Chayraykum cosecha tiempopi hinaraq, guerrapi ganakamusqankuta rakinakuqkuna hinaraq qampa qayllaykipi kusikunqaku.

⁴Qanmi llasaq yugota pakipachkaq hina ñakarichiqninkumanta libraykurqanki, hombronkupi kaspita pakipachkaq hinam ñakarichiqninkuta vencerurqanki. Chaynataqa ruwarqanki Madián llaqtata ruwasqaykita hinam.

⁵Guerrapi peleaptinku tropakunapa bullallaña ruwaq zapatonkupas, chaynataq yawarwan qachachasqa pachankupas, lliwmi ninawan rupaspa tukurunqa.

⁶Wawam nacerapuwanchik, churitam Tayta Dios qoykuwanchik, munaychakunanpaqmi atiyta qoykun. Paytam sutichanqaku: Admirakuypaq, allin Consejakuq, Tukuy Atiyniyuq Dios, Wiña-Wiñaypaq Yaya, hinaspa Hawkayayta Qokuq, nispa.

⁷Rey Davidpa trononmantam kamachikunqa, munaychakuyninpa atiyninmi tukuy hinastinman chayanqa, munaychakuyninpiqa hawkayaypas manam tukunqachu, munaychakuyninqa wiña-wiñaypaqmi takyanqa. Mana pimanpas sayapakuspam kamachikunqa, allin arreglokunawanmi munaychakunqa, kunanmanta wiña-wiñaykama. Tukuy Atiyniyuq Tayta Diospa kuyakuyninmi chaytaqa ruwanqa.

⁸Tayta Diosmi Jacobpa contranpi rimarirqa, chay rimaymi Israel nacionman chayarqa,

⁹Chaytaqa llaqtantin runam yachanqa. Efrainpiwan Samariapi yachaqkunam, pay tukuspanku, hatun tukuspanku kaynata ninku:

¹⁰Ladrillo perqakuna wichiruptinpas llaqllasqa rumikunawanraqmi perqasaqku, sicomoro qerukunata kuchuruptinkupas cedromanta qerukunataraqmi churasaqku, nispa.

¹¹Ichaqa Tayta Diosmi hatarichinqa Rezinpa contranpi enemigonkunata, Paymi atacanankupaq enemigonkunata hatarichimunqa.

¹²Intipa qespimunan lawmantam Siria runakuna, intipa seqaykunan lawmantam filisteokuna Israel llaqtata siminku huntata millpururqaku. Chaywanpas Tayta Diosqa hinallam piñasqa kachkan, atiyninpas hinallam castigananpaq kachkan.

¹³Chaywanpas paykunaqa manam castigaqninku Diosmanqa kutirikurqakuchu, Tukuy Atiyniyuq Tayta Diostapas manam maskarqakuchu.

¹⁴Chaymi Tayta Diosqa, animalpa umantawan, chupanta kuchuchkaq hina, palmera sachata kuchuchkaq hina, totora plantata rutuchkaq hina, huk punchawllapi Israel nacionta kuchurunqa.

¹⁵Ancianokunapiwan reqsisqa runakunam chay animalpa uman hina, mana cheqap kaqta willakuq profetakunañataqmi chay animalpa chupan hina.

¹⁶Kayna kamachikuqkunam llaqtata pantarachin, kamachisqan runakunañataqmi pantaypi rikurirun.

¹⁷Chaymi Señorqa mana llakipayanqachu jovenkunatapas, viudakunatapas, mana tayta-mamayuqkunatapas, llapallanku millakuypaq llullallaña kasqankurayku, chaynataq yanqakunata rimaq kasqankurayku. Chaywanpas Tayta Diosqa, hinallam piñasqa kachkan atiyninwan castigananpaq.

¹⁸Mana allinqa, tukuy rikchaq kichkakunata qorakunata ratachkaq nina hinam, monte sachakunatapas ruparuptinmi chusñankunapas qosninpa chawpinta muyurispa-muyurisparaq wichayman hoqarikun.

¹⁹Tukuy Atiyniyuq Tayta Dios piñakusqanraykum lliw nacionkuna rupachkan, runakunañataqmi ninapaq yanta hina kachkan. Runakunaqa runamasinta mana kuyapayarikuqñam kachkanku.

²⁰Runaqa alleq lawpi mikuchkaspapas manam saksanchu, ichoq lawpi mikuchkaspapas hinallam yarqaymanta, churinkuta mikuchkaspapas manam contentankuchu.

²¹Manasesmi Efrainta tuñichin Efrainñataqmi Manasesta wichichin, iskayninñataqmi Judá ayllupa contrapi hatarinku. Chaywanpas Diosqa, hinallam atiyninwan castigananpaq kachkan.