Read Biblia Revisión Chuya Qellqa 1992 – Chuya Qellqa 1992 Levítico 12 Bible Online

Levítico 12 - Biblia Revisión Chuya Qellqa 1992 – Chuya Qellqa 1992 bible

Levítico 12

¹Israelpa mirayninkunaman ninanpaqmi Moisesta Tayta Dios kaynata nirqa: Huk warmi wiksayakuruspan qari wawata wachakuruspanqa, imaynam killanwan onqochkaq hinam qanchis punchawpuni millakuypaq kanqa.

³Chay wawatam nacesqanmanta pusaq punchawniyuqta qari kayninpa qarachanta kuchuspa señalanqaku.

⁴Chay wawapa mamanñataqmi kimsa chunka kimsayuq punchawpi yawarninmanta chuyanchakunqa. Chuyanchakunan punchaw tukunankamam ama Diospaq sapaqchasqa kaqkunata llapchanqachu. Amataqmi santuariomanpas yaykunqachu.

⁵Sichum huk warmi wawata wachakuruspanqa imaynam killanwan onqochkaq hinam iskay semanapuni ama asuykuwanqachu, yawarninmantam soqta chunka soqtayuq punchaw chuyanchakunqa.

⁶Chay warmipa chuyanchakunan punchaw cumplikuruptinmi qari wawa kaptin otaq warmi wawa kaptinpas huk watayuq malta carnerota lliw kañanapaq apamunqa. Apamunqataqmi huk mallqo palomatawan huk qoqñutapas. Chay ofrendaqa huchankuna pampachasqa kananpaqmi kanqa. Chaykunatam sacerdoteman qonqa,

⁷sacerdoteñataqmi ñoqa Tayta Diosman ofrecewanqa chay warmipa huchankunata pampachanaypaq, chaynapim chay warmiqa yawarninmanta chuyanchasqa kanqa. Kaykunam qaritapas otaq warmitapas wachakuq warmikunapaq yachachikuyniykuna.

⁸Sichum malta carnerota apamunanpaq chay warmipa qollqen mana kanqachu hinaptinqa iskay qoqñutawan otaq iskay mallqo palomakunatam apamuwanqa. Hukninmi lliw kañanapaq kanqa, hukninñataqmi hucharayku ofrendapaq. Chaykunataqa sacerdotem ofrecewanqa chay warmipa huchankunata pampachanaypaq, chaymantañam payqa asuykamuwanqa.