Read Biblia Revisión Chuya Qellqa 1992 – Chuya Qellqa 1992 Levítico 15 Bible Online

Levítico 15 - Biblia Revisión Chuya Qellqa 1992 – Chuya Qellqa 1992 bible

Levítico 15

¹Israelpa mirayninkunaman ninankupaqmi Moisestawan Aaronta Tayta Dios kaynata nirqa: Pi qaripas qeya ispaywan kaspaqa millakuypaqmi kanqa.

³Chay onqoywan kaq runaqa ispakuyta atispa otaq mana atispapas millakuypaqmi kanqa.

⁴Qeya ispaywan onqoq runapa puñusqan camawan maypim tiyasqanpas millakuypaqmi kanqa.

⁵Chay onqoqpa camanta tupaykuqqa pachankunata taqsakuspanmi bañakunqa, payqa tutaykuqkamam millakuypaq kanqa.

⁶Qeya ispaywan onqoqpa tiyasqanpi tiyaykuqpas pachankunata taqsakuspanmi bañakunqa, hinaspanmi tutaykuqkama millakuypaq kanqa.

⁷Pipas qeya ispaywan onqoqta llapcharuqqa, pachanta taqsakuspanmi bañakunqa, hinaspam tutaykunankama millakuypaq kanqa.

⁸Sichum qeya ispaywan kaq runa sano runaman toqaykuptinqa, chay toqasqa runam pachankunata taqsakuspa bañakunqa, hinaspam tutaykunankama millakuypaq kanqa.

⁹Qeya ispaywan kaq runapa sillakusqan monturaqa millakuypaqmi kanqa.

¹⁰Qeya ispaywan kaqpa tiyasqanta pipas tupaykuqqa tutaykunankamam millakuypaq kanqa. Onqoqpa tiyasqankunata apaqpas pachankunata taqsakuspanmi bañakunqa, hinaspam tutaykunankama millakuypaq kanqa.

¹¹Qeya ispaywan kaq runa makinta mana mayllakuchkaspan pitapas tupaykuptinqa, chay tupaykachikuq runam pachankunata taqsakuspa bañakunqa, hinaspam tutaykunankama millakuypaq kanqa.

¹²Qeya ispaywan kaqpa hapisqan allpa mankataqa pakirunkichikmi, kullumanta kaqtañataqmi mayllankichik.

¹³Pipas qeya ispaywan kachkaspan sanoyaruspaqa qanchis punchawtaraqmi suyanan chuyanchakunanpaq, chaymantañam pachankunata taqsaspan kallpaq yakupi bañakunqa; chaynapim chuyaña kanqa.

¹⁴Pusaq kaq punchawpiñataqmi iskay qoqñukunata otaq iskay mallqo palomakunata apamunqa, hinaspam ñoqa Tayta Diospa qayllayman hamunqa, hinaspam ñoqaman asuykamuwananku carpapa punkunpi sacerdoteman qonqa.

¹⁵Sacerdoteñataqmi hukninta huchamanta ofrendata hina ofrecewanqa, huknintañataqmi lliw kañanata hina. Chaynatam ñoqa Tayta Diospa qayllaypi chay qeya ispaywan kaq runata sacerdote chuyanchanqa.

¹⁶Runa puñuchkaptin qari kayninmanta kikillanmanta muhun lloqsiramuptinqa, bañakuspanmi tutaykunankama millakuypaq kanqa.

¹⁷Chay runamanta lloqsiq ima pachamanpas otaq qaramanpas sutuykuptinqa, chaykunaqa taqsasqam kanqa, hinaspam tutaykunankama millakuypaq kanqa.

¹⁸Sichum qariwan warmi puñuruspa karuptinkuqa, iskayninkum bañakunqaku, hinaspam tutaykuqkama millakuypaq kanqaku.

¹⁹Pi warmipas killanwan kaspanqa qanchis punchawmi millakuypaq kanqa, pipas tupaykuqqa tutaykuqkamam millakuypaq kanqa.

²⁰Killanwan kaqpa waqtapasqan kaqkunaqa millakuypaqmi kanqa, tiyasqan kaqkunapas millakuypaqtaqmi kanqa.

²¹Pipas chayna warmipa puñusqan camata tupaykuqqa pachankunata taqsakuspam kikinpas bañakunqa, hinaspam tutaykuqkama millakuypaq kanqa.

²²Pipas chay warmipa tiyasqan kaqkunata tupaykuqqa pachankunata taqsakuspanmi bañakunqa, hinaspam tutaykuqkama millakuypaq kanqa.

²³Chay warmipa camanta otaq tiyasqanta llapchaykuqqa tutaykunankamam millakuypaq kanqa.

²⁴Pipas killanwan onqoq warmiwan puñuruqqa, chay warmi hinam qanchis punchaw millakuypaq kanqa. Puñunan camapas millakuypaqtaqmi kanqa.

²⁵Sichum huk warmipa killan hamunman manaña hamunan tiempopi otaq yawarnin hamuspa achka punchawña mana tanimuptinqa, killanwan kasqanpi hinam yawarnin tanimunankama millakuypaq kanqa.

²⁶Yawarpakuywan onqoq warmipa puñunan camawan imapipas tiyasqankunaqa millakuypaqmi kanqa, imaynam killanwan onqoq warmipa hina.

²⁷Pipas chaykunata tupaykuqqa millakuypaqmi kanqa, pachanta taqsakuspanmi bañakunqa, hinaspam tutaykuqkama millakuypaq kanqa.

²⁸Yawarpakuymanta sanoyaruspanñataqmi qanchis punchawta suyanqa, chaymantañam chuyanchakunqa.

²⁹Pusaq kaq punchawpiñataqmi sacerdoteman apamunqa iskay qoqñukunata otaq iskay mallqo palomakunata, asuykamuwananku carpapa punkunman.

³⁰Hinaptinmi sacerdoteqa hukninta ofrecewanqa hucharayku ofrendata hina, huknintañataqmi ofrecewanqa lliw kañanata hina. Chaynatam ñoqa Tayta Diospa qayllaypi yawarpakuyninmanta chay warmita sacerdote chuyanchanqa.

³¹Chaynatam Israelpa mirayninkunata tukuy millakuypaq kaqninkunamanta chuyanchankichik, chaynataqa ruwankichik paykunapa chawpinpi yachanay carpata millakuypaqta ruwaruspa ama wañurunankupaqmi.

³²Kaykunam yachachikuykuna qeya ispaywan onqospa, otaq puñuchkaptin qari kayninmanta muhun kikillanmanta lloqsiramuptin millakuypaq kaq qarikunapaq,

³³killanwan kaq warmikunapaq, yawarpakuywan onqoq warmikunapaq, huk warmi killanwan kaspa millakuypaq kachkaptin puñuruq qarikunapaq, warmi-qari puñuruspa kakuqkunapaqpas, nispa.