Read Biblia Revisión Chuya Qellqa 1992 – Chuya Qellqa 1992 Levítico 19 Bible Online

Levítico 19 - Biblia Revisión Chuya Qellqa 1992 – Chuya Qellqa 1992 bible

Levítico 19

¹Israelpa mirayninkunaman ninanpaqmi Moisesta Tayta Dios kaynata nirqa: Chuyayá kaychik ñoqa Tayta Diospas chuya kasqayrayku.

³ Tayta-mamaykichikta sapakama kasukuychik. Samana punchawkunapipas samankichikmi. Ñoqaqa Tayta Diosmi kani.

⁴ Amam idolokunataqa yupaychankichikchu, amataqmi metalkunata chulluchispapas dioskunataqa ruwakunkichikchu. Ñoqaqa Tayta Diosmi kani.

⁵Ñoqawan allinlla kasqaykichikmanta ofrendata ñoqa Tayta Diosman ofrecewaspaykichikqa, chaskisqa kanaykichikpaq hinam ofrecewaychik.

⁶Ofrecewasqaykichik animalpa aychantaqa chay punchawllam mikunkichik, puchuqtañataqmi paqarinnintin punchaw mikunkichik, sichum minchantinpaq puchuruptinqa kañarunkichikmi.

⁷Sichum minchan punchawpiña mikuptikichikqa, chay ofrendaqa millakuypaqñam kanqa, hinaptinqa manam chaskisaqchu.

⁸Pipas kimsa punchawniyuqtaña mikuruqqa, Tayta Diospa kaqta yanqachasqanraykum llaqtamanta chinkachisqa kanqa.

⁹Chakraykipi imatapas cosechaspaykiqa amam patankamaqa rutunkichu nitaqmi wichisqankunatapas pallapankichu.

¹⁰Uvasta pallachispapas amam maskapachinkichu nitaqmi wichisqankunatapas pallapankichu, chaykunataqa wakchakunapaqwan huklaw llaqtayuqkunapaqmi saqenki. Ñoqa Tayta Diosmi Diosnikichik kani.

¹¹ Amam suwakunkichikchu, amam engañankichikchu, amataqmi llullakunkichikchu.

¹²Sutiypiqa amam yanqaqa jurankichu, chayta ruwaspaqa ñoqa Diosnikipa sutiytam yanqachawaq. Ñoqaqa Tayta Diosmi kani.

¹³Runamasikitaqa amam ñakarichinkichu, amataqmi imallantapas suwakunkichu. Llamkapusuqnikipa pagontaqa chayllam qoykapunki, paqarinnintinkamaqa amam hatallikunkichu.

¹⁴Mana uyarikuqkunataqa amam ñakankichu, ñawsapa purinanmanpas amataqmi trancata churankichu, aswanqa Diosnikitam kasukunki. Ñoqaqa Tayta Diosmi kani.

¹⁵Juez kaspaykiqa allinllatam arreglanki, wakchamanpas nitaq apumanpas amam sayapakunkichu, runamasikipa quejantaqa allintam arreglanki.

¹⁶Llaqtaykipiqa amam cuento qepiqa kankichu, amataqmi runamasikipa vidantaqa wañuyman churankichu. Ñoqaqa Tayta Diosmi kani.

¹⁷Runamasikitaqa amam sonqoykipiqa cheqninkichu, anyana kaptinqa anyaykunkim, huchallikusqanwan ama qampas huchallikurunaykipaq.

¹⁸Runamasikitaqa amam vengakunkichu nitaqmi cheqnipakunkichu, aswanqa kikikita hinam kuyanki. Ñoqaqa Tayta Diosmi kani.

¹⁹Kamachikuyniykunatam kasukunki. Animalnikitaqa amam muyachinkichu huk rikchaq animalwanqa. Chakraykipipas amataqmi tarpunkichu iskay rikchaq muhutaqa. Tukuy rikchaq qaytuwan awasqa pachawanqa amataqmi churakunkichu.

²⁰Sichum huk runa puñurunman hukpa rimapayasqan criadawan, chay criada manaraq rantisqa otaq manaraq libre kaptinqa iskayninkum castigasqa kanqaku, ichaqa chay criada manaraq libre kasqanraykum mana wañunqakuchu.

²¹Hinaptinqa chay runam ñoqa Tayta Diosman apamuwanqa asuykuwananku carpapa punkunman culpanrayku carnero ofrendata.

²²Chay carnerotam ñoqa Tayta Diosman chay runapa huchanmanta sacerdote ofrecewanqa, hinaptinmi huchanta pampachasaq.

²³Qonay allpaman yaykuspaykichikqa tukuy rikchaq fruta sachakunatam plantankichik, ichaqa ruruntam kimsa watankama ama mikunkichikchu.

²⁴Tawa kaq watapiñataqmi huk fiestata ruwaspa plantasqaykichik sachakunapa rurunta ñoqa Tayta Diospaq sapaqchankichik.

²⁵Pichqa kaq watanpiñam chay sachapa rurunkunataqa mikunkichik. Chaynapim chay sachaykichik astawan rurupusunkichik. Ñoqa Tayta Diosmi Diosnikichik kani.

²⁶ Ima aychatapas yawarnintintaqa amam mikunkichikchu. Amataqmi qatipaqkunapas nitaq layqakunapas kankichikchu.

²⁷Amam umaykichikpa muyuriqninpi chukchaykichiktaqa rutukunkichikchu, barbaykichikpa puntankunatapas amataqmi kaptankichikchu.

²⁸Pipas wañuruptinqa amam aychaykita kuchupakunkichu, amataqmi mana chinkaq marcakunataqa aychaykipipas ruwachikunkichu. Ñoqaqa Tayta Diosmi kani.

²⁹Warmi churikitaqa amam penqaymanqa churankichu chuchumikapaq qospaykiqa, chayta ruwaptikiqa nacionnikim pasaypaq millakuypaq kanman.

³⁰Samana punchawniykunapim samankichik, santuarioytapas respetankichikmi. Ñoqaqa Tayta Diosmi kani.

³¹Alma qayaqkunamanwan qatipaqkunamanqa amam rinkichikchu, chaykuna ruwaqta maskaspaqa millakuypaqmi kawaqchik. Ñoqa Tayta Diosmi Diosnikichik kani.

³²Yuyaqkunapa qayllanpiqa sayarispam paykunata respetankichik, Diosnikitapas kasukunkitaqmi. Ñoqaqa Tayta Diosmi kani.

³³Qamkunawan yachaq huklaw llaqtayuqkunataqa amam ñakarichinkichikchu.

³⁴Llaqtamasikichikta hinam paykunataqa qawankichik, kikikichikta hinam kuyankichikpas, qamkuna hina kasqanrayku. Huklaw llaqtayuqmi qamkunapas Egipto nacionpi karqankichik. Ñoqaqa Tayta Diosmi kani.

³⁵Juzgaspaykichikqa allinllatam arreglankichik, tupuspapas, pesaspapas hinaspa yupaspapas imam kaqllatataqmi qonakunkichik.

³⁶Balanzaykichikpas, pesoykichikpas, tupunaykichikpas chaynataq litroykichikpas cabalmi kanqa. Ñoqa Tayta Diosmi Egipto nacionmanta hurqomurqaykichik.

³⁷Llapallan kamachikuyniykunata hinaspa yachachikuyniykunata kasukuspa ruwayman churaychik. Ñoqaqa Tayta Diosmi kani, nispa.