Read Biblia Revisión Chuya Qellqa 1992 – Chuya Qellqa 1992 Levítico 2 Bible Online

Levítico 2 - Biblia Revisión Chuya Qellqa 1992 – Chuya Qellqa 1992 bible

Levítico 2

¹Pipas kawsaykunamanta ofrendata apamuspaqa, fino harinatam apamuwanqa, chaymanñataqmi aceitetawan inciensota tallinqa.

²Chay ofrendataqa Aaronpa miraynin sacerdotekunamanmi apanqa, hinaptinmi sacerdoteñataq chay fino harina ofrendamanta huk aptayta hurqospan altarpi kañanqa. Chay ofrendaqa yuyarinapaq ofrendam hinaspa ñoqapaq miskillaña asnariq kañana ofrendam.

³Chay ofrendamanta puchuqñataqmi Aaronpaqwan mirayninkunapaq kanqa. Chay ofrendaqa kañasqa ofrendakunamanta ñoqallapaqña chuya ofrendam.

⁴Hornopi ruwasqa ofrendata pipas ofrecewaspanqa, aceiteyuq fino harinamanta ruwasqa tortillakunatawan aceitewan tallisqa galletakunatam apamunqa. Chaykunaqa mana levadurayuqmi kanqa.

⁵Sartenpi ruwasqa ofrendata pipas ofrecewaspanqa, fino harinamanta aceitewan chapusqa tortillakunatam apamuwanqa, chayqa mana levadurayuqmi kanqa.

⁶Chayta pakiparuspam hawanman aceiteta tallinki. Chayqa kawsaykunamanta ofrendam.

⁷Mankapi ruwasqa ofrendata pipas ofrecewaspanqa fino harinamanta aceitewan chapusqa tortillakunatam apamunqa.

⁸Chayna ofrendata ñoqapaq ruwaruspam, sacerdoteman apanki, payñataqmi altarman apaykunqa.

⁹Chaypim sacerdote, lliw ofrendamanta asniqta hurqonqa, hinaspam altarpi kañanqa yuyarinapaq ofrenda kasqanrayku. Chayqa ñoqapaq miskillaña asnariq ofrendam.

¹⁰Chay ofrendamanta puchuqñataqmi Tayta Diosman ofrecesqa kaspa chuya kasqanrayku Aaronpaqwan mirayninkunapaq kanqa.

¹¹Ñoqa Tayta Diosman kawsaykunamanta ofrendata ofrecewaspaykichikqa amam levadurataqa hinankichikchu, nitaqmi mieltapas kañapuwankichikchu.

¹²Levaduratawan mieltaqa ofrecewankichik punta cosechaykichikmanta ofrendata hinam. Ichaqa amam miskillaña asnariq ofrendata hinaqa altarpiqa kañankichikchu.

¹³Kawsaykunamanta llapallan ofrendataqa kachichasqatam apamunki, tukuy ofrenda apamusqaykipiqa amam kachiqa pisinqachu, chay kachiqa Diosnikiwan pacto ruwasqaykim.

¹⁴Pipas tarpusqanmanta punta kaq allinnin rurunta ofrecewaspanqa, puntata poqoq kawsaytam hamkasqata hinaspa chamchasqata apamunqa. Chayqa kawsaykunamanta punta kaq allinnin ofrendam.

¹⁵Chaypa hawanmanmi aceitetawan inciensota tallinki. Chayqa kawsaykunamanta ofrendam.

¹⁶Hinaptinmi sacerdote, aceiteyuq inciensoyuq chamchasqa ofrendata kañanqa. Chayqa Tayta Diospaq kañasqa ofrendam.