Read Biblia Revisión Chuya Qellqa 1992 – Chuya Qellqa 1992 Levítico 23 Bible Online

Levítico 23 - Biblia Revisión Chuya Qellqa 1992 – Chuya Qellqa 1992 bible

Levítico 23

¹Israelpa mirayninkunaman ninanpaqmi Moisesta Tayta Dios kaynata nirqa: Ñoqa Tayta Diospaq sapaqchasqa fiestaykunata ruwanaykichikpaqmi runakunata qayankichik.

³Soqta punchaw llamkaspam qanchis kaq punchawpiñataq samaspaykichik ñoqallapaqña huñunakunkichik, amam chay punchawpiqa llamkankichikchu, chay punchawqa ñoqa Tayta Diospaq samana punchawmi kanqa maypiña yachaptikichikpas.

⁴Kaykunam ñoqa Tayta Diospaq sapaqchasqa fiestakuna, chaykunata ruwanaykichikpaqmi akllasqa punchawkunapi huñunakunkichik:

⁵Punta kaq killapa chunka tawayuq punchawninpim inti seqaykuymanta ñoqa Tayta Diospaq Pascua fiesta ruwayta qallarinkichik.

⁶Chay killapa chunka pichqayuq punchawninpiñataqmi ñoqa Tayta Diospaq mana levadurayuq tanta mikuna fiestata ruwankichik. Qanchis punchawmi mana levadurayuq tantata mikunkichik.

⁷Chay semanapa punta kaq punchawninpim ñoqallapaqña huñunakuyman qayankichik, chay punchawpiqa amam imapipas llamkankichikchu.

⁸Qanchis punchawmi ñoqa Tayta Diosman ofrecemuwankichik kañasqa ofrendata, qanchis kaq punchawpim ichaqa ñoqallapaqña huñunakuyman qayankichik, chay punchawpiqa amam imapipas llamkankichikchu, nispa.

⁹Israelpa mirayninkunaman ninanpaqmi Moisesta Tayta Dios nirqa: Chay qonay allpaman chayaruspaykichikqa cosechapa punta kaq gavillantam sacerdoteman apamunkichik.

¹¹Sacerdoteñataqmi chay gavillata qamkunamanta chaskinaypaq ñoqa Tayta Diospa qayllaypi kuyuchinqa, chaytaqa samana punchawpa paqarinnintintam ruwanqa.

¹²Chay gavilla ofrecewasqaykichik punchawtaqmi huk watayuq sano carnerotapas ñoqa Tayta Diospaq lliwta kañapuwankichik.

¹³Apamuwankichiktaqmi aceitewan chapusqa tawa kilo parten harinatapas, chaynapi ñoqapaq miski asnaq ofrenda kananpaq. Apamuwankichiktaqmi Tallina ofrendapaq huk litro vinotapas.

¹⁴Amaraqmi mikunkichikchu tantantapas, hamkatapas nitaq llullu kawsaytapas ñoqaman ofrendaykichikta apamunaykichik punchawkama. Kayqa wiña-wiñaypaq decretom llapallan miraynikichikpaq maypiña yachaptikichikpas kanqa.

¹⁵Gavilla ofrendata ofrecewasqaykichik punchawmanta qallarispam otaq samana punchawpa paqarinnintinmanta qallarispam qanchis semanatapuni yupankichik.

¹⁶Hinaptinmi samana punchawpa paqarinnintin punchawwan pichqa chunka punchaw kanqa. Chaymantañam ñoqaman ofrecemuwankichik musoq kawsaykunamanta ofrendaykichikta.

¹⁷Kuyuchisqa ofrendapaqmi wasikichikmanta tawa kilo parten harinamanta levadurawan chapusqa iskay tantata apamunkichik. Chay ofrendam kanqa ñoqa Tayta Diospaq primicia hina.

¹⁸Tantakunatawan kuskatam huk watayuq qanchis sano carnerokunata apamuwankichik, huk malta torota chaynataq iskay carnerotapas ñoqapaq lliw kañasqa kanankupaq. Chaykunaqa ñoqa Tayta Diospaq miski asnaq kañasqa ofrendam kanqa. Chaykunawan kuskatataqmi kawsaykunamanta ofrendatapas chaynataq vinotapas apamuwankichik.

¹⁹Huchaykichik pampachasqa kananpaqmi huk chivatota wañuchipuwankichik, ñoqawan allinlla kasqaykichikmantapas watayuq iskay carnerotam ofrecewankichik.

²⁰Chay animalkunatam ñoqa Tayta Diospa ñawpaqniypi sacerdote kuyuchispan ofrecemuwanqa punta rurukunamanta tantayuqta chaynataq iskay carneroyuqta, chaykunaqa ñoqapaq sapaqchasqa kasqanraykum sacerdotepaq kanqa.

²¹Chay punchawpipunim ñoqallapaqña huñunakuyta ruwankichik, amam imapipas llamkankichikchu, chaymi wiña-wiñaypaq kamachikuy llapallan miraynikichikpaq maypiña yachaptikichikpas kanqa.

²²Chakraykichikpi rutuspaykichikqa amam kuchun-kuchunqa rutunkichikchu, nitaqmi puchuqkunatapas pallapankichikchu, chaykunataqa wakchakunapaqwan huklaw llaqtayuqkunapaqmi saqenkichik. Ñoqa Tayta Diosmi Diosnikichikqa kani, nispa.

²³Israelpa mirayninkunaman ninanpaqmi Moisesta Tayta Dios kaynata nirqa: Qanchis kaq killapa punta kaq punchawninqa samana punchawmi kanqa, chay punchawmi yuyarinaykichikpaq trompetakunata tocaspa sapaqchasqa huñunakuyniyta ruwankichik.

²⁵Chay punchawpiqa ñoqamanmi kañasqa ofrendata ofrecemuwankichik, amam imapipas llamkankichikchu, nispa.

²⁶Moisestam Tayta Dios nirqa:

²⁷Qanchis kaq killapa chunka punchawninpim huchaykichik pampachanay punchaw kanqa. Chay punchawpiqa ñoqallapaqña huñunakuyta ruwaspam ayunankichik, hinaspam kañasqa ofrendata ofrecemuwankichik.

²⁸Amam chay punchawpiqa imapipas llamkankichikchu. Chay punchawqa hucha pampachana punchawmi, ñoqa Tayta Diosmi chay punchawpi huchaykichikta pampachasaq.

²⁹Pipas chay punchawpi mana ayunaqqa llaqtanmantam chinkachisqa kanqa.

³⁰Pitapas chay punchawpi llamkaqtaqa runamasinkunamantam chinkarachisaq.

³¹Chay punchawpiqa amam imapipas llamkankichikchu, kayqa wiña-wiñaypaq kamachikuymi kanqa, llapallan miraynikichikpaq maypiña yachaptikichikpas.

³²Samaspam ayunankichik chay killapa isqon kaq punchawpa tardenmanta qallaykuspa paqarinnintin chisinkuykama, nispa.

³³Israelpa mirayninkunaman ninanpaqmi Moisesta Tayta Dios kaynata nirqa: Chay qanchis kaq killapa chunka pichqayuq punchawninpim ñoqa Tayta Diospaq ramada fiestata qanchis punchawpuni ruwankichik.

³⁵Punta kaq punchawpim ñoqallapaqña sapaqchasqa huñunakuyman qayanakunkichik, chay punchawpiqa amam imapipas llamkankichikchu.

³⁶Qanchis punchawmi ñoqa Tayta Diosman kañasqa ofrendakunata ofrecewankichik, pusaq kaq punchawpiñataqmi ñoqallapaqña sapaqchasqa huñunakuyman qayaspa kañasqa ofrendata ofrecewankichik. Chay punchawpiqa fiestay kasqanraykum ama llamkankichikchu.

³⁷Chaykunam ñoqa Tayta Diospaq sapaqchasqa fiestakuna, chay fiestakunapiqa ñoqallapaqña sapaqchasqa huñunakuykunamanmi qayanakunkichik, chaypim ñoqa Tayta Diosman lliw kañana ofrendata, kawsaykunamanta ofrendakunata, wakin wañuchisqa ofrendakunata ofrecewankichik, chaynataqmi vinotapas tallinkichik. Chaykunataqa tupamusqan punchawman hinam ruwankichik.

³⁸Samana punchawta Tayta Diospaq waqaychachkaspapas, regaloykichikta qochkaspapas, kikikichikmanta qosqaykichik ofrendata ofrecechkaspapas kay fiestakunataqa ruwankichikpunim.

³⁹Qanchis kaq killapa chunka pichqayuq punchawninpim, cosechaykichiktapas lliw huñuruspaña, ñoqa Tayta Diospaq hatun fiestata qanchis punchawpuni ruwankichik, punta kaq punchawmi samana punchaw kanqa, pusaq kaq punchawpas samana punchawtaqmi kanqa.

⁴⁰Punta kaq punchawpim allinnin sachakunapa rurunta pallamunkichik, kuchumunkichiktaqmi palmerakunapa kallmankunatawan llaqesapallaña sachakunapa kallmankunatapas chaynataq mayu patankunapi saucekunapa kallmankunatapas, hinaspam qanchis punchawpuni ñoqa Tayta Diospa qayllaypi kusikunkichik.

⁴¹Isqon kaq killapim watan-watan hatun fiestata qanchis punchawpuni ñoqapaq ruwankichik, kaykunam wiñaypaq kamachikuy llapallan miraynikichikpaq kanqa.

⁴²Qanchis punchawmi Israelpa llapallan mirayninkuna chukllakunapi yachankichik.

⁴³Chaynapim qepa wiñay miraynikichikkuna yachanqaku ñawpaq taytankuta Egiptomanta hurqomuspay carpakunapi kawsachisqayta. Ñoqa Tayta Diosmi Diosnikichik kani, nispa.

⁴⁴Chaynatam Israelpa mirayninkunaman Moisés willarqa, Tayta Diospaq hatun fiestakunata ruwanankupaq.