Read Biblia Revisión Chuya Qellqa 1992 – Chuya Qellqa 1992 Levítico 4 Bible Online

Levítico 4 - Biblia Revisión Chuya Qellqa 1992 – Chuya Qellqa 1992 bible

Levítico 4

¹Israelpa mirayninkunaman ninanpaqmi Moisesta Tayta Dios kaynata nirqa: Pipas kamachikuyniypa contranpi huchallikuruptinqa, otaq “amam ruwankichu” nisqayta ruwaruptinqa, kaynatam ruwankichik:

³Sichum sumo sacerdote huchallikuruptinqa llaqtapas huchayuqmi kanqa. Hinaptinqa chay sacerdotem ñoqa Tayta Diospaq sanon malta torota wañuchipuwanqa, chaynapi huchan pampachasqa kananpaq.

⁴Chay torotam asuykuwananku carpapa punkunman pusamunqa, hinaspam chay animalpa umanman makinta churaykunqa, chaymantañam ñoqapa qayllaypi wañurachinqa.

⁵Hina chay sacerdotem animalpa yawarninta asuykuwananku carpaman apamunqa.

⁶Chaypim dedonta yawarman challpuykuspan qanchis kutikama ñoqapa qayllaypi challanqa, chaytaqa santuario rakinaq velopa ñawpaqninpim ruwanqa.

⁷Hina chay sacerdotetaqmi miski asnaq incienso kañana altarpa waqrachankunatapas chay yawarwan llusinqa. Chay altarqa ñoqa Tayta Diospa ñawpaqniypim kachkan ñoqaman asuykuna carpapi. Puchuq yawartañataqmi kañanapaq altarpa sikinman talliykunqa, chay altarqa ñoqaman asuykuna carpapa punkunpim kachkan.

⁸Hucha pampachanapaq wañuchisqa malta toromantam hurqonqa, chunchulninkunapi llapallan wirankunata, llika wirankunata,

⁹iskaynin rurunninkunata, rurunninkunapa hawanpi wirankunata, laplanpa hawanpi wirankunata chaynataq kichpanninpi wirantapas. Chay wirakunataqa rurunninkunatawan kuskatam hurqonqa.

¹⁰Ñoqawan allinlla kasqanmanta wañuchisqa toropa wiranta hinam sacerdote tukuy chaykunata altarpi lliwta kañanqa.

¹¹Ichaqa malta toropa qaranta, aychanta, umanta, piernankunata, ukunninkunata, akanta,

¹²otaq chay nakasqan torotam lliwta campamentomanta uchpa wischunanku limpio sitioman hurqorunqa, hinaspam yantapa hawanpi otaq chay uchpapa hawanpi kañaykunqa.

¹³Sichum ñoqa Tayta Diospa kamachikuyniykunapa contranpi Israelpa mirayninkuna qonqayta huchallikurunmanku, hinaptin chay huchallikusqankumanta mana musyakuptinkuqa, chay huchankumantam llapallan huchayuq kanqaku.

¹⁴Huchallikusqankuta musyakuruspankuñataqmi, llapallankupa rantinpi huk malta torota apamuspa ofrecewanqaku huchankumanta pampachasqa kanankupaq. Apamuwanqakuqa asuykuwananku carpamanmi.

¹⁵Chaypim ñoqa Tayta Diospa qayllaypi llaqtapa ancianonkuna malta toropa umanman makinkuta churaykunqaku, hinaspam wañuchinqaku.

¹⁶Chaymi sumo sacerdote chay malta toropa wakin yawarninta asuykuwananku carpaman apamunqa.

¹⁷Hinaspam dedonta yawarman challpuykuspan qanchis kutikama ñoqapa qayllaypi challanqa, chaytaqa santuariota rakinaq velopa qepanpim ruwanqa.

¹⁸Chay yawarllawantaqmi ñoqaman asuykuna carpapi kaq ñoqa Tayta Diospa ñawpaqniypi altarpa waqrachankunamanpas llusinqa. Puchuq yawartañataqmi kañana altarpa sikinman talliykunqa, chay altarqa kachkan ñoqaman asuykuna carpapa punkunpim.

¹⁹Malta toropa llapallan wirankunata hurqoruspam altarpi kañanqa.

²⁰Chay malta torowanqa ruwanqa hucha pampachanapaq wañuchisqa animalwan hinam. Chaytaqa sacerdotem runakunapa huchan pampachasqa kananpaq ruwanqa, chaynapim huchanku pampachasqa kanqa.

²¹Chaymantam chay wañuchisqa malta torota campamentomanta karuman hurqoruspa kañanqaku, hucha pampachanapaq punta kaq malta toro kañasqanta hina. Chayqa llaqtapa huchan pampachasqa kananpaq ofrendam.

²²Sichum llaqtapi hukkaqnin kamachikuq huchallikurunqa ñoqa Tayta Diospa hukkaqnin kamachikuyniykunapa contranpi hinaspaqa huchayuqmi kanqa.

²³Chaynaqa, chay huchanta pipas reqsiykachiptinmi huk sano chivato ofrendata apamunqa.

²⁴Hinaspanmi chay chivatopa umanman makinta churaykunqa, chaymantam wañuchinqa animal kañanapaq wañuchinanku sitiopi, chaytaqa ñoqa Tayta Diospa qayllaypim ruwanqa. Chayqa hucha pampachanapaq ofrendam.

²⁵Chaymantam sacerdote hucha pampachanapaq wañuchisqa chivatopa yawarninman dedonta challpuykuspan kañana altarpa waqrachankunata llusinqa, puchuq yawartañataqmi hina chay altarpa sikinman talliykunqa.

²⁶Hinaspam ñoqawan allinlla kasqanmanta animalpa wirankunata kañachkaq hina, chay chivatopa llapallan wirankunatam altarpi sacerdote kañanqa. Chaynatam sacerdote ruwanqa chay kamachikuqpa huchan pampachasqa kananpaq, hinaptinmi chay huchanta pampachasaq.

²⁷Sichum ñoqa Tayta Diospa kamachikuyniykunapa contranpi hukkaqnin huchallikuruspanqa, chay ruwasqanmantam huchayuq kanqa.

²⁸Chay huchanta pipas reqsiykachiptinmi hucha ruwasqanmanta huk sano cabra ofrendata apamuwanqa.

²⁹Hinaspam chay animalpa umanman makinta churaykunqa, chaymantañam chay cabrata wañuchinqa kañanapaq wañuchinanku sitiopi.

³⁰Sacerdoteñataqmi dedonta yawarman challpuykuspan kañana altarpa waqrachankunaman llusiykunqa, puchuq yawartañataqmi hina chay altarpa sikinman talliykunqa.

³¹Hinaspam ñoqawan allinlla kasqanmanta animalpa wirankunata hurqochkaq hina, chay cabrapa llapallan wirankunata sacerdote hurqorunqa, hinaspam altarpi kañanqa ñoqa Tayta Diospaq miskillaña asnariq ofrendata hina. Chaynatam sacerdote ruwanqa runapa huchan pampachasqa kananpaq, chaynapim paypa huchanqa pampachasqa kanqa.

³²Sichum chay runa huchanmanta apamunqa ovejakunamanta ofrendata, hinaspaqa sano ovejatam apamunqa.

³³Hinaspam chay animalpa umanman makinta churaykunqa huchan pampachasqa kananpaq, chaymantañam chay animalta kañanapaq sitiopi wañuchinqa, chaynapi huchan pampachasqa kananpaq.

³⁴Chaymantam sacerdoteñataq hucha pampachanapaq wañuchisqa animalpa yawarninman dedonta challpuykuspan kañana altarpa waqrachankunaman llusinqa, puchuq yawartañataqmi hina chay altarpa sikinman talliykunqa.

³⁵Hinaspam ovejapa llapallan wirankunata hurqonqa, imaynam ñoqawan allinlla kasqanmanta wañuchisqan carneropa wirankunata hurqochkaq hina, chaytaqa sacerdotem altarpi kañanqa ñoqa Tayta Diospaq ofrendakunatawan kuskata. Chaynatam sacerdote ruwanqa chay runapa huchan pampachasqa kananpaq, chaynapim huchan pampachasqa kanqa.