Read Biblia Revisión Chuya Qellqa 1992 – Chuya Qellqa 1992 Levítico 5 Bible Online

Levítico 5 - Biblia Revisión Chuya Qellqa 1992 – Chuya Qellqa 1992 bible

Levítico 5

¹Sichum pipas rikusqanmanta otaq yachasqanmanta testigakunanpaq qayasqa kachkaspan, chay rikusqanmanta otaq yachasqanmanta mana willakuyta munaspanqa huchayuqmi kanqa.

²Pipas millay kaqkunata llapcharuqqa, mana mikuna animalpa ayanta, wañusqa uywa animalpa ayanta, qasqonpa puriq animalpa ayanta llapcharuspanqa qachachakurunmi, mana yachastinña ruwaruspapas huchayuqmi kanqa.

³Runapa cuerponmanta millakuypaq kaqkuna lloqsiqta llapcharuq runaqa qachachakurunmi. Mana yachastinña llapchaspa qepataña yacharuspanpas huchayuqmi kanqa.

⁴Sichum pipas mana allinta tantearispa allinta otaq mana allintapas ruwananpaq llutanpi juraspaqa, mana yachastinña juraspapas qepataña yacharuspaqa chay jurasqanmantam huchayuq kanqa.

⁵Pipas kaykunawan huchallikuqqa, huchallikusqanmantam willakunqa.

⁶Hinaspam huchanmanta ñoqa Tayta Diosman huk oveja otaq huk cabra ofrendata apamuwanqa, hinaptinmi sacerdoteñataq chay animalta ofrecewanqa chaynapi huchan pampachasqa kananpaq.

⁷Sichum chay runapa oveja rantinanpaq mana qollqen kaptinqa ñoqa Tayta Diosmanmi apamuwanqa iskay qoqñuta otaq iskay mallqo palomata. Hukninmi huchan pampachana ofrendapaq kanqa, hukninñataqmi lliw kaña sacrificiopaq.

⁸Chaykunatam sacerdoteman apamunqa, hinaptinmi payñataq hucha pampachanapaq kaqta puntata ofrecewanqa, sacerdotem chay pawaq animalpa kunkanta qewirunqa ichaqa umanta mana wiptiruspalla,

⁹chaymantam chay animalpa yawarninwan altarpa waqtanman challanqa, yawar puchuqtañataqmi altarpa sikinman sutuchinqa. Chayqa hucha pampachanapaq ofrendam.

¹⁰Huknin pawaq animaltañataqmi kamachisqayman hina lliw kañana sacrificiopaq kanqa. Chaynatam sacerdote ruwanqa huchallikuqpa huchan pampachasqa kananpaq, chaynapim huchan pampachasqa kanqa.

¹¹Chay runa huchanmanta iskay qoqñuta otaq iskay mallqo palomata apamuwananpaq mana qollqen kaptinqa, iskay kilo fino harina ofrendatam apamuwanqa, chaynapi huchan pampachasqa kananpaq. Chaymanqa amam aceiteta nitaq inciensotapas tallinqachu, chaykunaqa hucha pampachanapaq ofrendam.

¹²Chaytam sacerdoteman apamunqa, hinaptinmi sacerdoteñataq yuyarinapaq ofrenda kananpaq chay ofrendamanta aptaynin huntata hurqoykuspan altarpi kañanqa, chaytaqa ruwanqa ñoqa Tayta Diospaq kañasqa ofrendapa hawanpim, chayqa hucha pampachanapaq ofrendam.

¹³Chaynatam sacerdote ruwanqa huchallikuq runapa ima huchanpas pampachasqa kananpaq, chaynapim huchan pampachasqa kanqa, puchuqnin harinañataqmi sacerdotepaq kanqa, kawsaykunamanta ofrenda hina, nispa.

¹⁴Moisestam Tayta Dios nirqa:

¹⁵Sichum pipas mana yachastin ñoqapaq chuya kaqkunata mana qowaqniy runaqa ñoqa Tayta Diospa contraypim huchallikurun, sayachipuwananpaqmi sano carnero ofrendata apamuwanqa. Chay carneropa preciontam santuariopi pesoman hina churankichik.

¹⁶Chay huchallikuqmi ñoqapaq sapaqchachkaspa mana apamusqanmanta sacerdoteman qonqa, chaytaqa qonqa pichqaman rakisqapa hukninta yapaykuspanmi. Sacerdoteñataqmi huchallikuqpa sayachipuwasqan carnerota wañuchispan chay huchan pampachasqa kananpaq ofrecewanqa, chaynapim chay huchan pampachasqa kanqa.

¹⁷Sichum pipas mana yachastin ñoqa Tayta Diospa kamachikuyniypa contranpi huchallikuruspanqa, chay huchanmantam paganqa.

¹⁸Chaynaqa, huchanmantam sacerdoteman huk sano carnerota apamunqa, qamñataqmi chay carneropa precionta churanki. Hinaptinmi sacerdoteñataq ofrecewanqa huchallikuqpa mana yachastin huchallikusqanmanta, chaynapim huchan pampachasqa kanqa.

¹⁹Chay carneroqa huchamanta ofrendam. Chay runaqa ñoqa Tayta Diospa contraypim huchallikurqa, nispa.