Read Biblia Revisión Chuya Qellqa 1992 – Chuya Qellqa 1992 Levítico 7 Bible Online

Levítico 7 - Biblia Revisión Chuya Qellqa 1992 – Chuya Qellqa 1992 bible

Levítico 7

¹Culparayku ofrendakunaqa ñoqallapaqña sapaqchasqam kanqa, kaymi culparayku ofrendamanta kamachikuy:

²Culparayku ofrecewasqanku animaltaqa wañuchinqaku maymi animal kañanapim, yawarnintañataqmi altarpa waqtankunaman challanqaku.

³Ñoqamanmi ofrecewanqaku animalpa wirallaña chupanta, llika wiranta,

⁴iskaynin rurunninkunata, rurunninkunapi wirankunata, laplanpa hawanpi wirankunata hinaspa kichpanninpi wirantapas. Chay wirankunataqa rurunninkunatawan kuskatam hurqonqa.

⁵Sacerdoteñataqmi tukuy chaykunata altarpi kañanqa, chayqa culparayku ñoqapaq kañasqa ofrendam.

⁶Chay ofrendataqa sacerdotekunallam mikunqaku chaypaq sapaqchasqanku sitiopi. Chayqa ñoqallapaqña sapaqchasqa ofrendam.

⁷Culpamanta ofrendakunaqa huchamanta ofrenda hinam, yachachikuyniypas hina chayllam iskayninpaq. Hucha pampachanapaq ofrecewasqanku animalpa aychanqa chay ofrecewaqniy sacerdotepaqmi kanqa.

⁸Pipapas animalmanta kañana ofrendanta sacerdote ofreceptinqa chay animalpa qaranqa chay sacerdotepaqmi kanqa.

⁹Kawsaykunamanta hornopi yanusqa ofrendawan mankapi otaq sartenpi teqtechisqa ofrendaqa ofreceq sacerdotepaqmi kanqa.

¹⁰Wakin kawsaykunamanta llapallan ofrendaqa Aaronpa mirayninkunapaqmi kanqa, sapakamapaqmi chay hinalla kanqa, aceitewan chapusqa kaspa otaq mana aceiteyuq kaspapas.

¹¹Ñoqawan allinlla kasqaykichikmanta ofrecewanaykichik ofrendamanta yachachikuykunam kaykuna:

¹²Graciasta qowananpaq pipapas ofrendan kaptinqa aceitewan chapusqa mana levadurayuq tortillakunatam ofrecewanqa, ofrecewanqataqmi aceitewan tallisqa mana levadurayuq galletakunatawan aceitewan chapusqa fino harinamanta tantakunatapas.

¹³Ñoqawan allinlla kasqanmanta graciasta qospa tantakunata ofrecespaqa, levadurayuq tantakunata yapaykuspam ofrecewanqa.

¹⁴Sapa ofrendakunamantam wakiqninta rakispan pagachkaq hina ñoqa Tayta Diosman ofrecewanqa. Chayqa ñoqawan allinlla kasqanmanta animalpa yawarnin challaq sacerdotepaqmi kanqa.

¹⁵Graciasta qowaspa ñoqawan allinlla kasqankumanta ofrenda animalpa aychantaqa chay punchawllam mikunqaku, paqarinnintin punchawpaqqa amam puchunqakuchu.

¹⁶Sichum pipapas prometekusqan cumplinanpaq ofrenda kanqa otaq voluntadninmanta ofrendan hinaptinqa chay punchawmi mikunqa, puchuruptinñataqmi paqarinnintin punchaw mikunqa.

¹⁷Chay aychamanta mincha punchawkama puchuruqmi ichaqa kañasqa kanqa.

¹⁸Ñoqawan allinlla kasqanmanta ofrenda aychata mincha punchawpi pipas mikuruptinqa, chay ofrendam mana valeq millakuypaqña kanqa, chay aycha mikuruqñataqmi huchayuq kanqa.

¹⁹Imapas millakuypaq kaqman tupaq aychataqa amam mikunkichikchu, chayna aychaqa kañasqam kanqa. Chay aychataqa haykam chuyanchasqa kaqkunallam mikunqaku.

²⁰Ñoqawan allinlla kasqanmanta ñoqa Tayta Diospaq wañuchisqa animalpa aychanta, pipas huchayuq kachkaspan mikuruq runaqa llaqtanmanta chinkachisqam kanqa.

²¹Pipas millakuypaq kaqta llapcharuqqa: Runapa cuerponmanta lloqsiq kaptinpas, mana mikuna animalta kaspapas otaq ima millakuypaq kaqta llapcharuchkaspa ñoqawan allinlla kasqanmanta wañuchisqa animalpa aychanta mikuruqqa llaqtanmanta chinkachisqam kanqa.

²²Israelpa mirayninkunaman Moisés ninanpaqmi Tayta Dios kaynata nirqa: Torokunapa, carnerokunapa hinaspa cabrakunapa wirantaqa amam mikunkichikchu.

²⁴Kikillanmanta wañuq animalpa wiranqa chaynataq purun animalpa wañuchisqan animalpa wiranqa imapas huk rikchaqpim servikunqa, amam mikunkichikchu.

²⁵Ñoqa Tayta Diosman kañapuwasqanku ofrenda animalpa wiran mikuqqa llaqtanmanta chinkachisqam kanqa.

²⁶Maypiña kaspaykichikpas raprayuq animalpa, otaq ima animalpa yawarnintapas amam mikunkichikchu.

²⁷Ima animalpapas yawarnin mikuq runaqa llaqtanmanta chinkachisqam kanqa, nispa.

²⁸Israelpa mirayninkunaman ninanpaqmi Moisesta Tayta Dios kaynata nirqa: Ñoqawan allinlla kasqanmanta animal ofrecewaqniyqa, chay ofrendanmantam wakinta ñoqa Tayta Diosman apamuwanqa.

³⁰Kikinmi makinwan apamunqa, hinaspam ñoqa Tayta Diospaq kañapuwanqa. Animalpa wirantapas chaynataq qasqontapas kuyuchispanmi ofrecewanqa. Chayqa kuyuchispa ofrecewananku ofrendam.

³¹Chay animalpa wirantaqa sacerdotem altarpi kañapuwanqa, qasqonñataqmi Aaronpaqwan churinkunapaq kanqa.

³²Ñoqawan allinlla kasqaykichikmanta ofrecewasqaykichik animalpa alleq piernantam sacerdoteman qonkichik, chayqa sacerdoteman paganaykichik ofrendam.

³³Chay animalpa alleq piernantam ñoqawan allinlla kasqaykichikmanta animalpa yawarnin hinaspa wiran presentawaqniy sacerdoteman qonkichik.

³⁴Israelpa mirayninkuna ñoqawan allinlla kasqankumanta animalta ofrecewaptinkum hurqonki kuyuchispa ofrecewananku qasqon ofrendata chaynataq sacerdoteman qonanku piernan ofrendatapas. Chaytaqa ruwankichik Aaronpaqwan mirayninkunapaq imaynam wiña-wiñaypaq decretoyman hinam.

³⁵Tayta Diospaq kañasqa ofrendakunamanta kaqmi Aaronpaqwan mirayninkunapa tupaqnin kanqa, kaykunaqa Tayta Diospa sacerdotenkunaña kanankupaq sapaqchasqa kasqanku punchawmantaraqmi.

³⁶Sacerdotekuna aceitewan tallisqa kasqanku punchawmantaraqmi Tayta Dios kamachirqa Israelpa mirayninkuna tukuy kaykunata qonankupaq. Chay decretoqa wiña-wiñaypaq qosqam karqa.

³⁷Kaykunam lliw kañanamanta, kawsaykuna ofrendamanta, hucharayku wañuchisqa ofrendamanta, culparayku wañuchisqa ofrendamanta, sacerdote sapaqchanapaq ofrendamanta hinaspa Dioswan allinlla kasqankurayku wañuchisqa ofrendamanta yachachikuykuna.

³⁸Chaykunatam Moisesman Tayta Dios kamachirqa Sinaí orqopi, chaynapi Israelpa mirayninkuna ofrendankuta Tayta Diosman Sinaí chunniqpi ofrecenankupaq, nispa.