Read Biblia Revisión Chuya Qellqa 1992 – Chuya Qellqa 1992 Jeremías 1 Bible Online

Jeremías 1 - Biblia Revisión Chuya Qellqa 1992 – Chuya Qellqa 1992 bible

Jeremías 1

¹Kaykunam Benjamín law Anatot llaqtapi yachaq sacerdotekunamanta kaq Hilciaspa churin Jeremiaspa rimarisqankunawan ruwasqankuna.

²Judá nacionpi Amonpa churin rey Josías chunka kimsayuq wataña munaychakuchkaptinmi, Jeremiasta Tayta Dios rimapayarqa.

³Rimapayarqataqmi Judá nacionpa reynin Joacimpa chaynataq Sedequiaspa tiemponpipas. Paykunaqa karqaku rey Josiaspa churinkunam. Rey Sedequiaspa chunka hukniyuq wata munaychakusqankamam rimapayarqa. Chay watapa pichqa kaq killanpim Jerusalén llaqtapi yachaqkuna Babilonia nacionman preso apasqa karqaku.

⁴Tayta Diosmi rimapayawaspan kaynata niwarqa:

⁵Mamaykipa wiksanpi manaraqpas unanchachkaspaymi reqsirqaykiña, manaraqpas nacechkaptikim qamtaqa sapaqcharqaykiña; nacionkunapa profetan kanaykipaqmi akllarqaykiña.

⁶Ñoqañataqmi kaynata nirqani: ¡Ay, Señor, Dios Taytalláy, ancha warmaraqmi kani, manaraq rimay yachaqmi kani! nispay.

⁷Ichaqa Tayta Diosmi niwarqa: Ama niychu ancha warmaraq kasqaykitaqa, qamqa kamachisqaymanmi maymanpas rinki, imam kamachisqaytam willakamunki.

⁸Amam pitapas manchakunkichu, qanwanmi kachkani libranaypaq, nispa. Ñoqa Tayta Diosmi chaynata niki.

⁹Hinaspanmi Tayta Diosqa makinta haywariykamuspan, simiyta llapchaykuspan niwarqa: Kunanmi palabraykunata simikiman churani.

¹⁰Kunanmi nacionkunapa hawanman churayki, reykunapa munaychakuyninpa hawanpim churayki, rachunaykipaq chaynataq tuñichinaykipaq, taqmanaykipaq chaynataq chinkachinaykipaq, plantanaykipaq chaynataq hatarichinaykipaq.

¹¹Tayta Diosmi tapuwarqa: Jeremías ¿imatataq qawachkanki? nispa. Chaymi ñoqa nirqani: Almendras sachapa kallmantam, nispa.

¹²Hinaptinmi Tayta Dios niwarqa: Allintam rikurunki, nisqaykuna ruwayman churasqa kanantam qawachkani, nispa.

¹³Kaqmantam Tayta Dios tapuwarqa: ¿Imatataq qawachkanki? nispa. Chaymi ñoqañataq nirqani: Norte lawmanta timpuchkaq manka taqtakaykamuchkaqtam, nispa.

¹⁴Chaymi Tayta Dios niwarqa: Norte lawmantam kay nacionpi yachaqkunapaq sasachakuy hamunqa.

¹⁵Ñoqa Tayta Diosmi kaynata nini: Norte lawpi nacionkunatam qayasaq, reyninkunam hamuspa Jerusalenpa punkunpi trononkuta churanqaku; Jerusalenpi, Judá nacionpi yachaqkunatam atacaspanku presota apanqaku.

¹⁶Kay castigotam llaqtayman apamusaq mana allinkunata ruwaspa saqeruwasqankumanta, sapaq dioskunapaqña inciensota kañapusqankumanta, kikinkupa ruwasqankutaña hatunchasqankumanta.

¹⁷Chaynaqa, weqawnikita allinta wataykuspa riy, lliw kamachisqaykunata paykunaman willamuy. Ama paykunataqa manchakuychu, mana chayqa, paykunapa qayllanpim katkatatarachisqayki.

¹⁸Murallasqa llaqtata hinam churayki, fierromanta pilarta hinam churayki, broncemanta murallata hinam churayki, Judá nacionpi reykunapa contranpi, kamachiqninkunapa contranpi, sacerdotenkunapa contranpi, llapa runakunapa contranpi.

¹⁹Contraykipi peleaspankupas manam vencesunkichu, ñoqam qanwan kachkani libranaypaq, nispa. Ñoqa Tayta Diosmi chaynata niki.