Read Biblia Revisión Chuya Qellqa 1992 – Chuya Qellqa 1992 Jeremías 10 Bible Online

Jeremías 10 - Biblia Revisión Chuya Qellqa 1992 – Chuya Qellqa 1992 bible

Jeremías 10

¹Israelpa mirayninkuna, Tayta Diospa nisusqaykichikta uyariychik.

²Tayta Diosmi kaynata nin: Mana reqsiwaqniy nacionkunapa ruwasqantaqa ama qatipakuychikchu, amayá cielokunapi señalkunataqa manchakuychikchu, chay nacionkunaña manchakuptinpas.

³Chay nacionkunapa costunbrenqa yanqallam, paykunaqa montepi kullutam kuchumunku, idolokuna ruwaqkunañataqmi azuelawan llaqllanku,

⁴qoriwan qollqewanmi llusinku, mana wichiykunanpaqñataqmi clavokunawan takaspa takyachinku.

⁵Chay idolokunaqa tarpuykunapa chawpinpi manchachikumanmi rikchakun; manam rimankuchu, mana puriq kasqanraykum kayman chayman qepikachasqa kanku. Chaykunataqa ama manchakuychikchu, chaykunaqa manam allinta otaq mana allintapas ruwasunkichikmanchu.

⁶Dios Taytalláy, qam hinaqa manam pipas kanchu. Ancha hatunmi qamqa kanki, sutikipas hatun atiyniyuqmi.

⁷Qamqa nacionkunapa reyninmi kanki, lliwpa manchakunanmi kanki. Llapallan yachayniyuqkunamantapas, kay pachapi reykunamantapas, qam hinaqa manam pipas kanchu.

⁸Paykunaqa mana yachayniyuq hinaspa mana yuyayniyuqkunam. Kullumanta idolokunaqa manam imatapas yachachinmanchu.

⁹Paykunapa idolonkuqa Tarsis lawmanta apamusqanku qollqellam, Ufaz lawmanta apamusqanku qorillam; chaykunaqa runapa ruwasqallanmi, metalta chulluchiqkunapa ruwasqallanmi. Morado telawan pachachisqam kachkanku, grosella telawan ustuykachisqam kachkanku. Yachaqkunapa ruwasqallanmi lliwpas kachkanku.

¹⁰Tayta Diosllam cheqap Diosqa, payqa kawsaq Diosmi, payqa wiñaypaq reymi, piñakuptinqa allpapas katkatatanmi, rabiakuptinqa nacionkunapas manam aguantanmanchu.

¹¹Israelpa mirayninkuna, chay mana reqsiwaqniy nacionkunata kaynata nimuychik: Kay pachatawan hanaq pachata mana unanchaq dioskunaqa, kay pachamantam chinkachisqa kanqaku, manam mayqanninpas puchunqachu, nispaykichik.

¹²Tayta Diosmi kay pachata atiyninwan ruwarqa, kay pachapi kaqkunatam yachayninwan takyachirqa, cielokunatapas ancha yachayninwanmi mastarirqa.

¹³Rimariptillanmi cielopi yakukunapas sinchillataña paramun, puyukunatapas kay pachapa patankunamantam hatarichimun, rayokunatapas paratawan kuskatam chayachimun, maymi kasqanmantam wayratapas hurqomun.

¹⁴Runakunaqa llapallankum asnoyarunku, llapallankum mana yachayniyuq rikurirunku. Metalmanta idolokuna ruwaqkunam penqaypi rikurirunku, fundisqa idolokunaqa pantaymi paykunapaqa manam kawsayninpas kanchu.

¹⁵Chay idolokunaqa mana imapaq valeqmi, castigasqa kasqanku punchawmi ñutusqa kanqaku.

¹⁶Jacobpa Diosninmi ichaqa mana chaynachu, payqa tukuy ima unanchaqmi, Israelpa mirayninkunatam llaqtanpaq akllakurqa. Sutinpas Tukuy Atiyniyuq Tayta Diosmi.

¹⁷Enemigopa muyurusqan runakuna, tukuy ima kapuqnikichikta hoqariychik.

¹⁸Tayta Diosmi kaynata nin: Kunanmi kay nacionpi yachaqkunata qarqorusaq, warakachkaq hinam paykunataqa wischurusaq, ñakarichisqa kanankupaqmi paykunataqa sasachakuyman churarusaq.

¹⁹¡Imaynaraq kasaq kay ñakarisqaywan! ¡Heridaykunapas mana hampiy atinam! Ichaqa ñoqam nirqani: Kayqa onqoyniymi, hinam ñakarisaq, nispa.

²⁰Carpaykunatam llikiparunku, waskankunatam lliw tipiparunku. Churiykunapas saqeruwaspam wañurunku; manañam carpay sayachiqpas kanñachu, toldoy chutaqpas manam kanñachu.

²¹Kamachikuqkunapas mana yachayniyuqñam rikurirunku, Tayta Diostapas manañam maskankuchu; chayraykum wichirunku, ovejankunapas lliwñam cheqerun.

²²¡Uyariychik willakuymi hamuchkan! Norte lawmantam hatun qapariy hamuchkan, Judá nacionpi llaqtakunatam purmachinqa, atoqkunapa yachananmanñam tikrarunqa, nispa.

²³Dios Taytalláy, yachanim, runaqa manam kawsayninmantaqa dueñochu, runaqa manam yachakunchu imayna kanantapas.

²⁴Dios Taytalláy ama piñakuspayá allin arregloykiman hina corregiykullaway, piñakuspaqa puchukarachiwankimanmi.

²⁵Piñakuynikiqa mana reqsisuqniki nacionkunamanyá chayachun, mana yupaychasuqniki nacionkunamanyá chayachun. Paykunaqa Jacobpa mirayninkunatam chinkarachirqaku, chinkarachispam pasaypaqta wasillankutapas purmarachirqaku.