Read Biblia Revisión Chuya Qellqa 1992 – Chuya Qellqa 1992 Jeremías 12 Bible Online

Jeremías 12 - Biblia Revisión Chuya Qellqa 1992 – Chuya Qellqa 1992 bible

Jeremías 12

¹Dios Taytalláy, qamqa allin ruwaqmi kanki, manam qanwanqa churanakuymanchu; chaywanpas kaykunam tapukuyniy kachkan: ¿Imanasqataq mana allin ruwaq runakunaqa allinta kawsakunku? ¿Imanasqataq iskay uya runakunaqa hawkalla kawsakunku?

²Paykunaqa plantaruptikim sapichakururqaku, wiñaruspam ruruyta qallaykurqaku. Paykunaqa simillamantam sutikitapas rimanku, sonqonkum ichaqa qanmanta karupi kachkan.

³Dios Taytalláy, qanmi reqsiwanki, qawawaspaykim qanman imayna sonqoyuq kasqayta yachawanki. Chay runakunatayá nakanapaq ovejakunata hina aparuy, nakasqa kananku punchawpaq sapaqcharuy.

⁴¿Haykapikamataq allpa chakisqalla kanqa? ¿Haykapikamataq purunpi qorakunapas qawisqa kanqa? Kay nacionpi yachaqkunapa huchanmantam uywakunawan alton pawaq animalkunapas chinkarun. Paykunam ninku: Diosqa manam imayna tukurunanchiktapas yachanchu, nispanku.

⁵Sichum chakiwallawan kallpaqkunawan kallpaspa pisipachkaspaqa ¿imaynataq caballopi kallpaqkunawanqa llallinakuwaq? Hawkayaypa kanan allpapi mana hawka kachkaspaqa ¿imaynatataq Jordán mayupa patan montekunapiqa tarikuwaq?

⁶Wawqekikunawan aylluykikunapas traicionarusunkim, qepaykipiqa hatunmantaraqmi insultasunki. Kuyakuyllawanña rimapayasuptikipas ama paykunapiqa hapipakuychu.

⁷Llaqtaytam saqeruni, ñoqapa kaqtam qepanchakuruni, tukuy sonqoywan kuyasqay naciontam enemigonkunaman qoykuni.

⁸Llaqtaymi monte león hinaña rikurirun, ñoqapa contraypim qaparin, chayraykum cheqnipakuruni.

⁹Llaqtayqa kuyayllapaq purayuq urpi hinaraqmi, paytaqa aycha mikuq alton pawaq animalkunam atacanku. ¡Purun animalkuna, huñunakamuychik, convidota mikunaykichikpaq hamuychik!

¹⁰Achka michiqkunam uvas huertayta purmarachinku, chakraytam saruparunku. Ancha kuyasqay allpaytam manaña imayuq kanankama chunnirachinku.

¹¹Purmarachispam chunnichkaqta saqerunku, ñoqam waqachkaqta qawarqani. Lliw nacionmi purmasqa kachkan, ichaqa manam pitapas imapas qokunchu.

¹²Tukuy chunniq orqonkunatam tuñichikuq runakuna hamurqaku, Ñoqa Tayta Diosmi kay pachata kuchun-kuchun tukusaq, manam pipaqpas hawkayay kanqachu.

¹³Trigota tarpuspankupas, kichkatam cosecharqaku; yanqapaqmi llamkasqankupas. Ñoqapa sinchi piñakuyniyraykum cosechankupas yanqapaq kanqa.

¹⁴Israelpa mana allin vecinonkunamantam Tayta Dios kaynata nin: Israelman qosqay allpa qechuqkunatam maymi kasqankumanta hurqorusaq. Judá llaqtaytapas paykuna ukumantam hurqomusaq.

¹⁵Chaynata hurqoruspaypas paykunataqa llakipayarisaqmi, hinaspaymi sapakamata nacionninkuman kutichisaq.

¹⁶Paykunam llaqtayta yachachirqaku Baal idolorayku juranankupaq. Sichum runaykuna hinaña kawsayta yachaspankum ñoqa Tayta Diospa sutiypi juraspa ninqaku: “Kawsaq Diosraykum jurani”, nispanku hinaspaqa runaykuna ukupim yachanqaku.

¹⁷Mana kasuwaqniy naciontam ichaqa sapinmanta sachata hurqochkaq hina pasaypaqta chinkarachisaq. Ñoqa Tayta Diosmi chaynata nini.