Read Biblia Revisión Chuya Qellqa 1992 – Chuya Qellqa 1992 Jeremías 23 Bible Online

Jeremías 23 - Biblia Revisión Chuya Qellqa 1992 – Chuya Qellqa 1992 bible

Jeremías 23

¹Tayta Diosmi kaynata nin: ¡Ay, imaynaraq kanqaku ovejaykunata chinkarachiq michiqkuna! ¡Ay, imaynaraq kanqaku ovejaykunata cheqerachiq michiqkuna! nispa.

²Chayraykum llaqtay michiqkunata Israelpa yupaychasqan Tayta Dios kaynata nin: Qamkunam ovejaykunata cheqerachispa ayqerachinkichik. Manam nanachikurqankichikchu. Chayraykum mana allinkuna ruwasqaykichikmanta castigasqaykichik. Ñoqa Tayta Diosmi chaynata nini.

³Cheqechisqay nacionkunamantam wakin ovejaykunata kikiypuni huñumusaq. Mikunanku pastokunaman kutichimuptiymi achkallataña miranqaku.

⁴Paykunata michinanpaqmi michiqkunata churasaq, chaynapi manaña manchakunankupaq nitaq hukllapas chinkananpaq. Ñoqa Tayta Diosmi chaynata nini.

⁵Tayta Diosmi kaynata nin: Chayamunqam punchaw rey Davidpa mirayninmanta huk reyta hatarichinaypaq, payqa allin ruwaqmi kanqa, yachaywanmi nacionpipas munaychakunqa, allin arregloman hinam munaychakunqa, allin ruwaykunawanmi munaychakunqa.

⁶Paypa munaychakusqan punchawkunapim Judá nación salvasqa kanqa, Israel nacionpas hawkam kawsakunqa. Kaynataraqmi sutichanqakupas: “Tayta Diosmi salvaqninchikqa” nispanku.

⁷Chayraykum Tayta Dios kaynata nin: Chayamunqam punchaw, “Israelpa mirayninkunata Egipto nacionmanta hurqomuq kawsaq Tayta Diosraykum jurani” nispa manaña juranankupaq.

⁸Juranqakuqa: “Israelpa mirayninkunata norte law nacionkunamanta chaynataq qarqosqan wakin nacionkunamanta hurqomuq kawsaq Tayta Diosraykum jurani” nispañam. Paykunaqa allpankupiñam yachakunqaku.

⁹Llapa profetakunatam ñoqa Jeremías kaynata nini: Sonqoymi pasaypaq hukmanyasqa kachkan, tulluykunam katkatatachkan, sinka runamanraqmi rikchakuchkani, vinowan macharuqmanmi rikchakuchkani. Tayta Diosraykum chayna kachkani, chuya palabrankunaraykum chayna kachkani.

¹⁰Kay nacionqa waqllikuq runakunapa huntasqanmi kachkan, ñakasqa kasqankuraykum allpapas llakisqa kachkan, chunniqpi pastokunapas chakisqam kachkan, chay profetakunaqa mana allinkuna ruwaypim kallpakachanku, atiyniyuq kasqankupas mana allinkuna ruwanallankupaqmi.

¹¹Ñoqa Tayta Diosmi kaynata nini: Profetakunawan sacerdotekunapas millay runakunam, wasiypipunim mana allinkuna ruwachkaqta tarini.

¹²Chayraykum paykunapa kawsayninqa tutayaypi lluchka ñan hina kanqa, tanqasqa kaspankum chayman wichiykunqaku, castiganay punchawpim ñakariyta paykunaman apamusaq. Ñoqa Tayta Diosmi chaynata nini.

¹³Samaria llaqtapi profetakunatam contraypi mana allinkuna ruwachkaqta rikurqani: Baal idolopa sutinpi profetizaspankum, Israel llaqtayta pantayman aparunku.

¹⁴Jerusalenpi profetakunatam millakuypaq kaqkuna ruwachkaqta rikurqani: Hukwan-hukwanmi waqllikunku, llullakuyllapim kallpakachanku, mana allin runakunatam kallpanchanku, huchankumanta mana wanakunankupaq. Sodoma Gomorra llaqtapi runakunamanraqmi rikchakunkupas.

¹⁵Chay profetakunapa contranpim Tukuy Atiyniyuq Tayta Dios kaynata nini: Chay profetakunamanmi qatqe ajenjota mikuchisaq, venenoyuq yakutam tomachisaq. Jerusalenpi profetakunamantam millakuypaq kaqkuna lloqsimurqa, hinaspam lliw nacionman cheqerirqa, nispa.

¹⁶Tukuy Atiyniyuq Tayta Diosmi kaynata nin: Chay profetakunapa rimasqantaqa ama kasuychikchu, paykunaqa llullallatam willasuchkankichik, kikinkupa tanteasqallankutam rimapayasuchkankichik, mana rimasqaykunatam paykunaqa nisuchkankichik.

¹⁷Qepanchakuwaqniy runakunatam paykunaqa nichkanku: Tayta Diosmi nisunki: “Hawkallam kankichik”, nispanku. Mana kasukuq sonqoyuq runakunatañataqmi nichkanku: “Sasachakuyqa manam chayamusunkichikchu”, nispanku.

¹⁸Ichaqa ¿mayqannintaq paykunamanta Tayta Diospa qayllanpi kaspan palabranta uyarirqa? ¿Mayqannintaq simintapas sumaqta uyarispan kasukurqa?

¹⁹Tayta Diospa piñakuyninqa sinchi wayra hinaraqmi lloqsimunqa, muyuq wayra hinaraqmi mana allin ruwaqkunapa hawanman chayanqa.

²⁰Tayta Diospa piñakuyninqa manam taninqachu imam ruwananta tukunankama. Hamunqam punchawkuna kaykunamanta entiendenaykichikpaq.

²¹Chay profetakunataqa manam kachamurqanichu, ichaqa chayllam kallparqaku; chay profetakunataqa manam rimapayarqanichu, ichaqa sutiypiraqmi profetizarqakupas.

²²Ñoqapa qayllaypi kaspankuqa llaqtaymancha palabraykunata willanmanku karqa; mana allin kawsayninkumantawan mana allin ruwayninkumanta wanakunankupaqchá willanmanku karqa.

²³Ñoqa Tayta Diosmi kaynata nini: Ñoqaqa hichpaykichikpi kaspa otaq karupi kaspapas Diosnikichikmi kani.

²⁴¿Pitaq qayllaymanta pakakurunman? ¿Manachu ñoqaqa hanaq pachapipas kay pachapipas kachkani?

²⁵Ñoqam chay llulla profetakunapa rimasqanta uyarirqani, sutiypiraqmi paykunaqa “mosqorunim, mosqorunim” nispa llullallata willakuchkanku.

²⁶¿Haykapikamataq chay profetakuna llullallata willakunqaku? ¿Haykapikamataq sonqonkumanta hurqospa mana pasaqkunata willakunqaku?

²⁷Mosqosqankuta willanakuspankum runaykuna qonqaruwananta munachkanku, imaynam ñawpaq taytankupas qonqaruwaspanku Baal idolotaña qatisqankuta hina.

²⁸Pipas mosqoruspaqa chay mosqorusqantayá willakuchun, pipas rimasqayta uyarispaqa imam kaqtayá willakuchun. Trigotawan pajataqa manam hukllawanachu.

²⁹Palabrayqa nina hinam, rimasqayqa qaqa rumipas ñutuq martillo hinam. Ñoqa Tayta Diosmi chaynata nini.

³⁰Chayraykum ñoqa Tayta Diosqa chay profetakunapa contranpi kachkani, paykunaqa ñoqapa nisqaykunatapas suwanakunkum.

³¹Ñoqa Tayta Diosmi nini: Ñoqaqa chay profetakunapa contranpim kachkani, paykunaqa miskillataña rimaspankum ninku: “Tayta Diosmi kaynata nin”, nispankuraq.

³²Yanqakunata mosqoruspa runaykunata pantachiq profetakunapa contranpim kachkani. Paykunaqa llullakunata willaspankum llaqtayta pantarachinku. Paykunataqa manam kachamurqanichu nitaqmi kamachimurqanichu, paykunaqa manam llaqtaypa allinnintachu rimarqaku. Ñoqa Tayta Diosmi chaynata nini.

³³Jeremías, sichum kay runakuna, llapa profetakuna otaq sacerdotekunapas tapusunkiman: ¿Imatataq Tayta Dios nisurqanki? nispanku, hinaptinqa paykunatam ninki, Tayta Diosmi kaynata nin: Qamkunaqa llasaq qepi hinam ñoqapaq kankichik, chayraykum saqerusqaykichik, nispa.

³⁴Sichum profetapas, sacerdotepas otaq hukkaqnin runapas ninman: “Tayta Diospa willakuyninmi kayqa” nispan, hinaptinqa chay runatam aylluntinta castigasaq.

³⁵Runamasikichikwan hinaspa aylluykichikwanqa kaynatam ninakunkichik: ¿Imanimuntaq Tayta Diosqa? ¿Imanintaq Tayta Diosqa? nispa.

³⁶Amañam ninkichikñachu: “Kaymi Tayta Diospa palabran” nispaqa. Pipas chaynata rimaptinqa kikinpa sasachakuyninpaqmi kanqa. Qamkunaqa yupaychasqanchik Tukuy Atiyniyuq Tayta Diospa nisqantam qewirunkichik.

³⁷Jeremías, chay profetakunata kaynata tapumuy: ¿Imanimusunkitaq Tayta Diosqa? ¿Imanirqataq Tayta Diosqa? nispayki.

³⁸Sichum: “Tayta Diospa willakusqanmi kayqa” nispa nisuptikiqa ñoqa Tayta Diospa nisqaytam kaynata ninki: “Amañam rimankichikchu chaynataqa nichkaptiypas hinallaraq rimasqaykichikraykum

³⁹qamkunataqa qepita hina hoqariruspay wischurusqaykichik, wischurusaqtaqmi qamkunamanwan ñawpaq taytaykichikkunaman qosqay llaqtatapas.

⁴⁰Hinaspaymi wiñaypaq penqayman churasqaykichik, mana qonqaypas atinaykichikkamam uchuychasqaykichik”, nispa.