Read Biblia Revisión Chuya Qellqa 1992 – Chuya Qellqa 1992 Jeremías 24 Bible Online

Jeremías 24 - Biblia Revisión Chuya Qellqa 1992 – Chuya Qellqa 1992 bible

Jeremías 24

¹Babilonia nacionpa reynin Nabucodonosor presota Judá nacionpa reynin Joacimpa churin Jeconiasta, kamachikuqkunata, artesanokunata hinaspa herrerokunata Babiloniaman aparusqanpa qepantam, Tayta Dios qawachiwarqa templopa punkunpi churasqa higos huntayuq iskay canastakunata.

²Huknin canastapim kasqa puntata poqoruq allinnin higoskuna, huknin canastapiñataqmi kasqa mana mikunapaq hina higoskuna.

³Hinaptinmi Tayta Dios niwarqa: Jeremías ¿imatataq rikuchkanki? nispa. Chaymi nirqani: Higostam. Wakinmi mikunapaq hina kachkan, wakinñataqmi mana mikunapaq hina, nispay.

⁴Hinaptinmi Tayta Dios niwarqa:

⁵Ñoqa Israelpa yupaychasqan Tayta Diosnin kaynata nini: Kay allin higoskunata hinam, Judá nacionmanta Caldea lawman allinninkupaq preso apachisqay runakunata qawasaq.

⁶Paykunataqa waqaychaspaymi kay allpaman kutichimusaq. Kaypi hatarichispaymi manaña tuñichisaqñachu. Plantaruspaymi manaña sapinmantaqa chutasaqñachu.

⁷Tayta Dios kasqayta reqsiwanankupaqmi yachayta qosaq. Paykuna llaqtay kanqa, ñoqañataqmi Diosninku kasaq, chaynaqa kanqa tukuy sonqonkuwan ñoqaman kutirikamusqankuraykum.

⁸Judá nacionpa reynin Sedequiastawan yanapaqnin kamachikuqkunata, Jerusalén llaqtapi yachaqkunata, kay nacionpi puchuqkunata, Egipto nacionman rispa chaypi yachaqkunatam ichaqa, mikunapaqpas manaña valeq higosta hina ruwasaq.

⁹Paykunataqa sasachakuymanmi churasaq kay pachapi nacionkunapas mancharikunankama. Maylaw llaqtamanpas qarqosqaypim, burlakusqa, asipayasqa, ñakasqa chaynataq penqayman churasqa kanqaku.

¹⁰Paykunamanmi guerrata, yarqayta hinaspa peste onqoyta kacharisaq, taytankuman qosqay allpamanta chinkanankukama.