Read Biblia Revisión Chuya Qellqa 1992 – Chuya Qellqa 1992 Jeremías 28 Bible Online

Jeremías 28 - Biblia Revisión Chuya Qellqa 1992 – Chuya Qellqa 1992 bible

Jeremías 28

¹Judá nacionpi rey Sedequías tawa wataña munaychakuchkaptinmi, chay watapa pichqa kaq killanpi, Gabaón llaqtayuq Azurpa churin profeta Hananías, Jeremiasta templopi sayachkaptin sacerdotekunapa chaynataq llapa runakunapa qayllanpi kaynata nirqa:

²Israelpa yupaychasqan Tukuy Atiyniyuq Tayta Diosmi kaynata nin: Babilonia nacionpi reypa yugontam pakirusaq.

³Kaymanta iskay watamanmi, kay temploymanta Babilonia nacionman rey Nabucodonosorpa apasqan serviciokunata kutichimusaq,

⁴kutichimusaqtaqmi Joacimpa churin Judá nacionpa reynin Jeconiastawan Judá nacionmanta Babilonia nacionman preso apasqa runakunatapas. Babilonia nacionpi reypa yugontam pakisaq. Ñoqa tayta Diosmi chaynata nini, nispa.

⁵Chaymi Jeremiasñataq sacerdotekunapa chaynataq templopi huñunasqa llapallan runakunapa qayllanpi Hananiasta kaynata nirqa:

⁶Tayta Dios chaynata ruwaptinqa allincha kanman. Allincha kanman nisqaykikunata Tayta Dios cumplichispan templonpa servicionkuna apasqankuta chaynataq Babilonia nacionman llapallan preso apasqa runakunatapas kay llaqtaman kutichimuptinqa.

⁷Chaynaqa, qanmanpas chaynataq llapa runakunamanpas nisqayta uyariy:

⁸Ñawpaq watakunapim, qamtapas ñoqatapas mamanchik manaraq wachakuwachkaptinchik, llapa profetakuna rimarqaku achka nacionkunapa chaynataq hatun munayniyuqkunapa contranpi; paykunaqa rimarqaku chay nacionkuna guerrawan, sasachakuywan hinaspa peste onqoykunawan ñakarichisqa kananmantam.

⁹Sichum mayqan profetapas hawkayaymanta willakunqa, hinaptin chay rimasqan cumplikuruptinqa cheqaptapunim yachanqaku chay profetaqa Tayta Diospa kachamusqan kasqanta, nispa.

¹⁰Chaymi profeta Hananías, Jeremiaspa matankanmanta yugota hurqoruspan pakiparurqa,

¹¹hinaspam llapallan runakunapa qayllanpi nirqa: Tayta Diosmi kaynata nin: Kaymanta iskay watamanmi, Babilonia nacionpi rey Nabucodonosorpa yugonta, llapallan nacionkunapa kunkanmanta pakisaq, nispa. Chaymi profeta Jeremías pasakurqa.

¹²Jeremiaspa matankanmanta yugota Hananías hurqoruspan pakiparusqanpa tumpa unayllanmantam Jeremiasta Tayta Dios nirqa:

¹³Ñoqa Tayta Diospa nisqayta Hananiasman kaynata nimuy: Kaspimanta pakipasqayki yugopa rantinpim fierromanta yugotaña ruwaruni.

¹⁴Ñoqa Israelpa yupaychasqan Tukuy Atiyniyuq Tayta Diosmi nini: Llapallan nacionkunapa kunkanmanmi fierromanta yugota watani, Babilonia nacionpa reynin Nabucodonosortaña servichinaypaq. Purun animalkunatapas paymanmi qoykuni munaychakunanpaq, nispa.

¹⁵Hinaptinmi Hananiasta profeta Jeremías nirqa: ¡Yaw Hananías, uyariway! Tayta Dios mana kamachimusuchkaptikim kay runakunata llulla rimaynikikunapi hapipachichkanki.

¹⁶Chayraykum Tayta Dios kaynata nisunki: Kay pachamantam chinkarachisqayki. Runakunata umachaspa ñoqapa contraypi hatarichisqaykimantam kunan wata wañunki, nispa.

¹⁷Hinaptinmi Hananiasqa chay watapa qanchis kaq killanpi wañururqa.