Read Biblia Revisión Chuya Qellqa 1992 – Chuya Qellqa 1992 Jeremías 34 Bible Online

Jeremías 34 - Biblia Revisión Chuya Qellqa 1992 – Chuya Qellqa 1992 bible

Jeremías 34

¹Babilonia nacionpa reynin Nabucodonosor llapa tropankunawan chaynataq munaychakusqan nacionkunamanta kaq llapallan runakunawan, Jerusalén llaqtapa contranpi chaynataq muyuriqninpi kaq llaqtakunapa contranpi peleachkaptinmi, Jeremiasta Tayta Dios nirqa:

²Ñoqa Israelpa yupaychasqan Tayta Diospa nisqayta Judá nacionpa reynin Sedequiasman kaynata nimuy: Kay llaqtatam Babilonia nacionpa reyninman qoykusaq, paymi kañaykunqa.

³Makinmantaqa qampas manam lluptinkichu, aswanqa hapirachikuspam payman qosqa kanki. Qayllanman pusasqa kaspam Babiloniaman preso apasqa kanki.

⁴Chaywanpas Judá nacionpa reynin Sedequías, ñoqa Tayta Diospa nisqayta uyariy: Qamqa manam guerrapichu wañunki.

⁵Hawkallam wañukunki. Imaynam ñawpaq taytaykikunata pampaspa inciensota kañapurqaku, chaynam qampaqpas inciensota kañanqaku. Qanmanta waqaspankum ninqaku: “Ay señorllayku” nispanku. Ñoqa Tayta Diosmi chaynata nini.

⁶Tukuy chaykunatam Judá nacionpa reynin Sedequiasman profeta Jeremías Jerusalén llaqtapi willarqa.

⁷Babilonia reypa tropankunañataqmi Jerusalén llaqtapa hinaspa Judá lawpi puchuq llaqtakunapa contranpi peleachkarqa. Chay llaqtakunam karqa Laquis hinaspa Azeca. Judá nacionpi murallasqa llaqtakunamantam chay iskay llaqtakunallaña puchururqa.

⁸Rey Sedequiaswan Jerusalenpi yachaqkuna, esclavonkuta libretaña kacharinankupaq contrato ruwasqankupa qepallantam, Jeremiasta Tayta Dios rimapayarqa.

⁹Chay contratopim sapakama prometekurqaku, hina judiomasinkumanta kaq esclavonkuta qaritapas warmitapas libretaña kacharinankupaq, chaynapi judiomasinwanqa manaña pipas servichikunanpaq.

¹⁰Chay contratoman hinam llapa kamachikuqkunawan llapallan runakunapas, sapakama esclavonkuta qaritapas warmitapas libretaña kachaykurqaku, hinaspam manaña servichikurqakuchu.

¹¹Ichaqa kachaykusqankupa qepallantam pesakurqaku, hinaspankum kaqllamanta esclavonkupaq hapispanku servichikurqaku.

¹²Chayraykum Jeremiasta Tayta Dios nirqa:

¹³Ñoqa Israelpa yupaychasqan Tayta Diosmi kaynata nini: Ñawpaq taytaykichikkunata Egipto nacionpi esclavo kachkaptinku hurqomuspaymi, paykunawan pactota ruwarqani. Hinaspaymi kamachirqani:

¹⁴Sapa qanchis watamantam castaykichikmanta kaq criadoykichiktaqa kacharinkichik. Servisunaykichikpaq kikinkumanta rantikususpaykichikqa soqta watallatam servisunkichik, nispay. Ñawpaq taytaykichikkunam ichaqa mana kasuwarqakuchu nitaqmi uyariwarqakupaschu.

¹⁵Qamkunam ichaqa ñoqaman kutirikamuspa munasqayman hina allinta ruwarqankichik, castamasikichikmanta kaq esclavoykichikkunata libretaña kachaykuspaykichik. Chaynata ruwanaykichikpaqmi sapaqchasqa temploypi hinaspa ñoqapa qayllaypi contratota ruwarqankichik.

¹⁶Ichaqa qepaman kutirispam sutiyta yanqacharunkichik, hinaspam libretaña kacharisqaykichik esclavokunata kaqmanta hapimuspa, qariwanpas warmiwanpas kaqmanta servichikuchkankichik.

¹⁷Chayraykum ñoqa Tayta Dios kaynata nini: Qamkunaqa aylluykichikkunata libretaña mana kacharispam mana kasuwarqankichikchu, chayraykum ñoqapas qamkunapa contraykichikpi guerrata, peste onqoyta hinaspa yarqayta kacharimusaq, kay pachapi nacionkunapas manchakuymanta katkatatanankama.

¹⁸Judá nacionpi chaynataq Jerusalén llaqtapi kamachikuqkunam, palaciopi serviqninkunawan, llapa sacerdotekunawan hinaspa llapallan runakunawan kuska huk contratota qayllaypi ruwarqaku.

¹⁹Malta torota nakaruspankum iskayman parteruspanku chawpinta pasarurqaku, ichaqa chayllam chay contrato ruwasqankuta yanqacharurqaku.

²⁰Chayraykum paykunataqa enemigonkumanña qoykusaq wañuchisqa kanankupaq. Ayankutapas alton pawaq animalkunawan purun animalkunam mikunqa.

²¹Judá nacionpa reynin Sedequiastawan yanapaqnin kamachikuqkunatapas, enemigonkunamanwan Babilonia nacionpi reypa tropankunamanñam qoykusaq. Chay tropakunaqa ñam qamkunamanta suchukuspa kutikurqakuña.

²²Ichaqa paykunata kamachiptiymi kaqmanta kutimuspa kay llaqtata atacanqaku, hinaspam munaychakuruspanku kañaykunqaku. Judá nacionpi llaqtakunatapas manaña runayuq kanankamam purmachisaq. Ñoqa Tayta Diosmi chaynata nini.