Read Biblia Revisión Chuya Qellqa 1992 – Chuya Qellqa 1992 Jeremías 35 Bible Online

Jeremías 35 - Biblia Revisión Chuya Qellqa 1992 – Chuya Qellqa 1992 bible

Jeremías 35

¹Josiaspa churin Judá nacionpa reynin Joacim munaychakuchkaptinmi, Jeremiasta rimapayaspan Tayta Dios nirqa:

²Recabpa mirayninkunaman rispayki paykunawan rimamuy. Templopi kaq hukkaqnin cuartonman pusaykuspa paykunaman vinota convidamuy, nispa.

³Chaymi Jeremiaspa churin Jaazaniastawan wawqenkunata chaynataq Recabpa llapallan mirayninkunata pusamuq rirqani. Jeremiasqa karqa Habasiniaspa churinmi.

⁴Paykunatam temploman pusaruspay, Hananpa churin Igdaliaspa cuartonman pusaykurqani. Igdaliasqa karqa Tayta Diospa runanmi. Chay cuartom tarikurqa templopi kamachikuqkunapa cuartonpa waqtanpi hinaspa Salumpa churin Maasiaspa cuartonpa altonpi. Maasiasqa karqa templopa punkunwan cuentallikuqmi.

⁵Chaymi jarrakunapi hinaspa vasokunapi vinota apaspay Recabpa mirayninkunata nirqani: Vinota tomaykuychik, nispa.

⁶Paykunam ichaqa niwarqaku: Manam tomaymankuchu. Recabpa churin taytayku Jonadabmi kaynata kamachiwarqaku: “Vinotaqa amam wiñaypaq tomankichikchu qamkunapas nitaq miraynikichikpas.

⁷Wasitapas amam ruwankichikchu, amam chakrakunapipas tarpunkichikchu, amataqmi uvastapas plantankichikchu; aswanqa kawsanaykichikkamam carpallapi yachankichik, chaynapi huklaw llaqtayuq hina kay yachasqaykichik allpapi unay watakuna kawsanaykichikpaq”, nispa.

⁸Chaynapim Recabpa churin taytayku Jonadabpa kamachiwasqankuta kasukuspayku, vinotaqa manam tomanikuchu ñoqaykupas, warmiykupas chaynataq churiykupas.

⁹Yachanaykupaq wasitaqa manam ruwakunikuchu, uvas huertaykupas nitaq tarpuna chakraykupas manam kapuwankuchu.

¹⁰Taytayku Jonadabpa kamachiwasqankuta kasukuspaykum carpakunallapi yachaniku.

¹¹Ichaqa Babilonia nacionpa reynin Nabucodonosor kay nacionpa contranpi hamuruptinmi ninakurqaniku: Caldea tropakunamanta chaynataq Siria tropakunamanta lluptikunanchikpaq Jerusalén llaqtaman ayqekusun, nispayku. Chayraykum kay Jerusalén llaqtapi yachachkaniku, nispanku.

¹²Hinaptinmi Jeremiasta Tayta Dios nirqa:

¹³Israelpa yupaychasqan Tukuy Atiyniyuq Tayta Diosmi kaynata nini: Judá nacionpi runakunamanwan Jerusalén llaqtapi yachaqkunaman ñoqa Tayta Diospa nisqayta kaynata nimuy: Qamkunaqa nisqaykunata mana kasukuspam corregikuyta mana munankichikchu.

¹⁴Recabpa churin Jonadabpa mirayninkunam, vinota ama tomanankupaq kamachisqanta cumplirunku. Chayraykum vinotaqa kunan punchawkamapas mana tomankuchu. Ñoqapas mana samaykuspaymi ñataq-ñataq kamachirqaykichik, ichaqa manam kasuwarqankichikchu.

¹⁵Mana samaykuspam profetaykunawan kaynata willachirqaykichik: Mana allinkuna ruwasqaykichikta saqespa munasqayman hina kawsaychik. Idolokunataqa amaña yupaychaychikchu, chaynapi taytaykichikkunamanpas chaynataq qamkunamanpas qosqay allpapi yachanaykichikpaq, nispay. Ichaqa manam uyariwarqankichikchu nitaqmi kasuwarqankichikchu.

¹⁶Recabpa churin Jonadabpa mirayninkunam ichaqa taytankupa kamachisqanta kasukurqaku. Israel llaqtam ichaqa mana kasuwarqachu.

¹⁷Chayraykum Israelpa yupaychasqan Tukuy Atiyniyuq Tayta Dios kaynata nini: Judá nacionpa chaynataq Jerusalén llaqtapi yachaqkunapa contranpi sasachakuykuna rimasqaytam paykunaman kacharimusaq. Qamkunaqa rimapayaptiypas manam kasuwarqankichikchu, qayaptiypas manataqmi contestawarqankichikchu, nispa.

¹⁸Recabpa mirayninkunatam Jeremías nirqa: Israelpa yupaychasqan Tukuy Atiyniyuq Tayta Diosmi kaynata nin: Taytaykichik Jonadabpa kamachisusqaykichikta kasukuspa ruwasqaykichikraykum,

¹⁹Recabpa churin Jonadabpa mirayninmantaqa kanqapunim ñoqata serviwaqniykunaqa. Ñoqa Tukuy Atiyniyuq Tayta Diosmi chaynata nini.