Read Biblia Revisión Chuya Qellqa 1992 – Chuya Qellqa 1992 Jeremías 4 Bible Online

Jeremías 4 - Biblia Revisión Chuya Qellqa 1992 – Chuya Qellqa 1992 bible

Jeremías 4

¹Tayta Diosmi kaynata nin: Israelpa mirayninkuna, kutirikamuyta munaspaqa ñoqamanmi kutirikamunaykichik. Sichum qayllaymanta millakuypaq idolokunata wischuspa ñoqamanta mana sapaqchakuspaqa,

²atinkim ñoqapa sutiypi jurayta, jurankiqa cheqap kaqwan, allin arreglowan hinaspa allin ruwaywanmi. Chaynapim llapa nacionkuna sutiyrayku bendecisqa kanqaku.

³Judá nacionpiwan Jerusalén llaqtapi runakunatam Tayta Dios kaynata nin: Samaq chakrakunata yapuspa tarpuychik, ama kichkakuna ukunpiqa tarpuychikchu.

⁴Judá nacionpi Jerusalén llaqtapi runakuna, ñoqa Tayta Diospaq señalakuychik, sonqoykichikpi pacto ruwasqay marcata señalakuychik; yanqañataq mana allinkuna ruwasqaykichikmanta piñakuyniy nina hina ratarirunman, mana pipapas amachay atinankama.

⁵Judá nacionpiwan Jerusalén llaqtapi kaqkunaman willamuychik, trompetata tocaspa lliw nacionpi kallpawan kaynata qaparimuychik: ¡Hamuychik, murallasqa llaqtakunaman huñunakusunchik! nispaykichik.

⁶¡Sión llaqtapi banderata hoqariychik, maypim pakakunaykichikta utqayman maskaychik! Norte lawmantam hatun sasachakuytawan ñakariyta apamusaq.

⁷Leonmi machayninmanta lloqsiramunña, nacionkuna purmachiqmi hamuchkanña; nacionnikichikta chinkachinanpaqmi lloqsiramunña, llaqtaykikunata purmachinanpaqmi lloqsiramunña, mana runayuqtaña saqenanpaqmi lloqsiramunña.

⁸Chaynaqa, qachqa pachawan pachakuychik, nanaymanta qaparkachaspa waqaychik, Tayta Diospa piñakuyninqa manam qamkunamanta asurinchu.

⁹Tayta Diosmi kaynata nin: Chay punchaw chayamuptinqa, reywan kamachikuqkunapas manchakuymantam katkatatanqaku, sacerdotekunapas mancharisqallañam kanqaku, profetakunapas lliwmi hukmanyanqaku.

¹⁰Chaymi nirqani: ¡Ay, Dios Taytalláy! ¡Imaynamá kay naciontawan Jerusalén llaqtataqa engañarunki! Hawkayaytam prometerqanki, ichaqa cuchillom kunkankupiña kachkan, nispay.

¹¹Chay tiempopim kay llaqtatawan Jerusalenta ninqa: Chunniqpi orqokunamantam rupaq wayra runaykunapa kasqanman pukumuchkan, ichaqa manam pajanmanta trigota limpianapaq wayrachu.

¹²Chay wayramantapas aswan nisyu wayrataraqmi pukuchimusaq, kunanmi paykunapa contranpi sentenciaykunata rimarisaq.

¹³Qawariychik, enemigoykichikmi puyu hinaña hamuchkan, guerrapaq carretankupas sinchi wayra hinaraqmi hamuchkan, caballonkupas ankamantapas mastaraqmi pawamuchkan. ¡Ay ñoqanchikya, imaynaraq kasunchik!

¹⁴Jerusalén llaqtapi runakuna, sonqoykichikpi huchata mayllakuychik chaynapi salvakunaykichikpaq. ¿Haykapikamataq chay mana allin yuyaymanaykunawan intuchikunkichik?

¹⁵Dan lawmantam, Efraín orqokunamantam, manchakuypaq willakuykuna uyarikamuchkan.

¹⁶Nacionkunaman willamuychik, Jerusalén llaqtaman nimuychik: Llaqtakuna atacaqmi karu nacionmantaraq hamuchkanku, Judá nacionpi llaqtakunapa contranpim qaparichkanku.

¹⁷Chakra cuidaqkuna hinaraqmi Judá nacionta muyurunqaku, chaynataqa ruwanqaku contraypi hoqarikurusqankuraykum; ñoqa Tayta Diosmi chaynata nini.

¹⁸Mana allin kawsaynikiraykum, mana allin ruwaynikikunaraykum, kaykuna pasasunki; mana allinkuna ruwasqaykipa pagonmi kayqa, chayraykum sonqoykita pasaypaqta nanachisunki.

¹⁹¡Ay, sonqollaymi nanawachkan! ¡sonqollaymi nisyuta tukukuchkan! Manañam hawkayayta tarinichu, manam upallaymanchu. Trompetapa waqasqantam uyarichkani, guerrapaq qapariytam uyarichkani.

²⁰Sasachakuykuna pasakusqanmantam willakuykuna chayamuchkan, lliw nacionmi tuñichisqa kachkan. Qonqaymantam carpaykuna tuñichisqa rikurirun, carpaykunam llikipasqa rikurirun.

²¹¿Haykapikamataq banderata qawasaq? ¿Haykapikamataq trompeta waqaqta uyarisaq?

²²Tayta Diosmi kaynata nin: Llaqtayqa mana yachayniyuqmi, manam reqsiwankuchu; paykunaqa mana yachayniyuq churikunam, paykunaqa mana yuyaymanayniyuq runakunam; mana allin ruwaypaqmi ichaqa yachaysapallaña, allin ruwaytam ichaqa mana yachankuchu.

²³Kay pachata qawariptiymi manaña imayuq chaqwa kachkasqa; cielokunata qawariptiymi achkipas manaña kasqachu.

²⁴Orqokunata qawariptiymi katkatatachkasqaku, qawariptiymi moqokunapas kuyuchkasqaku.

²⁵Qawariptiymi runakunapas manaña kasqañachu. Alton pawaq animalkunapas lliwmi lluptikusqaku.

²⁶Qawariptiymi tukuy imapa wiñanan allpapas chunnichkasqaña, llaqtakunapas lliwmi purmachkasqaña. Tayta Diospa manchakuypaq piñakuyninmi tukuy chaykunata ruwarusqa.

²⁷Tayta Diosmi kaynata nin: Lliw naciontam tuñichisaq, ichaqa manam pasaypaqtachu chinkachisaq.

²⁸Chaynapim kay pachapas llakipi tarikunqa, cielokunapas tutayanqa. Rimasqaymantaqa manam pesakusaqchu, ruwanaypaq tanteasqaymantaqa manam qepaman kutisaqchu.

²⁹Silladakunapa qapariyninwanmi, flechaqkunapa qapariyninwanmi, llaqta runakuna lluptikunku; Montekunamanmi yaykunku, qaqakunamanmi qespinku. Llaqtakunam manaña runayuq qeparun, chaypiqa manañam pipas yachanñachu.

³⁰Yaw, tuñichisqa llaqta: ¿Imapaqñataq guindo pachawanraq pachakunki? ¿Imapaqñataq qorimanta alhajakunawanraq churakunki? ¿Imapaqñataq ñawikikunatapas yanawanraq pintakunki? Yanqapaqñam allichapakunkipas, kuyaqnikikunapas qepanchakurusunkiñam, wañunaykitañam maskachkanku.

³¹Nanaywan qapariytam uyarini, chayllaraq wachakuq warmipa nanaywan qapariyninta hina; Sión llaqtapa wawanmi qaparichkan, manañam samatyaytapas atinñachu, makinkunata hoqarispanmi kaynata nichkan: ¡Ay, imallapiraq rikukuni! ¡Wañuchiwaqniykunapa makinpiñam tarikuni! nispa.