Read Biblia Revisión Chuya Qellqa 1992 – Chuya Qellqa 1992 Jeremías 41 Bible Online

Jeremías 41 - Biblia Revisión Chuya Qellqa 1992 – Chuya Qellqa 1992 bible

Jeremías 41

¹Qanchis kaq killapim Elisamapa willkan otaq Netaniaspa churin Ismael chunka runakunapiwan rirqa, Mizpa llaqtapi yachaq Ahicampa churin Gedaliasman. Ismaelqa karqa reypa mirayninmanta kaqmi hinaspa reypa tropankunapa capitanninmi. Chaypi kuskanku mikuchkaptinkum,

²Netaniaspa churin Ismaelqa qonqaymanta hatarispan chunkantin runankunawan, Safanpa willkan otaq Ahicampa churin Gedaliasta espadawan wañurachirqa. Chaynatam Babilonia nacionpi reypa churasqan kamachikuqta wañurachirqaku.

³Wañurachirqakutaqmi Gedaliaswan kaq Judá runakunatapas hinaspa chaypi tarikuq Caldea soldadokunatapas.

⁴Gedaliasta wañurachisqankupa paqarinnintintam chaynataq imam pasakurusqanta manaraq pipas yacharuchkaptinmi,

⁵Siquemmanta, Silomanta hinaspa Samariamanta pusaq chunka runakuna chayaramurqaku, barbankupas rutukusqa, pachankupas llikipasqa chaynataq cuerponkupas kuchupasqa. Paykunam apamurqaku kawsaykunatawan inciensota Tayta Diospa templonpi ofrecenankupaq.

⁶Mizpa llaqtaman chayaykuchkaptinkum, Netaniaspa churin Ismael paykunaman waqastin taripaykurqa, hinaspam kaynata nirqa: Ahicampa churin Gedaliaspa qayllanman yaykuychik, nispa.

⁷Llaqtaman yaykuruptinkum Netaniaspa churin Ismaelqa runankunapiwan paykunata wañurachispa pozoman wischuykurqaku.

⁸Ichaqa paykunamantam chunka runakuna, Ismaelta mañakuspa nirqaku: Amayá wañurachiwaykuchu. Ñoqaykupam kachkan chakrapi pakasqa achkallaña trigoyku, cebadayku, aceiteyku hinaspa mielniykupas, nispanku. Chayraykum paykunataqa mana wañuchirqachu riqmasinkunatawan kuskataqa.

⁹Ismaelmi Gedaliastawan kuskata wañuchisqan runakunapa ayankunata huk pozoman wischuykurqa. Chay pozotam rey Asa ruwachirqa, Israel nacionpa reynin Baasamanta defiendekunanpaq. Chay pozotam Netaniaspa churin Ismael ayakunawan huntarachirqa.

¹⁰Chaymantam Mizpa llaqtapi puchuq runakunatawan reypa warmi churinkunata hinaspa reyta waqaychaq soldadokunapa capitannin Nabuzaradanpa saqesqankunatapas presocharurqa, paykunatam Ahicampa churin Gedalías nanachikurqa. Chay runakunata pusarikuspanmi Netaniaspa churin Ismaelqa Amonpa mirayninkunapa allpanman pasakurqa.

¹¹Careapa churin Johananmi tropakunapa capitanninkunapiwan Netaniaspa churin Ismaelpa tukuy mana allinkuna ruwasqanta yacharurqaku.

¹²Hinaspam llapa tropankunata huñuruspanku Ismaelpa contranpi peleanankupaq lloqsirqaku, hinaspam hayparurqaku Gabaón llaqtapi kaq hatun estanquepa hichpanpi.

¹³Hinaptinmi Ismaelpa preso apasqan runakuna, Careapa churin Johanantawan tropakunapa capitanninkunata rikuruspa kusikurqaku,

¹⁴chaymi kutirimuspanku Careapa churin Johananman hukllawakururqaku.

¹⁵Netaniaspa churin Ismaelñataqmi pusaq runankunapiwan lluptispanku, Amón allpanman ripukurqaku.

¹⁶Ahicampa churin Gedaliasta wañurachispan Mizpa llaqtamanta Ismaelpa preso apasqan runakunatawan, puchuq soldadokunata, warmikunata, warmakunata hinaspa reypa palacionpi servikuqkunatam, Careapa churin Johanán tropakunapa capitanninkunapiwan Gabaón llaqtaman kutichirqaku.

¹⁷Chaymantam pasarqaku Belén llaqtapa hichpanpi kaq Gerut-quimam lawkama, hinaspam chaypi samarurqaku. Paykunam tantearqa Egipto nacionman lluptikuyta.

¹⁸Chaynataqa tantearqaku Ahicampa churin Gedaliasta Netaniaspa churin Ismael wañurachisqanmanta Caldea runakunata manchakusqankuraykum. Gedaliastaqa Babilonia nacionpa reyninmi gobernador kananpaq churarqa.