Read Biblia Revisión Chuya Qellqa 1992 – Chuya Qellqa 1992 Jeremías 42 Bible Online

Jeremías 42 - Biblia Revisión Chuya Qellqa 1992 – Chuya Qellqa 1992 bible

Jeremías 42

¹Careapa churin Johananmi tropakunapa capitanninkunawan, Osaiaspa churin Jezaniaswan chaynataq hatunpas taksapas llapallan runakunapiwan

²profeta Jeremiasman asuykuspanku nirqaku: Mañakuykikum llapallan kaypi puchuqkunapaq yupaychasqayki Tayta Diosta mañakunaykipaq. Rikuwasqaykikupi hinapas achkamantam ñoqallaykuña puchuruniku.

³Yupaychasqayki Tayta Diosyá niykuwachunku maymanmi rinaykutapas chaynataq imam ruwanaykutapas, nispanku.

⁴Chaymi profeta Jeremías nirqa: Allinmi. Mañawasqaykichikman hinam yupaychasqanchik Tayta Diosta mañakusaq, hinaspaymi imam niwasqanta mana pakaspay willasqaykichik, nispa.

⁵Chaymi paykuna nirqaku: Yupaychasqanchik Tayta Diosyá kachun contraykupi cheqap testigo tukuy imapas qamnintakama niwasqankuta mana ruwaptiykuqa.

⁶Allinniykupaq otaq mana allinniykupaq kaptinpas qamnintakama yupaychasqanchik Tayta Diospa niwasqankutam kasukusaqku, chaynapi allin kanaykupaq, nispanku.

⁷Chunka punchaw pasaruptinmi Jeremiasta Tayta Dios rimapayarqa.

⁸Chaymi Jeremiasqa, Careapa churin Johananta, tropankunapa capitanninkunata chaynataq hatunpas taksapas llapallan runakunata qayachirqa.

⁹Hinaspam paykunata nirqa: Mañakuwasqaykichikman hina ruegakuptiymi Israelpa yupaychasqan Tayta Dios kaynata nin:

¹⁰“Kay allpamanta mana lloqsiptikichikqa wasita hina hatarichispaymi mana tuñichisqaykichikchu, plantata hina plantaspaymi mana pelasqaykichikchu. Contraykichikpi castigokuna kachamusqaymantam llakisqa kachkani.

¹¹Ñoqa Tayta Diosmi kaynata nini: Manchachisuqnikichik Babilonia nacionpa reynintaqa ama manchakuychikchu. Ñoqam qamkunawan kachkani salvanaypaq hinaspa paymanta libranaypaq.

¹²Qamkunamantam llakipayarikusaq, chaynataqmi Nabucodonosorpas llakipayasunkichik, hinaspam allpaykichikman kutichimusunkichik, nispa.

¹³Sichum yupaychasqanchik Tayta Diospa nisqanta mana kasukuspa kay allpapi mana yachanaykichikrayku ninkichik:

¹⁴“Manam kay allpapiqa yachaymankuchu, aswanqa Egiptomanmi risaqku. Chaypiqa manañam guerrata rikusaqkuchu, guerrapaq trompetapa waqasqantapas manañam uyarisaqkuchu, nitaqmi yarqaymantapas ñakarisaqkuñachu”, nispaykichik,

¹⁵, hinaptinqa Judá nacionpi puchuqkuna, Israelpa yupaychasqan Tukuy Atiyniyuq Tayta Diospa nisqanta uyariychik: “Sichum Egiptoman rinaykichikpaq atipakunkichik hinaptinqa

¹⁶manchakusqaykichik guerrawan chaynataq yarqaywanmi Egipto nacionpi hayparamususpaykichik wañuchisunkichik.

¹⁷Egiptoman rinankupaq atipakuqkunaqa, chaypim guerrawan, yarqaywan hinaspa peste onqoywan wañumunkichik. Manam hukllapas puchunkichikchu, nitaqmi castigo kachamusqaymantaqa mayqannikichikpas lluptinkichikchu.

¹⁸Israelpa yupaychasqan Tukuy Atiyniyuq Tayta Diosmi kaynata nin: Imaynam Jerusalenpi yachaqkunata piñakuyniypi ruwasqayta hinam, qamkunatapas Egiptoman yaykuptikichikqa piñakuyniywan ruwasqaykichik. Hinaptinmi ñakasqa, kamisqa, insultasqa hinaspa penqayman churasqa kankichik, manañam allpaykichikmanpas kutimunkichikñachu, nispa.

¹⁹Judá nacionpi puchuqkuna, Tayta Diosmi nisunkichik Egiptoman ama rinaykichikpaq. Chaynaqa, yachankichikñam imam pasasunaykichiktapas.

²⁰Qamkunaqa kikillaykichikmi pantachkankichik. Kikikichikmi mañawarqankichik: “Yupaychasqanchik Tayta Diosta ñoqaykupaq mañakuy hinaspa imam nisqanta ruwanaykupaq willawayku”, nispaqa.

²¹Yupaychasqanchik Tayta Diospa nimuwasqanta kunan qamkunaman willaptiypas manam kasukunkichikchu.

²²Chaynaqa, cheqaptapunim kunan nikichik: Yachanaykichikpaq risqaykichik nacionpim, guerrawan, yarqaywan hinaspa peste onqoywan wañumunkichik, nispa.