Read Biblia Revisión Chuya Qellqa 1992 – Chuya Qellqa 1992 Jeremías 44 Bible Online

Jeremías 44 - Biblia Revisión Chuya Qellqa 1992 – Chuya Qellqa 1992 bible

Jeremías 44

¹Egipto nacionpi kaq Migdol llaqtapi, Tafnes llaqtapi, Menfis llaqtapi hinaspa Patros lawpi yachaq Judá runakunapaqmi Jeremiasta Tayta Dios nirqa:

²Israelpa yupaychasqan Tukuy Atiyniyuq Tayta Diosmi nin: Jerusalén llaqtamanwan Judá nacionpi wakin llaqtakunamanpas castigo kacharisqaytaqa yachankichikmi. Chay llaqtakunaqa tuñichisqa kaspam kunanpuni manaña runayuq kachkanku.

³Chaynaqa, kachkanku mana allinkunata ruwasqankuraykum. Paykunam tukuy rikchaq idolokunata yupaychaspanku, inciensota kañapuspanku ñoqata piñachiwarqaku. Chay idolokunataqa manam paykunapas, qamkunapas nitaq ñawpaq taytaykichikkunapas reqsirqankichikchu.

⁴Serviqniy profetakunata kachamuspaymi ñataq-ñataq willachirqaykichik, ñoqapa cheqnisqay chaynataq millakusqay kaqkunata ama ruwanaykichikpaq.

⁵Ichaqa manam kasuwarqankichikchu nitaqmi uyariwarqankichikchu, ñoqaman kutirikamunaykichik kachkaptinpas, aswanraqmi mana reqsisqaykichik idolokunamanraq inciensota kañapurqankichik.

⁶Chayraykum Judá nacionpi llaqtakunapa contranpi hinaspa Jerusalenpa callenkunapa contranpi ancha piñakuyniy nina hinaraq ruparirqa. Chaykunaqa hinallam tuñisqa kaspa chunnichkan kunankamapas.

⁷Chaynaqa, ñoqa Tukuy Atiyniyuq Tayta Diosmi nini: ¿Imanasqataq kay hatun mana allinkunata contraykichikpi ruwarunkichik? ¿Judá nacionniyuq qarikunapas, warmikunapas, warmakunapas hinaspa ñuñuq wawachakunapas pasaypaq tukurunantachu munachkankichik?

⁸¿Imanasqataq kay yachasqaykichik Egipto nacionpi kikikichikpa ruwakusqaykichik idolokunaman inciensota kañapuspaykichik piñachiwachkankichik? Chaykuna ruwasqaykichikwanqa kikillaykichikmi tukusqa kankichik, hinaspam llapa nacionkunapa ñakasqan chaynataq burlakusqan kankichik.

⁹¿Qonqarunkichikñachu taytaykichikkunapa, Judá nacionpi reykunapa, reypa warminkunapa, qamkunapapas hinaspa warmikichikkunapas, Judá nacionpi chaynataq Jerusalén llaqtapa callenkunapi tukuy mana allin ruwasqaykichikta?

¹⁰Mana allinkuna ruwasqaykichikmantaqa kunankamapas manam wanakunkichikraqchu, nitaqmi manchakunkichikpaschu; kawsankichikpas manam taytaykichikkunaman chaynataq qamkunaman qosqay kamachikuyniykunaman hinaspa yachachikuyniykunaman hinachu.

¹¹Chayraykum Israelpa yupaychasqan Tukuy Atiyniyuq Tayta Dios kaynata nin: Qamkunapa contraykichikpi castigokunata kachaykamuspaymi Judá runakunata tukurusaq.

¹²Judá nacionpi qeparuspa kay Egipto nacionman yachanaykichikpaq hamuqkunapas, kay Egipto nacionpim llapallaykichik tukusqa kankichik. Llapallaykichikmi uchuy-hatun guerrawan, yarqaywan wañunkichik, hinaspam runakunapa ñakasqan, insultasqan hinaspa penqayman churasqan kankichik.

¹³Jerusalenpi yachaqkunata guerrawan, yarqaywan hinaspa peste onqoywan castigasqayta hinam, kay Egipto nacionpi yachaqkunatapas castigasaq.

¹⁴Judá nacionpi puchuspa Egiptoman yachanankupaq ayqemuqkunamantaqa manam hukllapas lluptinkichikchu nitaqmi kawsankichikchu. Judá nacionman maynataña kutiyta munaspapas manam atinkichikchu, kutispaqa-kutinqa kaymanta lluptiqkunallañam, nispa.

¹⁵Hinaptinmi warminkupa idolokunaman incienso kañasqankuta yachaq qarikunapas, chaypi tarikuq warmikunapas, chayman huñunakamuqkunapas chaynataq Egipto nacionpi Patros lawpi yachaqkunapas, Jeremiasta kaynata nirqaku:

¹⁶Tayta Diospa sutinpi willawasqaykiku palabrakunataqa manam kasukusaqkuchu.

¹⁷Aswanqa munasqaykuman hinam ruwasaqku. Ñoqaykuqa hinallam cielopi reinaman inciensota kañaspa vinota tallipusaqku. Kunankama ruwasqaykuta hinallam ruwasaqku. Ñoqaykuqa ñawpaq taytaykupa, reyniykupa chaynataq kamachiqniykupa, Judá nacionpi kaq llaqtankunapi chaynataq Jerusalén llaqtapa plazankunapi ruwasqaykuta hinam ruwasaqku. Chaynata ruwaptiykuqa mikunaykupas achkallañam karqa, hawkam kawsakurqanikupas, manataqmi ima sasachakuypas hamuwarqakuchu.

¹⁸Cielopi reinaman inciensotawan vinota manaña ofreceptiykuqa tukuy imam pisiwanku, ñoqaykupas guerrawan hinaspa yarqaywanmi wañuchkaniku, nispanku.

¹⁹Warmikunapas nirqakutaqmi: Ñoqaykupas tortakunatam cielopi reinaman rikchakuqta ruwarqaniku, hinaspam inciensotawan vinota ofrecerqaniku. Chaykunataqa qosaykupa yachasqantam ruwarqaniku, chayraykum hinalla ruwakusaqku, nispanku.

²⁰Hinaptinmi llapallan uyariqninkunaman warmimanpas qarimanpas Jeremías kaynata nirqa:

²¹¿Yaqachum Tayta Dios qonqarun Judá nacionpi kaq llaqtakunapi chaynataq Jerusalén llaqtapa callenkunapi, qamkunapas, taytaykichikkunapas, reynikichikkunapas, kamachiqnikichikkunapas chaynataq llapallan runakunapas incienso kañasqaykichikta? ¿Qonqarusqanpaqchu hapinkichik?

²²Mana allinkuna ruwasqaykichiktawan millakuypaq ruwasqaykichiktam Tayta Diosqa manaña aguantayta atirqachu. Chayraykum nacionnikichikqa purmasqa manaña runayuq kunan punchawkama chunnichkan.

²³Tukuy rikchaq idolokunaman inciensota kañaspa Tayta Diospa contranpi huchallikuspa, yachachikuyninkunatapas, kamachikuyninkunatapas mana kasukusqaykichikraykum tukuy kay sasachakuykuna chayaramurusunkichik, chaynam kunankamapas kachkankichik, nispa.

²⁴Chaymantam llapa runakunatawan warmikunata Jeremías kaynata nirqa: Kay Egipto nacionpi yachaq Judá nacionniyuq runakuna,

²⁵Israelpa yupaychasqan Tukuy Atiyniyuq Tayta Diospa nisqanta uyariychik: Qamkunapas warmikichikpas imam nisqaykichikman hinam ruwachkankichik. Nichkankichiktaqmi: Cielopi reinamanmi prometekurqaniku inciensotawan vinota ofrecenaykupaq, chaytam cumplisaqku, nispaykichik. Chaynaqa, chay nisqaykichikman hinayá ruwaychik.

²⁶Chaynaqa, Egipto nacionpi yachaq Judá nacionniyuq runakuna, ñoqa Tayta Diosmi sutiyrayku juraspay kaynata nini: Kunanmantaqa manañam mayqannikichikpas kay Egipto nacionpiqa sutiyta rimaspa ninkichikñachu: “Israelpa yupaychasqan Tayta Diosraykum jurani”, nispaykichiqa.

²⁷Ichaqa chayllam kachkani sasachakuyta qamkunaman kacharimunaypaq, manañam yanapasqaykichikchu. Judamanta hamuspa Egiptopi yachaqkunam pasaypaq tukunaykichikkama guerrawan hinaspa yarqaywan wañunkichik.

²⁸Asllañam guerrapi wañunaykichikmanta lluptispa Egiptomanta Judá nacionman kutinkichik. Chaynapim Judá nacionmanta Egiptoman hamuqkuna yachanqaku, ñoqapa rimasqaychus icha qamkunapa nisqaykichikchus cumplikusqanta.

²⁹Ñoqa Tayta Diosmi kaynata nini: Contraykichikpi rimasqaykuna cumplikunantawan kay nacionpi qamkunata castiganayta yachanaykichikpaqmi huk señalta qosqaykichik:

³⁰Judá nacionpa reynin Sedequiasta wañuchinanpaq Babilonia nacionpa reynin Nabucodonosorman qoykusqayta hinam, Egipto nacionpa reynin Faraón Hofratapas wañuchinanpaq enemigonman qoykusaq. Ñoqa Tayta Diosmi chaynata nini.