Read Biblia Revisión Chuya Qellqa 1992 – Chuya Qellqa 1992 Jeremías 46 Bible Online

Jeremías 46 - Biblia Revisión Chuya Qellqa 1992 – Chuya Qellqa 1992 bible

Jeremías 46

¹Nacionkunapa contranpim profeta Jeremiasman Tayta Dios kaynata nirqa.

²Jeremiastam rimapayarqa Egipto nacionpa contranpi chaynataq Egiptopi rey Faraón Necaopa tropankunapa contranpi. Paymi Eufrates mayupa patanpi kaq Carquemis llaqtapi kachkarqa. Paytam Babilonia nacionpa reynin Nabucodonosor vencerurqa, Josiaspa churin Joacim tawa wataña Judá nacionpi munaychakuchkaptin. Tayta Diosmi kaynata nirqa:

³Escudokunatawan armakunata hapispa guerraman kallpaychik.

⁴¡Soldadokuna! caballoman monturata wataspa sillakuychik, cascoykichikta churakuspa filaman churakuychik, lanzaykichikta ñawchiyachiychik, qasqotawan wasata harkachikunaykichikta churakuychik

⁵Ichaqa ¿imatataq qawachkani? Manchakuymantam qepaman ayqemunku, soldadokunam vencerachikuspa cheqerunku, qepankutapas manaña qawarispam ayqekunku, manchakuyllañam tukuy hinastinpi kakuchkan. Ñoqa Tayta Diosmi chaynata nini.

⁶Maynaña kallpaqpas manam lluptiyta atinchu, allinnin qari-qari soldadopas manam ayqeyta atinchu, Eufrates mayupa norte lawninpim mitkarunku.

⁷¿Pitaq wakqa Nilo mayu hinaraq qespimuchkan? ¿Pitaq wakqa llimparichkaq mayu hinaraq kuyumuchkan?

⁸Egipto nacionmi Nilo mayu hinaraq llimparichkan, mayukuna hinaraqmi chukulyamuchkan. Egiptom kaynataraq nichkan: “Mayu hina llimparispaymi kay pachata pamparusaq, llaqtakunatam runankunatawan kuskata pasaypaqta chinkarachisaq”, nispa.

⁹¡Silladakuna kallpaychik! ¡Carretakuna loco hinaña pawaychik! ¡Allinnin qari-qari runakuna lloqsiychik! Etiopía nacionniyuq, Fut nacionniyuq soldadokuna escudonkuta hapichunku, Lud nacionniyuq soldadokuna flechananku arcota alistachunku.

¹⁰Tukuy Atiyniyuq Tayta Diospa punchawniymi chay punchawqa, chay punchawpim enemigonkunamanta vengakunqa. Espadam runakunata aminankama wañuchinqa, yawarninkuwanmi sinkanqa. Norte law nacionpim, Eufrates mayupa hichpanpim Tukuy Atiyniyuq Tayta Dios wañuchinqa.

¹¹Egipto runakuna, Galaad lawman hampi maskaq riychik. Yanqapaqñam hampikunatapas apamunkichik, qampaqqa manañam hampi kanchu.

¹²Lliw nacionkunam penqaypi kasqaykita yacharunku, qaparisqaykim lliw kay pachapi uyarikun; allinnin qari-qari runakunam chocanakunku, kuskankum pampanta kururakunku.

¹³Babilonia nacionpa reynin Nabucodonosor Egipto nacionta atacananpaq lloqsiramusqanpa qepallantam, profeta Jeremiasta Tayta Dios kaynata nirqa:

¹⁴Egiptopi willakamuychik. Migdol, Menfis hinaspa Tafnes llaqtakunaman kaynata nimuychik: ¡Puestoykichikpi listolla kaychik! ¡Espadam muyuriqnikichikpi wañuchichkan! nispaykichik.

¹⁵¿Imanasqataq Apis sutiyuq toroyki lluptirun? ¿Imanasqataq mana sayayta atirqachu? Ñoqa Tayta Diosmi paytaqa tuñirachini.

¹⁶Soldadoykikunam mitkarunku, hukninkum hukninkupa hawanman wichichkanku, kikinkupuram ninakunku: “Hatarispa llaqtanchikman ripukusun, nacesqanchik nacionman kutikusun, wañuchinakuymanta lluptikusun”, nispanku.

¹⁷Chaypim qaparichkanku: ¡Egiptopa reynin Faraonqa siminpa atipasqallanmi, manam ima ruwaytapas atinchu! nispanku.

¹⁸Ñoqam kawsaq reyqa kani, Tukuy Atiyniyuq Tayta Diosmi sutiypas, sutiyrayku juraspaymi kaynata nini: Imaynam Tabor orqo wakin orqokunata masyan, imaynam lamar qocha patanpi Carmelo hoqarikun, chaynam enemigoqa sutilla hamunqa.

¹⁹Egipto nacionniyuq runakuna, preso rinaykichikpaq qepikichikta alistakuychik. Menfis llaqtam chunnichisqa kanqa, manaña runayuq kanankamam purmanqa.

²⁰Egipto nacionqa kuyayllapaq vaquilla hinam, ichaqa norte lawmanta hamuq tankayllum kachurunqa.

²¹Pagasqa soldadokunapas wirayachisqa torokuna hinam kachkanku, ichaqa enemigonkuta mana aguantaspam lluptikunqaku, sasachakuypi kananku punchawmi chayaramun, castigasqa kananku punchawmi chayaramun.

²²Egipto runakunaqa, llapa enemigonkuna hamuruspa yantachkaq hinaraq hachakunawan atacaptinkum, maqta uru hinaraq silbakustin lluptinqaku.

²³Ñoqa Tayta Diosmi kaynata nini: Manaña yaykuy atina montenkunatam kuchuparunqaku. Paykunaqa aqaruway urukuna hina manaña yupay atinam karqaku.

²⁴Egipto nacionmi penqayman churasqa kanqa, Norte lawpi nacionman entregasqam kanqa, nispa.

²⁵Israelpa yupaychasqan Tukuy Atiyniyuq Tayta Diosmi kaynata nin: Tebas llaqtapa Amón sutiyuq idolontam castigasaq, Egipto naciontam idolonkunatawan hinaspa reyninkunatawan kuskata castigasaq, Faraontapas payman hapipakuqkunatawan kuskatam castigasaq.

²⁶Ñoqa Tayta Diosmi nini: Ñoqam qoykusaq wañuchiy munaqnin enemigonkunaman otaq Babilonia nacionpa reynin Nabucodonosorman chaynataq serviqninkunaman. Chaywanpas Egipto nacionqa ñawpaq tiempokunapi hinaraqmi runakunapa huntasqan kanqa. Ñoqa Tayta Diosmi chaynata nini.

²⁷Serviqniy Jacob, qamqa amayá manchakuychu. Qamtaqa miraynikikunatawan kuskatam karu nacionkunamanta libramusqayki, preso risqayki nacionkunamantam libramusqayki, hinaptinmi hawkalla kawsakunki, manañam pipas manchachisunkiñachu.

²⁸Ñoqa Tayta Diosmi kaynata nini: Serviqniy Jacob, ñoqam qanwan kachkani, ama manchakuychu. Cheqerachiptiy chayasqayki nacionkunatam pasaypaqta chinkarachisaq, qamtam ichaqa mana chinkachisqaykichu, huchaykiman hinam castigasqayki, castiganaymantaqa manam lluptinkichu nispa.