Read Biblia Revisión Chuya Qellqa 1992 – Chuya Qellqa 1992 Jeremías 48 Bible Online

Jeremías 48 - Biblia Revisión Chuya Qellqa 1992 – Chuya Qellqa 1992 bible

Jeremías 48

¹Israelpa yupaychasqan Tukuy Atiyniyuq Tayta Diosmi Moab nacionpa contranpi kaynata nirqa: Nebo llaqtam pasaypaq tuñichisqa kachkan, Quiriataim llaqtam vencesqa kaspa penqaypi kachkan. Murallankunapas pasaypaq tuñichisqam kachkan.

²Moab nacionpa hatun tukuyninmi tukurun, Moab nacionta chinkachinankupaqmi llapa enemigonkuna Hesbón llaqtapi rimanakurunku. Madmena llaqta, qampas puchukachisqam kanki, wañuymi qatikachasunki.

³Horonaim llaqtapim qapariy uyarikun: ¡Llaqtam pasaypaq tuñichisqa kachkan! nispa.

⁴Moab nacionmi tuñichisqa kachkan, wawakunapa qapariyninmi Zoar lawkamaraq uyarikuchkan.

⁵Luhit qatata qespiqkunam waqastin richkanku; Horonaim llaqtamanta uraykuq ñanpim nanaywan qaparichkanku, llapa enemigokuna llaqtata purmarachisqanmanta.

⁶¡Vidaykichikta salvanaykichikpaq ayqeychik! ¡Chunniqpi wiñaq sacha hinayá kaychik!

⁷Moab runakuna qamkunaqa kallpaykichikpiwan qori-qollqekichikpim hapipakurqankichik, ichaqa qamkunapas pasaypaq vencesqam kankichik. [4]Quemos sutiyuq idoloykichikpas, llapa sacerdotenkunawan hinaspa ancha reqsisqa runakunawan kuskam preso apasqa kanqaku.

⁸Tuñichiqkunaqa sapa llaqtamanmi hamunqaku, manam chulla llaqtapas puchunqachu; qechwankunatawan pampakunatapas pasaypaqtam purmachinqaku. Ñoqa Tayta Diosmi chaynata nini.

⁹Moab nacionmanyá raprata qoychik, chaynapi pawakunanpaq, llaqtankunam pasaypaq purmachisqa kanqa, manaña runayuq kanankamam chunnichisqa kanqa.

¹⁰Tayta Diospa kamachisqanta qellapakuspa ruwaqqa ñakasqayá kachun. Wañuchinanpaq kamachichkaptin mana wañuchiqqa ñakasqayá kachun.

¹¹Moab nacionniyuq runakunaqa warma kasqankumantaraqmi hawkalla kawsakurqaku, paykunataqa manam haykapipas presotaqa aparqakuchu. Paykunaqa urpupi mana kuyuchisqa vino hinam kachkanku, chayraykum paykunaqa hina kaqlla hawka kakurqaku.

¹²Chayraykum ñoqa Tayta Dios nini: Chayamunqam punchaw, urpupi vinota talliruq runakunata kachamunaypaq, manaña imayuq urpukunatapas pakiparunankupaq.

¹³Moab nacionmi Quemos sutiyuq idolonmanta penqakunqa, imaynam Israelpas hapipakusqan Bet-elmanta penqakusqanta hina.

¹⁴Moab nacionqa amayá nichkachunchu: “Allinnin qari-qari soldadokunam kaniku” nispaqa, nitaq “guerrapi peleaq tropakunam kaniku” nispapas.

¹⁵Moab nacionqa tuñichisqam kanqa, llaqtankunam taqmasqa kanqa, allinnin jovenninkunam wañuchisqa kanqa. Ñoqa Tukuy Atiyniyuq Tayta Diosmi chaynata nini.

¹⁶Moab nacionpa sasachakuyninmi hichpamuchkanña, tuñichisqa kanan punchawmi chayamuchkanña.

¹⁷Moab nacionpa hichpanpi yachaqkuna, ancha reqsisqa kasqanta yachaqkuna, paymanta waqaspa kaynata niychik: Qawariychik, “¡Pakisqa kaspi hinam atiynin rikurirun! ¡Pakisqa tawna hinam sumaq kayninpas rikurirun!” nispaykichik.

¹⁸Dibón llaqta, altopi tiyanaykimanta uraykamuy, chaki allpapiña tiyay. Moab nacionta purmachiqmi qampa contraykipi hamuchkan, murallaykikunatam tuñirachinña.

¹⁹Aroer llaqtapi yachaqkuna, ñanpa patanpi sayaykuspa qawaychik, wañuymanta lluptimuqkunata imam pasakusqanta tapuychik.

²⁰Moab nacionmi penqayman churasqa kaspa mancharisqa kachkan. Moabmantayá hatun llakikuywan waqaychik, Moab nación tuñichisqa kasqanmanta Arnón mayupi willakuychik.

²¹Pampakunapi kaq llaqtakunapa contranpi sentenciasqanmi chayaramun. Chay llaqtakunam kaykuna: Holón, Jahaza, Mefaat,

²²Dibón, Nebo, Bet-diblataim,

²³Quiriataim, Bet-gamul, Bet-meón,

²⁴Queriot, Bosra, hichpa lawkunapi kaq llaqtakuna chaynataq karukunapi kaq llaqtakunapas.

²⁵Tayta Diosmi kaynata nin: Moab nacionpa kallpanmi kuchusqa rikurirun, makinkunam pakisqa rikurirun.

²⁶Tayta Diospa contranpi hatarisqanmanta Moab nacionta sinkachiychik, chaynapim Moabqa kutichisqanpipas qochpanqa hinaptinmi llapallanku asipayanqaku.

²⁷Moab nación ¿manachu Israelta burlakurqanki? ¿Manachum suwamanta hina rimaspa sapa kuti asipayarqanki?

²⁸Moab nacionpi yachaqkuna llaqtaykichikkunata saqeychik; qaqa uchkupi qesachakuq paloma hina qaqakunapiña yachaychik.

²⁹Moab nacionpa hatun tukuq, pay tukuq, qari tukuq, badulaki, hinaspa mana kasukuq kasqantaqa yachanchikmi.

³⁰Ñoqa Tayta Diosmi kaynata nini: Moab nacionpa mana kasukuynintawan, badulaki kayninta hinaspa rimaysapa kasqantaqa reqsinim.

³¹Chayraykum Moab nacionrayku waqasaq, Kir-harespi yachaqkunaraykum llakikusaq.

³²Sibma lawpi uvas chakra qamraykum waqasaq, Jazer llaqtarayku waqasqaymantapas mastaraqmi waqasaq. Kallmaykikunapas lamar qochapa waklawninkamaraqmi chayarqa, Jazer llaqtakamaraqmi chayarqa. Kunanmi ichaqa uvas cosechaynikipas tukunqa.

³³Moab nacionpi kaq huertakunapiqa manañam kusikuymanta qapariypas kanñachu, uvas saruna pozopi vinotam chinkarachisaq, takiwan uvas saruqkunapas manañam kanqachu, kusikuymanta takiypas manañam kanqachu.

³⁴Hesbón llaqtapi yachaqkunam nanaywan qaparichkanku, qapariyninkum Eleale llaqtamanta Jahaza llaqtakama uyarikuchkan, Zoar llaqtamanta Horonaim llaqtakamam uyarikuchkan, Eglat-selisiyá lawkamam uyarikuchkan. Nimrim wayqopi pukyukunapas lliwmi chakirun.

³⁵Tayta Diosmi kaynata nin: Moab nacionmantam chinkarachisaq orqokunaman rispa capillakunapi sacrificio ofreceqkunatapas, chaynataq llapa idolokunaman incienso kañaqkunatapas.

³⁶Moabmantam qena hinaraq sonqoy waqachkan, Kir-hares llaqtayuqkunamantam qena hinaraq sonqoy waqachkan, tukuy ima huñusqanku chinkarusqanmantam sonqoy waqachkan.

³⁷Lliw runapa umanmi paqlayachisqa kachkan, lliw runapa barbanmi rutusqa kachkan, llapallankum makinkuta ikipakurunku, llapallankum qachqa pachawan churakurunku.

³⁸Moab naciontam ñutuparuni, mana valeq allpa mankata hinam pakiparuni; chayraykum Moab nacionpa altosninkunapipas, llapallan callenkunapipas, waqayllaña uyarikuchkan.

³⁹¡Moab nación taqmasqa kasqanmanta waqaychik! Manchakuypa huntasqanmi kachkan, penqakuymantam qepanpakurun, lliw nacionkunapa burlakunanñam rikurirun, lliw nacionkunapa manchakunanñam rikurirun.

⁴⁰Tayta Diosmi kaynata nin: Moab nacionpa contranpim enemigonkuna hamunqaku, rapranta mastarispa pawaykuchkaq anka hinaraqmi atacanqaku.

⁴¹Llaqtakunapas enemigopa munaychakusqanmi kanqa, amparakuna sitiokunapas tuñichisqam kanqa. Chay punchawmi Moab nacionniyuq allinnin qari-qari runakunapa sonqonkum hukmanyarurqa, wachakuywan ñakariq warmi hinaraqmi rikurirurqa.

⁴²Moab nacionmi pasaypaq chinkachisqa kanqa, ñoqa Tayta Diospa contraypi hatunchakusqanrayku.

⁴³Moab runakunaqa monte animalkuna hapiqkunapa qatikachasqan hinam kanqaku, uchkumanpas otaq toqllamanpas wichiykuchkaqña hinam kanqaku.

⁴⁴Ñoqa Tayta Diosmi kaynata nini: Manchakuymanta lluptiqkunam uchkuman wichiykunqaku, uchkumanta lluptiqkunam toqllaman wichiykunqaku. Moab runakunata castiganay tiempo chayaramuptinmi chayna kanqa.

⁴⁵Wakin runam mana kallpayuqña lluptirunku, Hesbón llaqtapi amparakunankupaqmi lluptirunku; ichaqa Hesbón llaqtamantam nina lloqsiramun, Sehón llaqtanmantam lenwachkaq nina lloqsiramun, Moab naciontam kuchun-kuchun ruparun, chaqwakuq llaqtatam uma puyukninkama ruparun.

⁴⁶¡Ay, Moab nación! Quemos sutiyuq idolota yupaychaq nación, ¡imaynaraq kanki! Qari churikikunatawan warmi churikikunatam presota aparunku.

⁴⁷Chaywanpas tukupay tiempokunapim Moabmanta preso apasqa kaqkunata kutichimusaq. Chaynatam Moab nacionta juzgasaq. Ñoqa Tayta Diosmi chaynata nini.