Read Biblia Revisión Chuya Qellqa 1992 – Chuya Qellqa 1992 Jeremías 49 Bible Online

Jeremías 49 - Biblia Revisión Chuya Qellqa 1992 – Chuya Qellqa 1992 bible

Jeremías 49

¹Amón nacionpa contranpim Tayta Dios kaynata nirqa: ¿Manachum Israelqa mirayniyuq karqa? ¿Manañachu herencian chaskiq churinkuna karqa? ¿Imanasqataq [5]Milcom idolopaña Gad allpaqa rikurirun? ¿Imanasqataq llaqtankunapipas Amón runakunaña yachakuchkanku?

²Ñoqa Tayta Diosmi kaynata nini: Hamuchkanmi punchawkuna Amón nacionpi kaq Rabá llaqtapi guerrapaq qapariykunata uyarichinaypaq; pasaypaq tuñichisqam kanqa, llaqtankunapas kañasqam kanqa, Israelmi llaqtankunata kaqllamanta kutichikunqa. Ñoqa Tayta Diosmi chaynata nini.

³¡Hesbón llaqta, Hai llaqta tuñirusqanrayku waqay! ¡Rabá llaqtapi warmikuna qaparispa waqaychik, qachqa pachawan pachakuspa qasqoykichikta takakuychik! ¡Loca hinaña kallpakachaspa aychaykichikta kuchupakuychik! Milcom idolotam sacerdotentawan ancha reqsisqa runakunatawan kuskata huklaw nacionman presota aparunku.

⁴Yaw, mana kasukuq llaqta, ¿imanasqataq qechwaykikunamanta alabakuchkanki? ¿Imanasqataq tukuy imapa wiñanan qechwaykikunawan hatun tukuchkanki? Qamqa tukuy ima huñusqaykipi hapipakuspam nichkanki: ¿Pitaq ñoqata imanawanqa? nispayki.

⁵Ñoqa Tukuy Atiyniyuq Tayta Diosmi kaynata nini: Manchakuytam tukuy hinastinmanta contraykipi kachamusaq, sapakamam llutanpi ayqenkichik, lluptiqkunataqa manam pipas huktawanqa huñumunqachu.

⁶Chaykunapa qepantam Amonmanta preso apasqakunata kutichimusaq. Ñoqa Tayta Diosmi chaynata nini.

⁷Tukuy Atiyniyuq Tayta Diosmi Edom nacionpa contranpi kaynata nirqa: ¿Yachaychu Temán llaqtapi tukurun? ¿Yachayniyuqkunapa consejakuyninchu tukurun? ¿Yachayninchu manaña valeq rikurirun?

⁸¡Dedán llaqtapi yachaqkuna, pakakamunaykichikpaq lluptiychik! Esaupa llaqtantam tuñichisaq, castiganay punchawmi chayaramun.

⁹Uvasta cosechaspaqa maskapakunankupaqmi puchunku, suwakunapas tuta hamuspankuqa kamallatam apakunku.

¹⁰Esaupa llaqtantam ichaqa mana imayuqta saqerusaq, pakakunan sitiotapas libretañam saqerusaq, manañam pakakuyta atinqachu. Churinkunapas, ayllunkunapas, muyuriqninpi yachaqkunapas, chinkachisqam kanqa; manañam pipas qepanqañachu.

¹¹“Mana tayta-mamayuqkunata saqeykuway, ñoqam uywasaq; viudakunapas ñoqapim hapipakunqaku”.

¹²Ñoqa Tayta Diosmi kaynata nini: Mana castiganaypaq kaq nacionkunata castigachkaptiyqa, qamqa manam imaraykupas chay castigomanta lluptinkichu, aswanqa castigasqapunim kanki.

¹³Ñoqa Tayta Diosmi kikiyrayku juraspay kaynata nini: Cheqaptapunipas Bosra llaqtaqa purmachisqa, chunnichisqa, burlakusqa hinaspa ñakasqam kanqa. Wakiq llaqtankunapas wiñaypaq purmachisqam kanqa.

¹⁴Tayta Diosmantam huk willakuy chayaramuwan, huk willakuqmi nacionkunaman kaynata willachkan: Huñunakuspa Edom nacionpa contranpi riychik, paykunawan peleanaykichikpaq alistakuychik.

¹⁵Llapa nacionkunamantapas taksallatañam ruwasqayki, runakunapapas uchuychanantam ruwasqayki.

¹⁶Hatun tukuynikim pantarachisunki, sonqoykipa hatun tukuyninmi pantayman aparusunki. Qaqapa uchkunkunapiña yachaptikipas, alto raqchikunapiña wasichakuruptikipas, anka hinaña alto qaqakunapi qesachakuptikipas, chaymantam wikapamusqayki. Ñoqa Tayta Diosmi chaynata nini.

¹⁷Edom nación pasaypaqta chinkaruptinmi, chayninta pasaqkunapas admirakunqaku, hinaspam purmachisqa kasqanmanta burlakunqaku.

¹⁸Imaynam chinkachisqay Sodoma, Gomorra chaynataq muyuriqninpi llaqtakuna hinam, Edom nacionpas manaña runayuq kanqa, manañam chaypiqa pipas yachanqakuñachu. Ñoqa Tayta Diosmi chaynata nini.

¹⁹Imaynam Jordán mayupa patanpi montemanta león lloqsispa sumaq pastopa kasqanman kallpan, chaynam ñoqapas qonqaymanta hamuruspay Edom nacionniyuq runakunata ayqerachisaq, hinaptinmi ñoqapa akllasqay runaña paykunapi munaychakunqa. ¿Pitaq ñoqa hina kanman? ¿Pitaq ñoqawan atipanakunman? ¿Mayqan michiqtaq ñoqapa contraypi hatarinman?

²⁰Chaynaqa, Edom nacionpa contranpi tanteasqaytawan Temán llaqtayuqkunapa contranpi tanteasqayta uyariychik: Uña ovejankunatam aysanqaku, pastonkunatapas purmachinqakum.

²¹Edom nacionta pasaypaqta venceruptinkum allpapas katkatatanqaraq, qaparisqankupas Puka lamar qochakamaraqmi uyarikunqa.

²²Enemigoqa rapranta kicharispa pawaykuq anka hinaraqmi Bosra llaqtaman pawaykunqa. Chay punchawpim Edom nacionpa allinnin qari-qari runankunapas wachakuywan ñakariq warmi hinaraq qaparkachanqaku, nispa.

²³Damasco llaqtapa contranpim Tayta Dios kaynata nin: Manchakuypaq willakuykuna uyarisqanwanmi Hamat llaqtawan Arfad llaqtapas penqakuymanta kachkanku. Manchakuymi paykunaman huntaykun, manam ima ruwaytapas atinkuchu.

²⁴Damasco llaqtam manaña kallpayuq rikurirun, lluptikunanpaqmi alistakuchkan. Manchakuywan llakikuy hinaspa nanaymi wachakuq warmita hinaraq huntaykun.

²⁵Ancha reqsisqa llaqtam, kusikuypa kanan llaqtam, manaña runayuq qeparun.

²⁶Chay punchawpim jovenninkunapas plazankunapi chutarayanqa, soldadonkunapas lliwmi wañunqa. Ñoqa Tukuy Atiyniyuq Tayta Diosmi chaynata nini.

²⁷Damasco llaqtapa murallankunatam kañaykusaq. Ben-hadadpa palacionkunatapas ninam tukunqa.

²⁸Babilonia nacionpa reynin Nabucodonosorpa vencesqan Cedar nacionpa chaynataq Hazor nacionpa contranpim Tayta Dios kaynata nirqa: Hatarispa Cedar nacionta atacamuychik, intipa qespimunan lawpi yachaqkunata wañuchimuychik.

²⁹Carpankutawan animalninkunata qechumuychik, toldonkunatawan servicionkunata apakamuychik. Camellonkunata qechumuspa kaynata qapariychik: “Manchakuymi tukuy hinastinpi kakuchkan”, nispaykichik.

³⁰Ñoqa Tayta Diosmi kaynata nini: ¡Hazor llaqtayuqkuna kallpaylla lluptiychik! ¡Allpa ukunpi pakakamuychik! Babilonia nacionpa reynin Nabucodonosormi contraykichikpi tantearun.

³¹Ñoqa Tayta Diosmi kamachikichik: Rispaykichik hawkallaña yachakuq llaqtata atacamuychik, punkunkunapas mana cerrojoyuqmi kachkan, paykunaqa sapallankum kachkanku.

³²Camellonkunatawan animalninkunata suwamuychik, rinrinpa ñawpaqninpi chukchan rutukuq runakunatam tukuy hinastinman cheqechisaq, tukuy hinastinmantam sasachakuyta apamusaq. Ñoqa Tayta Diosmi chaynata nini.

³³Hazor llaqtaqa atoqkunapa machayninñam kanqa, wiñaypaqñam chunninqa. Chay llaqtapiqa manañam pipas yachanqañachu, nitaqmi samayllapas samanqakuñachu, nispa.

³⁴Rey Sedequías Judá nacionpi munaychakuyta qallarichkaptinmi, Elampa contranpi profeta Jeremiasta Tayta Dios kaynata nirqa:

³⁵Ñoqa Tukuy Atiyniyuq Tayta Diosmi kaynata nini: Elam nacionpa flechanan arcotam pakirusaq, allinnin armantam pakiparusaq.

³⁶Elam nacionpa contranpim, kay pachapa tawan lawninmanta wayrata chayarachimusaq; hinaptinmi tukuy hinastinman cheqenqaku, llapallan nacionkunamanmi lluptinqaku, manam chulla nacionpas mana chayasqankuqa kanqachu.

³⁷Ñoqa Tayta Diosmi kaynata nini: Wañuchiy munaq enemigonkupa qayllanpim Elam nacionta katkatatachisaq, chay nacionpa contranpim sasachakuytawan ñakariyta kachamusaq, pasaypaqta tukunaykamam guerrata kacharimusaq.

³⁸Elam nacionpim munaychakunaypaq tronoyta churasaq, reyninkunatawan kamachiqninkunatam wañurachisaq.

³⁹Chaywanpas tukupay punchawkunapim Elam nacionmanta preso apasqakunata kutichimusaq. Ñoqa Tayta Diosmi chaynata nini.