Read Biblia Revisión Chuya Qellqa 1992 – Chuya Qellqa 1992 Jeremías 5 Bible Online

Jeremías 5 - Biblia Revisión Chuya Qellqa 1992 – Chuya Qellqa 1992 bible

Jeremías 5

¹Tayta Diosmi kaynata nin: Jerusalenpa callenkunapiyá purimuychik, allinta qawamuspayá maskamuychik; icharaqpas pillatapas allin arreglo ruwaq runata tarimuwaqchik, cheqap rimaq runata tarimuwaqchik, hinaptinqa Jerusalentam pampachasaq.

²Ñoqa kawsaq Diosrayku juraspankupas paykunaqa llullakuspam juramentanku.

³Dios Taytalláy, qamqa cheqap ruwaqtam maskanki. Castigoykipas manam paykunataqa nanarqachu, ñakarichiptikipas manam corregikuyta munarqakuchu; rumi hinaña rikuriruspankum mana wanakuyta munarqakuchu.

⁴Chaymi nirqani: Kaykunaqa mana yachayniyuq runakunam, locoyaruspankum Tayta Diospa munasqanman hina kawsaytaqa mana yachankuchu, Diospa kamachikuynintapas manam yachankuchu.

⁵Chaynaqa, yachayniyuqkunawanyá rimamusaq. Paykunaqa yachankum Tayta Diospa munasqanman hina kawsayta. Ichaqa paykunapas Diospa contranpi hoqarikuruspankum mana kasukurqakuchu.

⁶Chayraykum paykunataqa leonkuna montemanta lloqsiramuspa wañurachinqa, chunniq atoqkunam tukuparunqa, tigrillokunam llaqtankumanta lloqsimuptinku tisaparunqa. Chaynataqa ruwanqa Tayta Diosta qepanchaspa llumpayta huchallikusqankuraykum.

⁷Tayta Diosmi kaynata nin: ¿Imaynataq chayta pampachaykiman? Churikikunapas qepanchakuwaspankum idolokunapa sutinpi juranku, saksanankukama mikuchichkaptiypas paykunam ichaqa saqeruwanku, tropanpim chuchumika warmikunapa wasinman kallpanku.

⁸Yeguapa qepanki potro caballokuna hinaraqmi runamasinkupa warminta qatikachaspa weqeqeqenku.

⁹Tayta Diosmi kaynata nin: ¿Manachu chaykuna ruwasqanmanta castigasaq? ¿Manachu chayna llaqtaman merecesqanta qopusaq?

¹⁰Enemigonkuna yaykuspa uvas chakrakunata purmachichunku, ichaqa amayá pasaypaqtachu; llullu kallmankunata perqankunamanta rachupachunku, paykunaqa manañam uvas chakrayñachu.

¹¹Israel nacionwan Judá nacionmi qepancharuwanku. Ñoqa Tayta Diosmi chaynata nini.

¹²Paykunaqa Tayta Diosta qepanchaspankum kaynata nirqaku: Diosqa manam kanchu, ima mana allinpas manam chayamuwasunchu, guerrapas yarqaypas manam hamuwasunchu.

¹³Profetakunapas wayra hinañam kanqaku, Diospa palabranpas manam paykunapiqa kanchu; rimasqankuman hinayá paykunaqa kachunku.

¹⁴Chayraykum Tukuy Atiyniyuq Tayta Dios kaynata nin: Chaynakunata rimasqankumantam, palabraykunaqa nina hina simikipi kanqa, paykuna yanta hina kaptinkum rimasqaykikunañataq paykunata ruparunqa.

¹⁵Tayta Diosmi kaynata nin: Israelpa mirayninkuna, contraykichikpim runakunata karumantaraq pusamusaq, paykunaqa allinnin qari-qari runakunam, ñawpaq runakunapa castankunam, rimayninkutapas manam yachankichu, nitaqmi rimasqankutapas entiendenkichu.

¹⁶Llapallankum allinnin qari-qari soldadokuna, armankupas wañuchiq armakunam.

¹⁷Cosechaykikunatam mikuspa tukurunqaku, churikunatapas qarita warmitam mikurunqaku, ovejaykikunatawan vacaykikunatam mikukurunqaku, uvasnikikunatawan higosnikikunatam kuchuparunqaku. Hapipakunayki murallasqa llaqtaykikunatapas lliwmi tuñirachinqaku.

¹⁸Tayta Diosmi kaynata nin: Chaywanpas chay punchawkunapiqa manaraqmi pasaypaqtachu tukurusqaykichik.

¹⁹Sichum pipas kaynata tapusunki: “¿Imanasqataq Tayta Diosqa tukuy kaykunata ruwaruwanchik?” nispa, hinaptinqa kaynatam ninki: Imaynam Tayta Diosta qepanchakuspaykichik llaqtanpipunipas rikchaqmana idolokunataña yupaycharqankichik, chaynam huklaw llaqtapi mana reqsisqaykichik runakunataña servimunkichik.

²⁰Jacobpa mirayninkunaman willamuychik, Judá runakunaman kaynata nimuychik:

²¹Yaw, mana yachayniyuq runakuna, yaw, mana yuyaymanayniyuq runakuna, kayta uyariychik: Qawakuchkaspapas manam rikukunkichikchu, uyarichkaspapas manam kasukunkichikchu.

²²Ñoqa Tayta Diosmi kaynata nini: ¿Manachu ñoqata manchakuwankichik? ¿Manachu qayllaypi katkatatankichik? Lamar qochapa patantam linderonpaq churarqani, chayta lamar qocha mana pasananpaq. Olankunapas mancharikuypaqta qaparispa hoqarikuchkaspapas manam pasayta atinmanchu.

²³Qamkunam ichaqa rumi sonqo mana kasukuq runakuna kankichik, saqeruwaspaykichikmi mana allin ñanninta pasakunkichik.

²⁴Qamkunaqa manam yuyaymanarqankichikchu: Yupaychasqanchik Tayta Diostayá kasukusun nispallapas, tarpuy parapas poqoy parapas chayachimuqtayá kasukusun nispallapas, tiempollanpi cosecha qowaqninchiktayá yuyarisun nispallapas.

²⁵Mana allinkuna ruwasqaykichikmi allin kaqkunamanta karuncharusunkichik; huchaykichikmi allin kaqkunamanta rakirusunkichik.

²⁶Llaqtay ukupim mana allin runakuna kachkan, urpikunata hapiq hinaraqmi runamasinta wateqachkanku, runamasinta hapirunanpaqmi toqllata churachkanku.

²⁷Imaynam jaulakunata urpikunawan huntachinku, chaynam wasinkutapas suwakusqankuwan huntachinku, chaykunawan apuyaruspankum qari tukuqllaña rikurirunku.

²⁸Wirayaruspankum lluchkay-lluchkay uyayuqraq kachkanku, mana allinkuna ruwasqankupas manaña yupay atinam, mana tayta-mamayuqkunapaqpas manam allin arreglotaqa ruwankuchu, wakchakunatapas manam nanachikunkuchu.

²⁹¿Manachu chaykuna ruwasqankumanta castigasaq? ¿Manachu chayna nacionmanta vengakusaq? Ñoqa Tayta Diosmi chaynata nini.

³⁰Mancharikuypaq kaqkunam kay nacionpi pasakuchkan, manchapakuykunam kay nacionpi pasakuchkan.

³¹Profetakunam llullata profetizanku, sacerdotekunam munayninkuman hina kamachikunku, runaykunañataqmi paykunaman hapipakunku. Ichaqa ¿Imatataq tukupay punchaw chayamuptin ruwankichik?