Read Biblia Revisión Chuya Qellqa 1992 – Chuya Qellqa 1992 Jeremías 51 Bible Online

Jeremías 51 - Biblia Revisión Chuya Qellqa 1992 – Chuya Qellqa 1992 bible

Jeremías 51

¹Tayta Diosmi kaynata nin: Babilonia nacionpa contranpim, contraypi hatariq runankunapa contranpim, tuñichiq wayrata pukuchimusaq.

²Babilonia nacionpa contranpim enemigonkunata kachamusaq, paykunam trigota wayrachichkaq hina runankunata wischunqaku, allpantapas manaña runayuqtam saqenqaku; sasachakuy punchaw chayamuptinmi muyuriqninmanta atacanqaku.

³Flechaqkuna flechananku arcota alistachunku, qasqonkuta wasankuta harkachikunawan churakuchunku, Babilonia nacionpa jovenninkunataqa ama llakipayaychikchu, tropankunatapas lliwta wañuchiychik.

⁴Lliw Caldea nacionpim wañuchisqa kanqaku, lanzawan wañuchisqakunam callenkunapi wischurayanqaku.

⁵Israel runakunawan Judá runakunam contraypi huchallikuspanku nacionninkuta huchawan huntachirqaku, chaywanpas ñoqa Tukuy Atiyniyuq Tayta Diosqa manam Israel naciontawan Judá naciontaqa saqerqanichu.

⁶¡Vidaykichikta salvanaykichikpaq Babiloniamanta lluptiychik! ¡Ama paykunapa huchanmanta wañuychikchu! ¡Ñoqa Tayta Diospa vengakunay punchawmi chayaramun! ¡Imam ruwasqankuman hinam pagapusaq!

⁷Babilonia nacionqa qorimanta vaso hinam makiypi karqa, llapallan nacionkunatam sinkachirqa. Llapa nacionkunam chay vasomanta upyaspanku muspaypi hinaña karqaku.

⁸Babilonia nacionmi qonqaymanta wichirun, vencerachikuspanmi lliw ñutupakurun. ¡Paymanta qaparkachaychik! Heridankunapaq hampita apamuychik, icharaqpas sanoyanman.

⁹¡Babiloniataqa hampirunikuñam, ichaqa manam sanoyanchu! ¡Saqeychik! Llaqtanchikman sapakama ripukusun. Huchankunaqa cielokamaraqmi chayarun, puyukamaraqmi hoqarikurun.

¹⁰Tayta Diosmi sentenciaspa favoreceykuwanchik. Hamuychik, ñoqanchikpaq Diosninchikpa imam ruwasqanta Sión llaqtapi willakamusunchik.

¹¹Tayta Diosmi Babiloniata chinkachinqa, templonta tuñichisqanmantam vengakunqa. Flechaykichikta alistakuychik, escudoykichikta hapiychik. Babilonia nacionta tuñichinankupaqmi Media nacionpa reyninkunata Tayta Dios kallpanchamuchkan.

¹²¡Babilonia nacionpa murallankunapa hawanpi banderata sayachiychik! ¡Llaqta waqaychaqkunata yapaychik! ¡Vigilaqkunata churaychik! ¡Llaqta wateqaqkunata churaychik! Tayta Diosmi Babilonia nacionpa contranpi tanteasqankunata ruwayman churanqa.

¹³¡Yaw, Babilonia nación! Iskay hatun mayukunapa chawpinpim yachanki, tukuy imayuq apu-apum kankipas. Puchukanayki punchawmi chayaramunña, wañunayki punchawmi chayaramunña.

¹⁴Tukuy Atiyniyuq Tayta Diosmi kikinrayku juraspan kaynata nin: Enemigoykikunawanmi aqaruway urukunawan hinaraq inturachisqayki, paykunam vencesusqaykita hatunmanta qaparinqaku, nispa.

¹⁵Tayta Diosmi kay pachata atiyninwan ruwarqa, Tukuy kay pachapi kaqtam yachayninwan takyachirqa, yachayninwanmi cielokunata mastarirqa.

¹⁶Rimariptinmi cielopi yakukunapas sinchillataña qaparimun, kay pachapa patankunamantam puyukunata hatarichimun, paymi paramunanpaq llipyachimun, maymi waqaychasqanmantam wayrakunatapas hurqomun.

¹⁷Llapa runakunam mana yachayniyuq rikurirunku, ídolo ruwaqkunamanmi ídolo ruwasqanmanta penqakuy yaykurun. Chay idolokuna ruwasqankuqa mana imapaq valeqmi, chaykunapaqa manam kawsaynin kanchu.

¹⁸Mana imapaq valeqmi chaykunaqa, asikuypaqmi chay idolokunaqa, Tayta Diospa castiganan punchaw chayamuptinmi pasaypaq ñutusqa kanqaku.

¹⁹Jacobpa Diosninqa manam chaynachu, payqa tukuy imapas unanchaqmi. Israeltam llaqtanpaq akllakurqa Tukuy Atiyniyuq Tayta Diosmi sutinpas.

²⁰Tayta Diosmi Babilonia nacionta kaynata nin: Maqanay arma hinam qamqa kanki, Guerrapi peleanay arma hinam qamqa kanki. Qanwanmi nacionkunata purmachini, qanwanmi munaychakuykunata tuñichini.

²¹Qanwanmi wañuchini caballokunatawan sillakuqninkunatapas, carretakunatawan manejaqninkunatapas.

²²Qanwanmi wañuchini qarikunata warmikunatapas, warmakunatawan machukunatapas, jovenkunatawan sipaskunatapas,

²³michiqkunatawan ovejakunatapas, yapuqkunatawan torokunatapas, munaychakuqkunatawan kamachikuqkunatapas.

²⁴Ñoqa Tayta Diosmi kaynata nini: Babilonia nacionmanwan Caldea runakunamanmi, Sión llaqtapi mana allinkuna ruwasqankumanta qayllaykichikpi pagasaq.

²⁵Ñoqa Tayta Diosmi nini: Nacionkunata tuñichiq orqo, qampa contraykipim kachkani. Makiytam castiganaypaq hoqarisaq, qaqapa hawanmantam kumpaykusqayki, hinaspaymi kañasqa orqoman tikrasqayki.

²⁶Purmasqa perqaykikunapa ruminkunaqa manañam wasi ruwananpaqpas servikunqañachu, pasaypaq purmachisqam kanki. Ñoqa tayta Diosmi chaynata nini.

²⁷Banderata kay nacionpi hoqariychik, nacionkunapi trompetata tocaychik, Babiloniata atacanankupaq nacionkunata alistamuychik. ¡Araratpi, Minipi hinaspa Askenazpi tropakunata hatarichimuychik! Chay tropakunapa capitanninta churaychik. Caballopi silladakunata aqaruway urukunata hinaña hatarichimuychik.

²⁸Babiloniata atacanankupaq nacionkunata alistaychik, atacanankupaq Media nacionpi reykunatawan kamachiqninkunata qayamuychik, munaychakusqan nacionkunata hatarichimuychik.

²⁹Babilonia nacionta manchakuypaq chunniqman tikrananpaq tanteasqanta Tayta Dios ruwayman churaptinqa allpapas katkatatanqaraqmi.

³⁰Babilonia nacionpa allinnin qari-qari soldadonkunam mana peleanankupaq pakakurunku, mana kallpayuqñam rikurirunku, warmikuna hinañam rikurirunku; wasinkunam kañasqaña kachkan, punkunkunapi cerrojonkunapas pakipasqañam kachkan.

³¹Willakuqkunam qatinasninpi kallpachkanku, Babilonia nación vencesqa kasqanta reyman willanankupaqmi kallpachkanku.

³²Mayupa vadonkunapim churakurunku, soqosllaña sitiokunatam kañaykunku, soldadokunam manchakuypa huntasqan kachkanku.

³³Ñoqa Tukuy Atiyniyuq Tayta Diosmi kaynata nini: Suma-sumaq Babilonia nacionmi trillana era hinaña rikurirunqa, Babilonia nación cosechasqa kanan punchawmi chayaramunqaña.

³⁴Sión llaqtam kaynata nin: Babiloniapa reynin Nabucodonosormi ñutuparuwaspan mikuruwarqa, mana imayuq platota hinam saqeruwarqa, rakrapu hinam millpuruwarqa, ñoqawan wiksanta huntarachispanmi atqoruwarqa.

³⁵Jerusalenmi kaynata nin: Ñakarichiwasqanmanta Babilonia ñakarichun, imaynam runaykunata wañuchisqankuta hinayá Caldea nacionpi runakunapas wañuchunku, nispa.

³⁶Chayraykum Tayta Dios kaynata nin: Ñoqam qamta nanachikusqayki, enemigoykikunatam vengakusaq, Babiloniapa pukyunkunatawan mayuntam chakichisaq,

³⁷Babiloniaqa pasaypaq tuñichisqam kanqa, atoqkunapa yachananñam kanqa, runapa mana yachananñam kanqa, qawaqninkunapas admirakuspam burlakunqa.

³⁸Leonkuna hinam qaparinqaku, malta leonkuna hinam qaparkachanqaku.

³⁹Rupaypi yakunayachikuptinkum machachiqninkuta upyachisaq, muspaypi hinaña kanankukamam upyachisaq, chaynapim wiñaypaq manaña rikchanankukama puñurunqaku. Ñoqa Tayta Diosmi chaynata nini.

⁴⁰Nakana wasiman malta carnerokunata, chivatokunata, poqosqa carnerokunata pusachimuchkaq hinam paykunataqa pusachimusaq.

⁴¹Babiloniam presochasqa rikurirun, llapallan nacionpa alabanan nacionmi vencesqa rikurirun, chayta qawaspam wakin nacionkunapas mancharikunku.

⁴²Lamar qocham Babiloniata pamparun, olankunam lloqsiramuspa pamparun.

⁴³Llaqtankunapas pasaypaq chunnichisqam rikurirun, manaña imapa kanan chaki allpam rikurirun, chaypiqa manañam pipas yachanqañachu, manañam pipas chaynintaqa pasanqañachu.

⁴⁴Bel idolotam Babiloniapi castigasaq, imapas millpusqankunatam atqochisaq, nacionkunapas manañam paymanqa hamunqakuñachu. Babiloniapa murallankunam tuñichisqa kanqa.

⁴⁵Kuyasqay llaqtalláy, chay nacionmanta lloqsiy, vidaykichikta sapakama libraychik. Tayta Diospa nina hina piñakuyninmanta vidaykichikta lluptichiychik.

⁴⁶Kay nacionpi rimaykuna kaptinqa ama hukmanyaychikchu nitaq manchakuychikchu. Sapa watam hukta-hukta rimanqaku, kay nacionpi ñakariy kananmantam rimanqaku, kamachikuqpuram peleanqaku.

⁴⁷Chaynaqa, hamuchkanmi punchaw Babilonia nacionpa idolonkunata castiganaypaq. Babiloniam penqaypi rikurinqa, ayankunapas chawpinpim wischurayanqa.

⁴⁸Norte lawmanta tuñichiqkuna hamuptinmi, Babilonia tuñichisqa kaptinmi, cielokunawan chaypi tukuy ima kaqkuna, kay pachawan chaypi tukuy ima kaqkuna kusikunqaku. Ñoqa Tayta Diosmi chaynata nini.

⁴⁹Israel runakunata wañuchisqanmantam Babilonia tuñichisqa kanqa, kay pachapi runakunata wañuchisqanmantam Babilonia purmachisqa kanqa.

⁵⁰¡Wañuymanta lluptiqkuna, ama sayaykuspa ayqeychik! ¡Karupiña kaspapas, Tayta Diosmanta yuyariychik! ¡Jerusalén llaqtamanta yuyariychik!

⁵¹Qamkunam ninkichik: “Tratawasqankuta uyarispaykum hatun penqaypi kachkaniku, Tayta Diospa templonman huklaw llaqtayuqkuna yaykusqanmantam penqakuyllawanña kachkaniku”, nispaykichik.

⁵²Chaynaqa, hamuchkanmi punchaw Babiloniapa idolonkunata ñutupanaypaq, llapa heridokunapas lliw nacionpim nanaywan ñakarinqaku.

⁵³Babilonia naciontaqa, cielokamaña hoqarikuruptinpas, amparakunanta chaypiña ruwaruptinpas, ñoqam tuñichiqninkunata kachaykusaq. Ñoqa Tayta Diosmi chaynata nini.

⁵⁴Babiloniapa nanaywan qaparisqanmi uyarikamuchkan, Caldea lawmantam hatun qapariy uyarikamuchkan.

⁵⁵Tayta Diosmi Babiloniata tuñichichkan, ancha qapariynintam upallachichkan. Enemigonkunam achka yakupa olankuna hinaraq qaparichkanku, lamar qocha hinaraqmi qaparichkanku.

⁵⁶Babiloniata tuñichiqkunam hamurunku, tropankunatam presocharunku, flechananku arcotam pakiparunku. Tayta Diosqa imam ruwasqankuman hinam pimanpas pagapun.

⁵⁷Ñoqam machachisaq Babiloniapa kamachiqninkunata, yachaysapa runankunata, ancha reqsisqa runankunata, gobernadorninkunata hinaspa soldadonkunata. Paykunataqa wiñaypaq manaña rikchanankukamam puñurachisaq. Tukuy Atiyniyuq Tayta Diosmi chaynata nin.

⁵⁸Tukuy Atiyniyuq Tayta Diosmi kaynata nin: Babiloniapa rakta-rakta perqakunatam pasaypaqta purmachinqaku, hatu-hatun punkunkunatam kañaykunqaku. Yanqapaqmi llamkaqkunapas hatarichirqaku, nina tukurunanpaqmi pisipaywan llamkarqaku.

⁵⁹Judá nacionpi rey Sedequías tawa wataña munaychakuchkaspanmi Babilonia nacionman rirqa, paywanmi rirqa Maasiaspa willkan otaq Neriaspa churin Seraiaspas paymi riqkunata pusarqa; hinaptinmi Babiloniapi Israelpa mirayninkunaman huk kunakuyta profeta Jeremías apachirqa.

⁶⁰Babiloniapa contranpi castigokuna hamunanmantam Jeremías huk libropi qellqarqa,

⁶¹hinaspanmi Seraiasta nirqa: Babilonia llaqtaman chayaspaykim kay libropi qellqasqa kaqta leenki,

⁶²hinaspam ninki: “Dios Taytalláy, kay nacionta manaña runayuq manaña animalniyuq kanankama chinkachinaykipaqmi rimarqanki, chaynapi wiñaypaq chunniptin manaña pipas chayninta pasanankupaq”, nispayki.

⁶³Leeyta tukuruspaykim kay libroman rumita watarunki, hinaspam Eufrates mayuman wischuykuspa

⁶⁴kaynata ninki: ¡Tayta Dios castigaptinmi Babilonia kaynata chinkarunqa! ¡Tuñiruspanqa manañam haykapipas hatarinqañachu! nispayki. Kaypim Jeremiaspa rimasqankuna tukun.