Read Biblia Revisión Chuya Qellqa 1992 – Chuya Qellqa 1992 Jeremías 52 Bible Online

Jeremías 52 - Biblia Revisión Chuya Qellqa 1992 – Chuya Qellqa 1992 bible

Jeremías 52

¹Rey Sedequiasmi iskay chunka hukniyuq watanpi kachkaspan munaychakuyta qallaykurqa. Chunka hukniyuq watam Jerusalén llaqtapi munaychakurqa. Mamanmi karqa Libna llaqtayuq Jeremiaspa churin Hamutal.

²Rey Sedequiasqa Tayta Diospa qayllanpim mana allinkunata ruwarqa, rey Joacimpa tukuy ruwasqanta hina.

³Chayraykum Jerusalén llaqtapa chaynataq Judá nacionpa contranpi Tayta Dios piñakuruspan qayllanmanta wischururqa. Chaymantam Sedequiasqa Babilonia nacionpa reyninpa contranpi hoqarikururqa.

⁴Isqon wataña munaychakuchkaptinmi, chay watapa chunka kaq killapa chunka kaq punchawninpi Babiloniapa reynin Nabucodonosor llapa tropankunawan Jerusalenpa muyuriqninpi churakururqaku, hinaspankum llaqtaman yaykunankupaq rampakunata ruwarqaku.

⁵Chaynapim Jerusalén llaqtaqa enemigonpa muyurirusqan karqa, Sedequiaspa chunka hukniyuq wata munaychakunankama.

⁶Chay watapa tawa kaq killanpa isqon punchawninpim, llaqtapi runakuna llumpay yarqaymanta karqaku mikunankupaq manaña imapas kaptin.

⁷Chaymi llaqtapa perqanta toqoruspanku, Jerusalenpa lliw soldadonkuna tutallan lluptirurqaku. Iskay murallakunapa chawpinpi punkunta lloqsispankum reypa huertankunaman riq ñanninta Arabá qechwaman ayqerqaku.

⁸Babilonia tropakunam ichaqa rey Sedequiasta qatispanku Jericó llaqtaman riq pampapi hapiramurqaku, tropankunañataqmi sapallanta saqeruspanku cheqerurqaku.

⁹Rey Sedequiastam presocharuspanku Hamat law Ribla llaqtaman Babilonia nacionpa reyninman pusarqaku. Chaypim Sedequiasta sentenciarqaku,

¹⁰hinaspam qawachkaptin churinkunata wañuchirqaku, kikintañataqmi ñawinkunata hurqorurqaku chaynataqmi Judá nacionpi llapallan kamachikuqkunatapas teqorurqaku.

¹¹Rey Sedequiastañataqmi ñawinkunata hurqorachispa bronce cadenawan watasqata Babilonia llaqtaman pusachirqa. Chaypim wañunankama carcelpi karqa.

¹²Babilonia nacionpa reynin Nabucodonosor chunka isqonniyuq wataña munaychakuchkaptinmi pichqa kaq killapa chunka kaq punchawninpim, Jerusalén llaqtaman chayaramurqa reyta waqaychaq soldadokunapa kamachiqnin Nabuzaradán.

¹³Paymi kañaykurqa Tayta Diospa templonta, reypa palacionta, Jerusalén llaqtapi llapa wasikunata hinaspa kamachikuqkunapa llapallan wasinkunatapas.

¹⁴Chaymantam reyta waqaychaq soldadokunapa capitanninwan Babilonia nacionniyuq llapa soldadokuna Jerusalén llaqtapa muyuriqninpi murallata taqmarurqaku.

¹⁵Hinaspam reyta waqaychaq soldadokunapa capitannin Nabuzaradanqa presocharuspa pusarqa Jerusalén llaqtapi puchuqkunatawan Babilonia nacionpa reyninman kuskanchakuq runakunata chaynataq común runakunatapas.

¹⁶Wakin wakcha runakunallatañam saqerurqaku uvas huertakunapi hinaspa chakrakunapi llamkanankupaq.

¹⁷Babilonia tropakunaqa Tayta Diospa templonpi bronce pilarkunatawan, broncemanta estanquetapas, tiyanankunatapas ñutuparuspankum chay bronceta Babiloniaman aparqaku.

¹⁸Aparqakutaqmi mankakunatapas, palakunatapas, mechero limpianakunatapas, tazonkunatapas, wisllakunatapas, broncemanta llapa serviciokunatapas,

¹⁹lavatoriokunatapas, incienso qontichinatapas, tazonkunatapas, mankakunatapas, candelabrokunatapas, wisllakunatapas chaynataq vino tallinankupaq vasokunatapas. Tukuy ima qorimanta chaynataq qollqemanta kaqkunatam capitán Nabuzaradán aparqa.

²⁰Tayta Diospa templonpaq Salomonpa ruwachisqan broncemanta iskay pilarkunapa, estanquepa chaynataq chay estanquepa tiyananpaq chunka iskayniyuq torokunapa haykam llasasqanqa manam yachakurqachu.

²¹Sapa pilarkunapa sayayninmi karqa pusaq metro masnin. Muyuriqninmi karqa pichqa metro parten. Chay pilarkunaqa karqa vacío ukuyuqmi hinaspa yaqa tawa dedo raktayuqmi.

²²Sapa pilarkunapa puntanmi broncemanta adornoyuqkama karqa. Sapa adornopa sayayninmi karqa iskay metro masnin, chay adornopa muyuriqninpas broncemanta granadakunawan hinaspa broncemanta mallawan adornasqam karqa. Iskaynin pilarkunam hina chaynalla karqa.

²³Pilarkunapa puntanpi kaq sapa adornopim karqa pachak granadakuna, chay pachak granadakunamantam isqon chunka soqtayuq sutilla rikurirqa.

²⁴Reyta waqaychaq soldadokunapa capitanninqa aparqataqmi sumo sacerdote Seraiastawan sacerdote Sofoniastapas chaynataq punkukunawan cuentallikuq kimsa runakunatapas.

²⁵Llaqtapi runakunamantapas soldadokunapa capitannintawan rey Sedequiaspa umachaqnin qanchis runakunata, guerrapaq runakunata huñumuq capitanta hinaspa llaqtapi ancha reqsisqa soqta chunka runakunatam presocharurqa.

²⁶Paykunatam reyta waqaychaq soldadokunapa capitannin Nabuzaradán, Ribla llaqtaman, Babilonia nacionpa reyninman pusarqa.

²⁷Babilonia nacionpa reynin kamachiptinmi Hamat law Ribla llaqtapi paykunata wañurachirqaku. Chaynatam Judá nacionniyuq runakunata allpankumanta huklaw nacionman presota aparqaku.

²⁸Qanchis wataña rey Nabucodonosor munaychakuchkaspanmi, Judá nacionmanta kimsa waranqa iskay chunka kimsayuq runakunata presota aparqa.

²⁹Chunka pusaqniyuq wataña munaychakuchkaspanñataqmi, Jerusalén llaqtamanta pusaq pachak kimsa chunka iskayniyuq runakunata presota aparqa.

³⁰Iskay chunka kimsayuq wataña rey Nabucodonosor munaychakuchkaptinmi, reyta waqaychaq soldadokunapa capitannin Nabuzaradán, Judá nacionmanta qanchis pachak tawa chunka pichqayuq runakunata presota aparqa. Llapallan preso apasqakunam karqaku tawa waranqa soqta pachaknin runakuna.

³¹Judá nacionpa reynin Joaquín, Babilonia nacionpi kimsa chunka qanchisniyuq wataña preso kachkaptinmi, chay watapa chunka iskayniyuq killanpa iskay chunka qanchisniyuq punchawninpi, Babilonia nacionpa reynin Evil-merodac, punta kaq wata munaychakuyninpi, rey Joaquinta carcelmanta hurqorurqa.

³²Kuyakuywan rimapayaspanmi Babilonia nacionpi wakin reykunamantapas aswan reqsisqataraq ruwaykurqa.

³³Carcelpi kasqan pachankunatapas mudarachirqam, chaynapim rey Joaquinqa wañukunan punchawkama Babiloniapa reyninwan kuska mikurqa.

³⁴Babilonia nacionpa reyninqa, sapa punchawmi rey Joaquinman wañukunan punchawkama mikuchirqa.