Read Biblia Revisión Chuya Qellqa 1992 – Chuya Qellqa 1992 Ezequiel 1 Bible Online

Ezequiel 1 - Biblia Revisión Chuya Qellqa 1992 – Chuya Qellqa 1992 bible

Ezequiel 1

¹Kimsa chunka watapa tawa kaq killanpa pichqa kaq punchawninpim, Quebar mayupa patanpi preso apasqakunawan kuska kachkarqani, hinaptinmi cielokuna kicharikuykuptin Diospa revelacionninta chaskirqani.

²Chayqa pasakurqa rey Joaquín preso apasqa kasqanmanta pichqa wataña pasaruptinmi, chay watapa [1]Tamuz sutiyuq killanpa pichqa kaq punchawninpi.

³Tayta Diosmi, Buzipa churin sacerdote Ezequielta rimapayarqa, Babilonia nacionpi Quebar sutiyuq mayupa patanpi. Chaypim Tayta Diosqa makinwan Ezequielta llapchaykurqa.

⁴Ñoqa Ezequiel qawariptiymi, norte lawmanta sinchi wayra pukumuchkasqa, huk yanay-yanay puyumantañataqmi llipyakuna lloqsimuchkasqa, chaypa muyuriqninpim llumpay kanchay kachkasqa. Chay llipyakunapa chawpinpim llipipipichkaq bronceman rikchakuq kachkasqa.

⁵Chaypa chawpinpim kachkasqa [2]tawa kawsaqkuna.

⁶Paykunaqa sapakamam tawa uyayuq hinaspa tawa raprayuq kasqaku.

⁷Chakinkunapas kasqa derechollam, situnkupas toropa hinam kasqa. Chay chakinkunam llipipipiq bronce hina kanchasqa.

⁸Paykunaqa tawa uyayuq hinaspa tawa raprayuq kaspapas sapakamam tawan waqtanpi runapa makin hina makiyuqkama kasqaku. Chay makinkuqa kasqa raprankupa ukunpim.

⁹Hukninpa rapranmi tupanakusqa hukninpa rapranwan. Purispankupas mana muyurispam ñawpaqman derecholla risqaku.

¹⁰Uyankupas kaynam kasqa: Ñawpaqmanmi runapa uyanman rikchakusqa, alleq lawmanmi leonpa uyanman rikchakusqa, ichoq lawmanmi toropa uyanman rikchakusqa, qepamanñataqmi ankapa uyanman rikchakusqa.

¹¹Raprankum altoman mastarikusqa. Chay mastarisqa raprankum iskay tupanakusqa waqtanpi kaqpa rapranwan, iskay raprankunawanñataqmi cuerponkuta tapakusqaku.

¹²Paykunaqa sapakamam mana muyurispanku derecholla risqaku. Risqakuqa maymanpas Diospa Espiritunpa pusasqanman hinam.

¹³Runaman rikchakuq chay kawsaqkunapa rikchayninmi kasqa rupachkaq sansa hina, otaq lenwachkaq antorcha hina. Chay antorcham paykunapa chawpinpi risqaraq kutirimusqaraq. Chay ninam llumpayta kancharisqa, chawpinmantañataqmi llipyakuna lloqsimusqa.

¹⁴Chay kawsaqkunam llipya hina kallpaylla risqaku kutimusqaku.

¹⁵Runaman rikchakuq kawsaqkunata qawachkaspaymi, pampapi huk ruedata rikururqani. Sapakamapa waqtanpim huk rueda kachkasqa.

¹⁶Chay ruedakunapa rikchayninmi llipipipichkaq crisólito otaq topacio rumiman rikchakusqa. Tawanmi chay rikchayniyuqlla kasqaku. Rikchayninkum kasqa iskay chakanakuq rueda hina.

¹⁷Maymanpas mana muyurispam ñawpaqman derecholla risqaku.

¹⁸Chay ruedakunam hatun aroyuqkama kasqaku. Chay arokunapa muyuriqninpim llipipipichkaq ñawikuna kasqa.

¹⁹Runaman rikchakuq kawsaqkuna puriptinkum, ruedakunapas paykunawan kuska purisqaku. Chay kawsaqkuna pampamanta hoqarikuptinkupas, paykunawantaqmi hoqarikusqaku.

²⁰Runaman rikchakuq kawsaqkunaqa, Espiritupa pusasqanman hinam maymanpas risqaku. Paykunawan kuskataqmi chay ruedakunapas hoqarikusqaku, chaynaqa kasqa chay kawsaqkunapipas chaynataq ruedakunapipas Diospa Espiritun kasqanraykum.

²¹Runaman rikchakuq kawsaqkuna puriptinkum ruedakunapas purisqaku, paykuna sayaptinqa ruedakunapas sayasqakutaqmi, pampamanta hoqarikuptinkupas paykunawan kuskam hoqarikusqaku, chay kawsaqkunapa espiritun ruedakunapipas kasqanrayku.

²²Paykunapa umankupa hawanpim kasqa huk bóveda, llipipipichkaq cristal hina.

²³Chay bovedapa ukunpim, kawsachkaq animalkunapa raprankuna derecholla mastarikusqa. Hukninpa rapranmi hukninpawan tupanakusqa. Iskaywanñataqmi sapakama cuerponkuta tapakusqaku.

²⁴Puriptinkum chay raprankupa qapariyninta uyarirqani. Chay qapariymi kasqa hatun mayupa kallpayninpa qapariynin hina, Tukuy Atiyniyuqpa qayakuynin hina, otaq nana-nanaq tropakunapa qapariynin hina. Sayaykuptinkuqa raprankupas cuerponkumanmi laqakuykuq.

²⁵Chayna sayaykuspa raprankuta uraykachiptinkum, bovedamanta huk qapariy lloqsimurqa.

²⁶Chay bovedapa hawanpiñataqmi, zafiromanta ruwasqa tronoman rikchakuqta rikurqani, chay tronopa hawanpim runaman rikchakuq kachkasqa.

²⁷Weqawninmanta hanaymanmi rikurqani ninawan intusqa llipipipichkaq bronceta hina, weqawmanta uraymanñataqmi ninaman rikchakuqta, muyuriqninpiñataqmi kanchariyta rikurqani.

²⁸Chay muyuriqninpi kanchariymi kasqa paramuptin puyu ukumanta rikurimuchkaq chirapa hina. Chaynatam Tayta Diospa kanchariynin ñoqaman rikuriykuwarqa. Chayta rikuruspaymi qonqoranpa pampaman kumuykurqani. Chaymantam rimapayamuwasqanta uyarirqani.