Read Biblia Revisión Chuya Qellqa 1992 – Chuya Qellqa 1992 Ezequiel 13 Bible Online

Ezequiel 13 - Biblia Revisión Chuya Qellqa 1992 – Chuya Qellqa 1992 bible

Ezequiel 13

¹Huktawan rimapayawaspanmi Tayta Dios kaynata niwarqa:

²Runapa churin, Israel nacionpi profeta tukuqkunapa contranpi, kikinkupa sonqonkumanta hurqospa llulla rimaq profetakunata kaynata nimuy: Tayta Diospa nisqanta uyariychik.

³Tayta Diosmi kaynata nin: ¡Ay, imaynaraq kankichik! Mana yachayniyuq profetakuna, mana rimapayachkaptiy umaykichikmanta hurqospa llulla rimaqkuna,

⁴Israelpa mirayninkuna, profetaykichikkunaqa raqaykunapi yachaq atoqkuna hinam.

⁵Israelta nanachikunankupaqqa manam perqallatapas allicharqakuchu, chaynapi Tayta Diospa castiganan punchaw guerra chayamuptin takyananpaqqa.

⁶Visionkuna rikusqankupas manam cheqapchu, profetizasqankupas llullam. Paykunaqa mana kachamuchkaptiymi “Tayta Diosmi kaynata nin” nispankuraq rimankupas, hinaspam imam rimasqanku cumplikunanta suyanku.

⁷¡Qamkunapa rikusqaykichik visionkunaqa manam cheqapchu! ¡Profetizasqaykichikpas llullam! Qamkunaqa ñoqapa rantiypi rimaqpaqraqmi hapikunkichikpas, ichaqa manam rimapayarqaykichikchu.

⁸Chayraykum ñoqa Tayta Dios kaynata nikichik: Qamkunaqa visionpipas pantaytam qawankichik, profetizaspapas llullallatam willakunkichik, chayraykum contraykichikpi kachkani. Ñoqa Tayta Diosmi chaynata nini.

⁹Chaynaqa, profeta tukuspa revelacionpi yanqa qawaqkunapa contranpim hinaspa llullata profetizaqkunapa contranpim hatarisaq, llaqtay huñunakuptinpas manam chaymanqa yaykunqakuchu. Sutinkupas manam Israelpa listanpiqa qellqasqachu kanqa; Israel allpamanpas manam paykunaqa kutinqakuchu. Chaynapim Tayta Dios kasqayta yachankichik.

¹⁰Arí, paykunaqa yanqa willakuykunawanmi runaykunata pantarachinku, mana hawkayay kachkaptin allinllam kachkanchik, nispanku; paykunaqa rikchakunku kuyuchkaq perqata ruwaruspa estucowan llusiqkunamanmi.

¹¹Chaynaqa, chay kuyuchkaq perqata estucowan llusiqkunata kaynata nimuy: Chay perqaqa wichiykunqam, nisyu parawan, rumi hina wichimuq runtu parawan hinaspa kallpawan pukumuq wayrawan,

¹²chaymi chay perqa tuñiykamuptin runakuna kaynata tapusunkichik: ¿Imataq pasarun estucowan llusisqaykichik perqataqa? nispanku.

¹³Chayraykum ñoqa Tayta Dios kaynata nini: Piñakuspaymi sinchi wayrata pukuchimusaq, sinchi paratawan runtu-paratam rumita hinaña chayachimusaq, chaynapi tukuy imatapas tuñichinaypaq.

¹⁴Chaynatam chay estucowan llusisqaykichik perqata tuñichisaq, cimientonpas rikurinankamam pampaman wikaparusaq. Chay tuñisqa perqakunapa chawpinpim qamkunapas wañunkichik. Chaynapim Tayta Dios kasqayta yachankichik.

¹⁵Chay perqamanwan chaynataq estucowan llusiqninkunamanmi piñakuyniyta kachaykusaq, hinaptinmi llapa runakuna kaynata ninqaku: Manam perqapas nitaq estucaqninkunapas kanñachu,

¹⁶Israelpi profeta tukuspa Jerusalenpi runakunaman mana hawkayay kachkaptin llullakuspa “hawkayaypim kachkanchik” nispa willaqkunapas manañam kankuñachu, nispanku. Ñoqa Tayta Diosmi chaynata nini.

¹⁷Runapa churin, runaykuna ukupi profeta tukuq warmikunata qaway. Paykunaqa kikinkupa sonqonkumanta hurqospam rimachkanku, chaynaqa paykunapa contranpi

¹⁸kaynata nimuy: ¡Ay, imaynaraq kankichik, llaqtayta pantachinaykichikpaq umapaq layqasqa velokunata, makipaq layqasqa pulserakunata ruwaq warmikuna! ¿Chaykunawan runaykunata engañaspaykichikchu qamkunañataq salvakuytaraq munachkankichik?

¹⁹Qamkunam huk aptay cebadallapaq hinaspa parten tantallapaq llaqtaypa qayllanpi sutiyta penqayman churankichik; wañunanpaq kaqkunatam “manam wañunkichu” ninkichik, kawsananpaq kaqkunatañataqmi “wañunkipunim” ninkichik. Chaynatam llaqtayta engañankichik, llaqtayñataqmi llullakusqaykichikta uyarin.

²⁰Chayraykum Ñoqa Tayta Dios kaynata nikichik: Ñoqam chay layqasqa velokunapa hinaspa pulserakunapa contranpi kachkani, chaywanmi qamkunaqa runaykunata engañaspa wichichirqankichik. Runakunatam makikichikmanta libraspay libreña kanankupaq kachaykusaq.

²¹Ruwasqaykichik velokunatapas llikiparuspaymi, llaqtayta makikichikmanta kachaykusaq, manañam mastaqa engañankichikñachu. Chaynapim Tayta Dios kasqayta yachankichik.

²²Mana llakichichkaptiypas qamkunam ichaqa llullakuynikichikwan allin ruwaq runakunata llakichirqanchik, mana allin ruwaqkunatañataqmi aswanraq mana allinkunata ruwanankupaq kallpancharqankichik, chaynapi castigoymanta mana salvakunankupaq.

²³Chaynaqa, yanqa visionkunatapas manañam chaskinkichikñachu, nitaqmi llulla profeciakunatapas willakunkichikñachu, llaqtaytam qamkunapa makikichikmanta librasaq, chaynapim Tayta Dios kasqayta yachankichik, nispa.