Read Biblia Revisión Chuya Qellqa 1992 – Chuya Qellqa 1992 Ezequiel 17 Bible Online

Ezequiel 17 - Biblia Revisión Chuya Qellqa 1992 – Chuya Qellqa 1992 bible

Ezequiel 17

¹Tayta Diosmi kaynata niwarqa:

²Runapa churin, Israelpa mirayninkunaman kay rikchanachiyta nimuy.

³Tayta Diosmi kaynata nin: Hatu-hatun ankam Líbano orqoman chayaramurqa, raprankunapas hatu-hatuntam mastarikurqa, purankunapas tukuy rikchaq colorniyuqmi kasqa. Paymi cedropa puntanman tiyarurqa.

⁴Chay sachapa ñawintam kuchururqa, hinaspam negociantekunapa nacionninman aparuspa paykunapa llaqtapiña churaramurqa.

⁵Allpamantapas huk muhuta hoqariykuspanmi tarpuna chakrapi tarpuykurqa. Wayawta tarpuchkaq hinam achka yakupa patanpi tarpurqa.

⁶Chay muhum wiñaruspan kallmasapa uvasman tikrakururqa; sayaynin taksalla kaptinpas kallmankunam anka lawman chutarikurqa, sapinkunapas uku-ukumanraqmi yaykurqa. Chay uvasmi sumaqllataña llanllarispan rurusapallaña rikurirurqa.

⁷Kasqataqmi huk hatu-hatun ankapas, raprasapallaña hinaspa purasapallaña. Hinaptinmi chay uvasqa sapinkunatawan kallmankunata chay anka lawman haywarirqa, chaynapi aswan achka yakutaraq qomunanpaq.

⁸Allin allpapim tarpusqa karqa, achka yakupa patanpim tarpusqa karqa, chaynapi kallmasapallaña kaspa rurunanpaq, hinaspa kuyayllapaq uvas sacha kananpaq.

⁹Chaynaqa, ñoqa Tayta Diospa nisqayta kaynata niy: Chay uvas plantaqa manam allinchu kanqa, punta kaq ankam sapinmanta pelaruspan rurunkunatapas wichirachinqa. Mana kallpallawan chaynataq mana achka runapa yanapasqallan sapinmanta chutaruptinkum ikllipankunapas chakirunqa.

¹⁰Huktawan plantasqa kaspapas manañam ikllinqañachu, intipa qespimunan lawmanta wayramuptinmi chakirunqa, maymi kasqanpim chakirunqa.

¹¹Tayta Diosmi kaynata niwarqa:

¹²Chay mana kasukuq llaqtata kaynata tapuy: ¿Manachu yachankichik kay rikchanachiypa imam ninanta? nispa. Chaynaqa, paykunaman kaynata niy: Babilonia nacionpa reyninmi Jerusalén llaqtaman hamuruspan reytawan kamachikuqkunata presocharuspan Babilonia nacionman aparurqa.

¹³Chaymantam reypa churinta hapirurqa, hinaspam huk contratota ruwaspan payllaman hapipakuspa kasukunanpaq obligaspa jurachirqa. Chaymantam chay nacionpi ancha reqsisqa runakunata aparqa.

¹⁴Chaynataqa ruwarqa Judá nación manaña kallpayuq kaspa mana contranpi hoqarikunanpaqmi, chaynapi contrato ruwasqankuta cumplispa kawsanankupaq.

¹⁵Ichaqa chay contrato ruwasqankuta mana kasukuspanmi, Egipto nacionman runankunata kamachirqa, chaynapi caballokunata, achkallaña tropakunata mañamunankupaq. ¿Yaqachum qamkuna creenkichik chayna ruwaq allin lloqsiruspa kawsachkaqraq ayqerunanta? ¿Creenkichikchu contrato ruwasqanta mana kasukuchkaspa kawsarunanta?

¹⁶Chayraykum ñoqa Tayta Dios kaynata nini: Chay runaqa Babilonia reypa kasqanpim wañumunqa, tronoman churaqnin reywan pacto ruwasqanta mana cumplisqanrayku.

¹⁷Babilonia nacionpa reyninmi Jerusalén llaqtata atacaspan llaqtapa muyuriqninpi rampakunatawan murallakunata ruwaspan achkallaña runakunata wañuchinqa. Rey Faraonpas manam nana-nanaq tropankunata yanapananpaq kamachimunqachu.

¹⁸Judapa reyninqa mana haykapipas qepanchananpaq juraspa pacto ruwasqantam yanqacharurqa. Chaykuna ruwasqanmantam wañunqapuni.

¹⁹Chayraykum ñoqa Tayta Dios kaynata nini: Payqa juramento ruwawasqantam yanqacharurqa, ñoqawan pacto ruwasqaykutam pakirurqa, chayraykum castigasaqpuni.

²⁰Mallaytam payman wischuykusaq, toqllaywanmi hapirusaq, Babilonia nacionmanmi apachisaq, chaypim saqewasqanmanta juzgasaq.

²¹Allinnin soldadonkunapas guerrapim wañunqaku, puchuqkunañataqmi tukuy hinastinman cheqechisqa kanqaku, chaynapim yachanqaku ñoqa Tayta Dios rimasqayta.

²²Ñoqa Tayta Diosmi kaynata nini: Chay cedro sachapa puntantam wituruspay plantarusaq; allinnin kallmanpa ñawinta wituruspaymi alto-alto orqopa puntanpi plantarusaq.

²³Israel nacionpa hatun orqonpim plantarusaq, kallmankunatapas mastarispam rurunqa, chaynapim payqa suma-sumaq cedro sachaña rikurirunqa, ukunpipas tukuy rikchaq alton pawaq animalkunam yachanqaku.

²⁴Chaynapim llapallan purun sachakunapas Tayta Dios kasqayta yachanqaku, hatun tukuq sachata pampaman wikapaspaymi taksa kaq sachataña wiñachisaq, verde sachatam chakichini chaki sachatañataqmi verdeyachini. Ñoqa Tayta Diosqa imam nisqaytaqa cumplinipunim.