Read Biblia Revisión Chuya Qellqa 1992 – Chuya Qellqa 1992 Ezequiel 33 Bible Online

Ezequiel 33 - Biblia Revisión Chuya Qellqa 1992 – Chuya Qellqa 1992 bible

Ezequiel 33

¹Tayta Diosmi rimapayawaspan kaynata niwarqa:

²Runapa churin, llaqtamasikikunata kaynata niy: Sichum hukkaqnin nacionman guerrata apachiptiyqa, chay nacionpi runakunam llaqtata cuidananpaq hukkaqnin runata akllaspa churanqaku.

³Paymi llaqtaman enemigo hamuqta rikuruspanqa trompetata tocanqa, chaynapi llaqta runakuna enemigo hamusqanta yachanankupaq.

⁴Chay runa trompetata tocachkaptin pipas mana kasukuqqa, enemigopa wañuchisqanmi kanqa; wañusqanmantaqa kikinmi huchayuq kanqa.

⁵Payqa trompetata uyarichkaspam mana kasukurqachu, chayraykum wañusqanmantaqa kikinpuni huchayuq kanqa. Kasukuspanqa manam wañunmanchu karqa.

⁶Sichum enemigo hamuqta rikuchkaspa llaqta cuidaq mana trompetata tocanmanchu runakuna alistakunankupaq, chaynapi enemigokuna yaykuramuspa pitapas wañurachiptin chay runa hina huchallanpi wañuruptinqa, llaqta cuidaqtam cuentata mañasaq.

⁷Runapa churin, qamtam Israelpa mirayninkunata cuidanaykipaq churayki, qanmi uyariwaspayki ñoqapa kamachisqayta paykunaman willanki.

⁸Sichum mana allin ruwaq runata nisaq: “Wañunkipunim” nispa, ichaqa chay mana allin kawsasqanmanta wanakunanpaq chay runata mana rimapayachkaptiki hina huchallanpi wañukunqa , hinaptinqa chay wañukusqanmantam cuentata mañasqayki.

⁹Sichum chayna kawsasqanmanta wanakunanpaq rimapayachkaptiki mana wanakuspanqa, kikinmi huchanmanta wañunqa, qanmi ichaqa mana huchayuq kanki, nispa.

¹⁰Runapa churin, Israelpa mirayninkunaman kaynata niy: Qamkunam kaynata nirqankichik: “Huchaykuwan mana kasukuyniykum hawaykupi kachkan, chayraykum kawsachkaspallaraq ismupakuchkanikuña; chaynaqa ¿imaynataq kawsaymanku?” nispaykichik.

¹¹Paykunaman ñoqa Tayta Diospa nisqayta kaynata niy: Ñoqa Tayta Diosmi sutiyrayku kaynata nikichik: Mana allin ruwaq runapa wañunantaqa manam munanichu, aswanqa mana allin ruwasqanmanta wanakuspa kawsakunantam munani. Chaynaqa, Israel miraykuna ¡mana allin kawsasqaykichikmanta wanakuspa kutirikamuwaychik! ¿Imanasqataq huchaykichikpi wañunkichik? nispa.

¹²Runapa churin, llaqtamasikikunaman kaynata niy: Sichum allin ruwaq runa huchaman wichiykuptinqa, ñawpaqta allin kaqkuna ruwasqankunapas manam salvanqachu. Sichum huchasapa runa huchanmanta wanakuruspanqa, ñawpaqta mana allinkuna ruwasqanmantaqa manam wañunqachu. Allin ruwaq runa huchallikuruptinqa, ñawpaqta allinkuna ruwasqanpas manam salvanqachu.

¹³Sichum allin ruwaq runata nisaq: “Kawsankipunim” nispay, hinaptin payñataq allin ruwasqanpi hapipakuspan mana allin ruwaytaña qallaykunqa, hinaptinqa allin ruwasqankunapas qonqasqam kanqa, huchallikusqanraykum wañunqa.

¹⁴Sichum mana allin ruwaq runata nisaq: “Wañunkipunim” nispay, hinaptin payñataq huchanmanta wanakuspan allin arregloman hina allintaña ruwaspan,

¹⁵prenda hapisqantapas dueñonman kutiykachipuspan mana allinkunatapas manaña ruwanqachu, aswanqa decretoykunaman hinaña ruwaspanqa kawsanqapunim, manam wañunqachu,

¹⁶hucha ruwasqanpas manam yuyasqañachu kanqa. Payqa allin arregloman hina allintaña ruwasqanraykum kawsakunqa.

¹⁷Ichapas llaqtamasikikuna ninmanku: “Señorqa manam allin arregloman hinachu ruwachkan” nispanku, ichaqa paykunam mana allinkunataqa ruwachkanku.

¹⁸Sichum allin ruwaq runa allin ruwasqanta saqeruspan huchaman wichiykuspanqa, chay huchanmantam wañunqa.

¹⁹Sichum mana allin ruwaq runa, mana allin ruwasqanmanta wanakuspa allin arregloman hinaña allinta ruwaspanqa, allin kaqkuna ruwasqanraykum kawsanqa.

²⁰Qamkunam ichaqa kaynata nirqankichik: “Señorqa manam allin arregloman hinachu ruwachkan” nispaykichik. Israel miraykuna, ñoqaqa juzgasqaykichik imaynam kawsasqaykichikman hinam, nispa.

²¹Preso apasqa kasqaykumanta chunka iskayniyuq watapa chunka kaq killanpa pichqa kaq punchawninpim, Jerusalenmanta ayqemuq runa qonqayta chayaramurqa, hinaspam kaynata niwarqa: ¡Jerusalén llaqtam enemigopa makinman wichiykun! nispa.

²²Jerusalén llaqtamanta lluptimuqpa chayamusqanpa ñawpaqnin tutatam makinta Tayta Dios ñoqaman churaykurqa; hinaptinmi chay runapa chayamusqan achikyaqtañataq mana rimaq kachkaptiy Tayta Dios huktawan simiyta kichaykurqa.

²³Tayta Diosmi rimapayawaspan kaynata niwarqa:

²⁴Runapa churin, Israel nacionpi kaq purmasqa llaqtakunapi yachaqkunam kaynata nichkanku: “Abrahamqa sapallan kachkaspanpas kay allpatam hapikuykurqa, ñoqanchikqa paymantaqa achkam kachkanchik, hinaspaqa aswanraqchiki kay allpataqa hapikuykusun”, nispanku.

²⁵Chaynaqa, ñoqa Tayta Diospa nisqayta kaynata niy: Qamkunaqa aychatapas yawarnintintam mikuchkankichik, idolokunata yupaychaspaykichikmi runakunatapas wañuchichkankichik. ¿Chaykunata ruwachkaspachu kay allpa hapikuykuytaraq munachkankichik?

²⁶Qamkunaqa guerrallaman atipakuqmi kankichik, millakusqay kaqkunatam ruwankichik, runamasikichikpa warminwanmi huchapakunkichik. ¿Chayna kachkaspachu kay allpa hapikuykuytaraq munachkankichik?

²⁷Ñoqa Tayta Diospa nisqayta paykunaman kaynata niy: Ñoqaqa sutiyraykum kaynata nini: Purmasqa llaqtakunapi yachaqkunaqa guerrapim wañunqaku, chakrakunapi yachaqkunatañataqmi purun animalkuna mikunqa; qaqakunapi machaykunapi yachaqkunañataqmi peste onqoywan wañunqaku.

²⁸Chay naciontaqa purmarachispaymi chunnichkaqta saqerusaq, kallpaykichiktawan hatun tukuynikichiktam chinkarachisaq. Israel nacionpi orqokunapas chunninqam, chaynintaqa manañam pipas pasanqakuñachu.

²⁹Chay naciontam purmarachispa chunnichkaqtaña saqerusaq, chaynataqa ruwarusaq millakuypaq kaqkunata ruwasqankuraykum. Chaynapim Tayta Dios kasqayta yachanqaku.

³⁰Runapa churin, qampa llaqtamasikikunam perqakunapa waqtanpi hinaspa wasikunapa punkunpi qampa contraykipi kaynata rimachkanku: “Rispa Tayta Diospa imam rimasqanta uyarimuychik”, nispanku.

³¹Chaynapim runaykunaqa costumbrenkuman hina uyarinankupaq hamuspanku ñawpaqnikipi tiyaykusparaq uyarisunki, ichaqa manam ruwayman churanqakuchu. Paykunaqa kuyanakuqkunapa takinta hinaraqmi rimanku, sonqonkum ichaqa qollqellapi yuyaymanachkan.

³²Qamqa paykunapaqqa kanki kuyanakuymanta takiq hinallam, allinta takispa arpata miskillataña tocaq hinallam. Paykunaqa uyarisuspaykipas manam kasukunkuchu.

³³Ichaqa kay nisqaykunam cumplikunqa, chaynapim chawpinkupi huk profetay kasqanta yachanqaku.