Read Biblia Revisión Chuya Qellqa 1992 – Chuya Qellqa 1992 Ezequiel 36 Bible Online

Ezequiel 36 - Biblia Revisión Chuya Qellqa 1992 – Chuya Qellqa 1992 bible

Ezequiel 36

¹Runapa churin, Israel nacionpi orqokunaman ñoqa Tayta Diospa nisqayta kaynata niy:

²Israel nacionpa enemigonkunam kaynata ninku: “Wiñaypaq kaq orqokunaqa ñoqanchikpañam”, nispanku.

³Chaynaqa, ñoqa Tayta Diospa nisqayta kaynata profetizay: Qamkunataqa kayninta chayninta atacamuspam tuñichisurqankichik. Huklaw nacionkunam qamkunamanta munaychakururqaku; llapa runakunañataqmi qamkunamanta burlakuspa asikurqaku.

⁴Chaynaqa, Israel nacionpi orqokuna Tayta Diospa nisqanta uyariychik. Orqokunata, moqokunata, qechwakunata, wayqokunata, purmachisqa llaqtakunata hinaspa chunnichisqa llaqtakunatam Tayta Dios kaynata nin: Qamkunam muyuriqnikichikpi llaqtakunapa suwasqan karqankichik, chay llaqtakunam qamkunamanta burlakuspa asikurqaku.

⁵Ñoqaqa cheqaptapunim llapa nacionkunapa contranpi piñakuruni, Edompaqmi mastaqa piñasqa kachkani. Paykunaqa kusikuywan hinaspa hatun despreciowanraqmi allpayta hapikuykuspanku chakraykunatapas saquearqaku.

⁶Chaynaqa, Ñoqa Tayta Diospa nisqayta Israel allpa imayna kaynanmanta profetizamuy: Orqokuna, moqokuna, qechwakuna, wayqokuna, Tayta Diosmi kaynata nisunkichik: Wakin nacionkunapa penqayman churasusqaykichikmantam chay nacionkunapaq llumpayta piñakuruni.

⁷Chayraykum ñoqa Tayta Dios kaynata nini: Chay muyuriqnikichikpi nacionkunam penqayman churasqa kanqaku.

⁸Israel nacionpi orqokuna, qamkunam ichaqa kallmasapallaña sachayuq kankichik. Qamkunaqa Israel runaykunapaqmi sumaqllataña rurunkichik, paykunapa kutimunanqa hichpamuchkanñam.

⁹Waqaychaptiymi qamkunaqa yapusqa hinaspa tarpusqa kankichik.

¹⁰Ñoqapunim chaypi yachaq Israel runakunata mirachisaq. Llaqtakunapas runakunapa musoqmanta yachananmi kanqaku. Purmasqa raqaykunapas huktawan hatarichisqam kanqaku.

¹¹Qamkunapi kaq runakunatapas, animalkunatapas ñoqam mirachisaq. Chaynapim paykunaqa nana-nanaqta miranqaku. Ñawpaq tiempopi hinaraqmi qamkunataqa chaypi kawsachisqaykichik. Qamkunataqa ñawpaq tiempomantapas aswan allintaraqmi ruwasqaykichik. Chaynapim Tayta Dios kasqayta yachankichik.

¹²Israel nacionpi orqokuna, runaykunatam qamkunapi purichisaq. Paykunapa herencianñam kankichik. Wawa-churinkutapas manañam wañuchinkichikñachu.

¹³Ñoqa Tayta Diosmi kaynata nini: “Orqokuna, runa mikuq kasqaykichikmantam rimanku. Qamkunapi yachaq llaqtakunatapas mikuruspas mana wawa-churiyuqtaña saqerunkichik”.

¹⁴Ichaqa manañam huktawanqa runakunata mikunkichikñachu nitaqmi nacionnikichikpi wawakunatapas wañuchinkichikñachu. Ñoqa Tayta Diosmi chaynata nini.

¹⁵Manañam huklaw nacionniyuqkunapa kamikuynintawan tratakuynintaqa uyarichisqaykichikñachu. Nacionnikichikpi wawa-churikunatapas manañam wañuchinkichikñachu. Ñoqa Tayta Diosmi chaynata nini.

¹⁶Tayta Diosmi kaynata niwarqa:

¹⁷Runapa churin, Israelpa mirayninkuna allpankupi yachaspaqa mana allin kawsayninkuwan chaynataq mana allin ruwayninkuwanmi millakuypaqtaña ruwarurqaku; paykunapa kawsasqankuqa qayllaypim karqa, imaynam killanwan onqoq warmipa qachan hina.

¹⁸Chayraykum chay nacionta yawarta chaqchuspanku idolokunawan millakuypaqta ruwasqankumanta llumpay piñakuyniywan castigarqani.

¹⁹Chayna mana allin ruwasqankumanta castigaspaymi tukuy hinastinpi kaq nacionkunaman cheqerachirqani.

²⁰Maylaw nacionmanña rispapas ñoqapa chuya sutiytam penqayman churarqaku. Runakunam kaynata niqku: “Kay runakunaqa Tayta Diospa runankuna kachkaspapas nacionninkumantam lloqsiramunku”, nispanku.

²¹Israelpa mirayninkuna maymi chayasqanku nacionkunapi chuya sutiyta penqayman churasqankuta qawaspaymi llumpay llakisqa karqani.

²²Chaynaqa, ñoqa Tayta Diospa nisqayta Israelpa mirayninkunaman kaynata willay: Israelpa mirayninkuna, kay ruwasqaytaqa manam qamkunaraykuchu ruwasaq, aswanqa chuya sutiyraykum. Qamkunaqa mayman rispapas chuya sutiytam penqayman churarqankichik.

²³Llapa nacionkunapa chawpinpi penqayman churasqaykichik sutiytam paykuna qawasqanta chuyanchasaq. Chaynapim Tayta Dios kasqayta yachanqaku. Ñoqa Tayta Diosmi chaynata nini.

²⁴Ñoqapunim lliw nacionkunamanta hurqomusqaykichik, chaykunamanta huñumuspam allpaykichikman kutichisqaykichik.

²⁵Imawanpas qachachakusqaykichiktam chuya yakuwan mayllasqaykichik, idolokunawan qachachakusqaykichikmantam chuyanchasqaykichik.

²⁶Musoq sonqotaña churaykuspaymi musoq espiritutaña qosqaykichik. Rumi sonqoykichikta hurqoruspaymi aycha sonqotaña churasqaykichik.

²⁷Espirituyta qoykuspaymi decretoykunata cumplichisqaykichik, chaynapim kamachikuyniykunatapas kasukunkichik.

²⁸Ñawpaq taytaykichikkunaman qosqay allpapiña kawsaspam runaykunaña kankichik, ñoqañataqmi Diosnikichik kasaq.

²⁹Manaña imawanpas qanrachakunaykichikpaqmi waqaychasqaykichik. Trigotapas llumpayta ruruchiptiymi manaña huktawanqa yarqaymanta kankichikñachu.

³⁰Sachaykichiktapas llumpaytam ruruchisaq, chakraykichikpi cosechakunatapas allintam qespichisaq, chaynapim huklaw nacionniyuqkunapa qayllanpiqa manaña yarqaymantapas kankichikñachu.

³¹Chaynapim qamkunaqa mana allin kawsasqaykichiktawan mana allin ruwasqaykichikta yuyarinkichik, hinaspam mana allinkunata ruwaspa huchallikusqaykichikmanta penqakunkichik.

³²Israel runakuna, allinta yachaychik, kaykunataqa manam qamkunaraykuchu ruwasaq. Qamkunaqa mana allin ruwasqaykichikmantayá penqakuychik. Ñoqa Tayta Diosmi chaynata nini.

³³Ñoqa Tayta Diosmi kaynata nini: Mana allin ruwasqaykichikkunamanta chuyancharuspaymi yachanaykichik llaqtakunapi huktawan kawsachisqaykichik, purmasqa raqaykunapas huktawan hatarichisqam kanqa.

³⁴Purmasqa chakrakunapas llapallan puriqkunapa qawasqantam tarpusqa kanqa.

³⁵Hinaptinmi ninqaku: “Kay purmasqa chakraqa Edén lawpi huerta hinaraqmi rikurirun; tuñichisqa, purmachisqa hinaspa chunnichisqa llaqtakunapas kunanqa murallasqa hinaspa runakunapa yachasqan llaqtakunañam kachkan”, nispanku.

³⁶Chaynapim muyuriqnikichikpi qepaq nacionkuna yachanqaku tuñichisqa kaqkunata ñoqa Tayta Dios musoqmanta hatarichisqayta, purmachisqa chakrakunatapas kaqllamanta tarpusqayta. Ñoqa Tayta Diosmi chaynata nini, nisqayqa ruwasqam kanqa.

³⁷Ñoqa Tayta Diosmi kaynata nini: Chaywanpas ñoqaqa Israel llaqtapa qayakusqanraqmi kasaq kaykuna ruwanaypaq: Paykunatam ovejakunata hina achkallataña mirarachisaq.

³⁸Imaynam fiesta punchawkunapi sacrificanankupaq nana-nanaq ovejakuna pusasqanku Jerusalén llaqtapi tarikun, chaynam purmasqa llaqtakunapas nana-nanaq runakunapa huntaykusqan kanqaku. Chaynapim Tayta Dios kasqayta yachanqaku.