Read Biblia Revisión Chuya Qellqa 1992 – Chuya Qellqa 1992 Ezequiel 9 Bible Online

Ezequiel 9 - Biblia Revisión Chuya Qellqa 1992 – Chuya Qellqa 1992 bible

Ezequiel 9

¹Chaymantam nisyuta qaparispan kaynata niwarqa: Llaqta castigaqkunam chayamuchkanña, paykunaqa tuñichinankupaqmi herramientantinkama hamuchkanku, nispa.

²Hinaptinmi rikurqani norte lawman qawaq hatun kaq punkunta soqta runakuna hamuchkaqta. Chay runakunaqa sapakamam mazo aptarisqakama hamuchkasqaku. Paykunapa chawpintam huk runa linomanta pachayuq hamuchkasqa. Chay runam weqawninman watasqata qellqananpaq tinterota apamuchkasqa, yaykuramuspankum broncemanta altarpa waqtanpi sayaykurqaku.

³Chaymi Israelpa yupaychasqan Tayta Diospa kanchariynin, querubinkunapa hawanmanta hoqarikuruspan templopa punkunman rirqa. Hinaptinmi weqawninman watasqa qellqananpaq tinterota apaq linomanta pachasqa runata Tayta Dios qayarqa,

⁴hinaspanmi nirqa: Jerusalén llaqtapa chawpinkunata muyurimuy hinaspa llaqtapi millakuypaq kaqkuna ruwasqankuta qawaspa llakikuymanta waqaqkunapa urkunpi huk señalta churamuy, nispa.

⁵Wakintañataqmi ñoqa uyarichkaptiy kaynata nirqa: Paypa qepanta rispaykichik wañuchimuychik, amam pitapas llakipayankichikchu.

⁶Ama hukllatapas puchuykuspam yuyaqkunatapas, jovenkunatapas, sipaskunatapas, wawakunatapas hinaspa warmikunatapas wañuchimunkichik; urkunpi señalniyuq kaqkunatam ichaqa ama imanankichikchu. Temploypi kaqkunamantam wañuchiytaqa qallaykunkichik, nispa. Chaymi templopa ñawpaqninpi kaq ancianokunamanta wañuchiyta qallaykurqaku.

⁷Paykunataqa kaytapas nirqataqmi: Temploman rispa millakuypaqta ruwamuychik, pationtapas wañusqakunawan huntachimuychik, nispa. Hinaptinmi lloqsiruspanku llaqtapi runakunata wañuchiyta qallaykurqaku.

⁸Wañuchinankukamam sapallayña qeparurqani. Chaymi qonqoranpa kumuykuspay kaynata qaparirqani: Dios Taytalláy ¿Jerusalén llaqtaman piñakuynikita kachaykamuspachu Israelpa mirayninmanta asllaña puchuqkunatapas tukurunki? nispay.

⁹Hinaptinmi Tayta Dios kaynata niwarqa: Israel runakunapa mana allin ruwasqankuqa hatu-hatunmi. Kay nacionmi yawarpa pampaykusqan rikurirun, kay llaqtapas llumpay mana allin ruwaykunapa huntasqanmi kachkan. Paykunam kaynata nirqaku: “Tayta Diosmi kay nacionmanta karunchakurun, imam ruwasqanchiktapas manam rikunchu”, nispanku.

¹⁰Paykunataqa manaña llakipayaspam castigasaq, paykunamanqa imaynam kawsasqankuman hinam pagapusaq, nispa.

¹¹Hinaptinmi linomanta pachayuq weqawninpi tintero apaq runa kutiramuspan kaynata nirqa: Kamachiwasqaykitaqa ruwaramuniñam, nispa.