Read Biblia Revisión Chuya Qellqa 1992 – Chuya Qellqa 1992 Oseas 11 Bible Online

Oseas 11 - Biblia Revisión Chuya Qellqa 1992 – Chuya Qellqa 1992 bible

Oseas 11

¹Tayta Diosmi kaynata nin: Warma kasqanmantam Israelta kuyarqani, churiytam Egipto nacionmanta qayamurqani.

²Ichaqa aswan-aswan qayachkaptiypas aswanraqmi ñoqamanta karunchakurqaku, Baal idolomanraqmi sacrificiokunatapas qorqaku, idolokunapaqraqmi inciensokunatapas qontichipurqaku.

³Ñoqam Efraín llaqtata makinmanta pusaspa puriyta yachachirqani, chaywanpas manam reqsikurqakuchu waqaychaqninku kasqayta.

⁴Paykunataqa kuyakuywanmi pusamurqani, kuyay sonqoywanmi pusamurqani; paykunataqa ñuñuq wawakunata hinam qasqoyman asuykachirqani, mikuchinaypaqmi paykunaman kumuykurqani.

⁵Paykunam ichaqa ñoqaman kutirikamuwayta mana munarqakuchu, chayraykum kaqllamanta Egiptopi esclavo kamunqaku, Asiria nacionpas paykunapim munaychakunqa.

⁶Llaqtaykikunapas guerrapa tukusqanmi kanqa, runaykikunatapas enemigoykikunam wañuchinqa, mana allin tanteasqaykikunapas chaypim tukunqa.

⁷Llaqtayqa hinallaraqmi ñoqamanta karunchasqa kachkan, chayraykum qayakamuwaptinpas mana uyarisaqchu.

⁸¿Efraín llaqtalláy, imaynataq saqeruykiman? ¿Israel llaqtalláy, imaynataq qoykuykiman? ¿imaynataq Adma llaqtata hinaqa qoykuykiman? ¿imaynataq Zeboim llaqtata hinaqa saqeruykiman? sonqoymi qamkunamanta llumpayta llakikun, chayraykum munaspaypas mana atinichu.

⁹Manam imatapas ruwasaq sinchi piñakuyniyman hinachu Efraintapas kaqmanataqa manam chinkachisaqñachu, ñoqaqa Diosmi kani manam runachu, ñoqaqa chawpikichikpi kaq Chuya Diosmi kani; qamkunamanqa manam piñakuywanchu hamusaq.

¹⁰León hinaraq Tayta Dios qapariptinmi paykunañataq qepanta qatikunqaku, león hinaraq qapariptinmi, churinkuna katkatatastin intipa seqaykunan lawmanta hamunqaku.

¹¹Alton pawaq urpikuna hinam Egiptomanta katkatatastin pawamunqaku; palomakuna hinam Asiriamanta katkatatastin hamunqaku, chaymi yapamanta wasinkupiña kawsachikusaq. Tayta Diosmi chaynata nin.

¹²Efrainmi llullawan inturuwan, Israelmi engañowan muyuruwan. Judapas Chuya Diosmanta rakikuruspanmi idolokunamanña qokurun.