Read Biblia Revisión Chuya Qellqa 1992 – Chuya Qellqa 1992 Oseas 14 Bible Online

Oseas 14 - Biblia Revisión Chuya Qellqa 1992 – Chuya Qellqa 1992 bible

Oseas 14

¹Israel castakuna, Tayta Diosman kutirikuychik; huchaykichikraykum qamkunaqa urmarunkichik.

²Tayta Diosman kutirikuspa kaynata ruegakuychik: “Tukuy mana allin ruwasqaykumanta pampachaykuwayku, kuyakuynikiwanyá simiykumanta lloqsiq yupaychayniykuta chaskiykuwayku.

³Asiriaqa manam salvawanmankuñachu, guerrapaq caballokunapipas manañam sillakusaqkuñachu; makiykuwan ruwasqayku idolokunatapas manañam: “Diosnillayku” nisaqkuñachu; aswanqa wakchakunapas qam Diosnillaykupin llakipayakuyta tarinku”, nispaykichik.

⁴Tayta Diosmi kaynata nin: Mana kasukuynikichiktam hampiykusqaykichik, mana pipapas harkakusqanmi kuyasqaykichik, qamkunamantaqa piñakuyniypas ñam karunchakurunña.

⁵Israelpa mirayninkunapaq sulla hinaraq kaptiymi paykunañataq amanqay hinaraq waytarinqaku, Líbano montepi sachakuna hinaraqmi sapinchakunqaku.

⁶Kallmankutam mastarinqaku, aceitunas sacha hina kuyayllapaqñam kanqaku, cedrokuna hinaraqmi miskillataña asnarinqaku.

⁷Ñoqapa llantuyniypim huktawan kawsakunqaku, trigo hinaraqmi wiñayta qallaykunqaku, uvas sacha hinaraqmi sumaqllataña waytarinqaku, Líbano montepi vino hinaraqmi ancha reqsisqa kanqaku.

⁸Chayraqmi Efrainpa mirayninkunaqa ninqaku: “Idolokunamantaqa manam imapas qokuwankuñachu”, nispanku. Ñoqam mañakuyninkutapas uyariykusaq, ñoqataqmi paykunataqa waqaychasaqpas. Paykunapaq kallmasapallaña pino hina kaptiymi paykunapa rurunpas ñoqamanta paqarimunqa.

⁹Yachayniyuq runaqa kay willakuyniyta entiendechun, allin tanteakuq runaqa kay nisqaykunata yachachun. Diospa ñanninkunaqa mana pantayniyuqmi, allin ruwaq runaqa chaynintam purinqa, mana kasukuq runakunam ichaqa chaypi urmarunqa.