Read Biblia Revisión Chuya Qellqa 1992 – Chuya Qellqa 1992 Joel 2 Bible Online

Joel 2 - Biblia Revisión Chuya Qellqa 1992 – Chuya Qellqa 1992 bible

Joel 2

¹Sión moqopi trompetata tocaychik, sapaqchakusqay orqopi guerrapaq cornetata tocaychik, kay nacionpi yachaqkuna katkatataychik; Tayta Diospa punchawninmi chayamuchkanña, Tayta Diospa punchawninmi hichpamuchkanña.

²Chay punchawqa tutayaymi kanqa, tutayaypa yana puyupa pampaykusqanmi kanqa. Imaynam paqariypi achkiy urqukunapi mastarikun, chaynam huk kallpasapa llaqta achkallaña tropayuq hamuchkan, chayna tropakunaqa ñawpaqtapas manam karqachu, nitaqmi qepamanpas kanqachu.

³Paykunapa ñawpaqnintam tukuy imata nina ruparunqa, qepantañataqmi lenwachkaq nina tukuy imata tukurunqa; paykunapa ñawpaqninpim manaraq chayasqanku allpaqa Edén huerta hina kanqa, paykunapa qepanta puchuqmi ichaqa purmachisqa mana imapa kanan chunniqña kanqa; paykunamantaqa manam imapas lluptinqachu.

⁴Caballokuna hinam rikchayninkupas, caballopi sillada hinaraqmi kallpankupas.

⁵Orqonkunata pawasqankupas carretakunapa qapariynin hinaraqmi uyarikun, chapra kañasqa toqyachkaq hinaraqmi uyarikun. Paykunaqa rikchakun guerrapaq alistasqa kallpasapa tropakunamanraqmi.

⁶Ñawpaqninkupiqa runakunapas manchakuymantam katkatatanku, manchakuymantam uyankupas ayayarun.

⁷Allinnin qari-qari soldadokuna hinaraqmi kallpanqaku, guerrapaq tropakuna hinaraqmi perqatapas seqanqaku; mana maymanpas muyurispam sapakama maymi rinanku ñanninta rinqaku.

⁸Manam mayqanpas riqmasinta tanqanqachu, sapakamam maymi rinanta rinqaku; flechakunapa chawpintapas mana cheqeykuspam ñawpaqman rinqaku.

⁹Kallpayllam llaqtamanpas yaykurunqaku, perqakunatapas utqaymanmi seqarunqaku, wasikunamanpas qespiruspankum suwa hina ventananta yaykurunqaku.

¹⁰Paykunapa ñawpaqninpiqa kay pachapas katkatatanraqmi, cielokunapas kuyupakunraqmi, intipas killapas tutayarunraqmi, chaskakunapa kanchayninpas antayanraqmi.

¹¹Tropankunapa ñawpaqninpim Tayta Diosqa rayo hinaraq qaparin, tropankunaqa mana yupay atinam, paypa kamachisqanta ruwanankupaq atiyniyuqmi; ¡mayna manchakuypaqmi Tayta Diospa punchawninqa! ¿Pitaq chay punchawta aguantayta atinman?

¹²Tayta Diosmi kaynata nin: Qamkunaqa tukuy sonqowan kutirikamuwaychik, ayunowan, waqakuywan hinaspa qapariywan kutirikamuwaychik.

¹³Qamkunaqa sonqoykichikta llikipaychik, ama pachaykichiktachu; Tayta Diosman kutirikamuychik, payqa kuyapayakuspa llakipayakuqmi; anaqta piñakuspa llumpay kuyapayakuqmi, castigananpaqña kachkaspapas pampachakuqmi.

¹⁴Icharaqpas llakipayaykususpaykichik bendeciykusunkichikmanraq, chaynapi vinotawan kawsaykunata Tayta Diosman ofrecenaykichikpaq.

¹⁵Sión moqopi cornetata tocaychik, ayunoman qayaspa runakunata huñuychik.

¹⁶Paykunata huñumuspa Diospaq chuyanchaychik, yuyaqkunata, warmakunata hinaspa ñuñuq wawakunata huñumuychik; noviopas wasinmanta lloqsimuchun, noviapas puñunanmanta lloqsimuchun.

¹⁷Templopa punkunmanta altarman rinapiyá Tayta Diospa sacerdotenkuna waqaspa kaynata mañakuchunku: ¡Dios Taytallayku, llaqtaykita pampachaykuy, amayá churikikunata penqayman kachaykuychu, amayá huk nacionkuna paykunapi munaychakuchunchu! ¿Imapaqtaq nacionkuna ninmanku: “Maypitaq Diosninku kachkan”, nispanku?

¹⁸Hinaptinqa Tayta Diosmi llaqtanta llakipayaykuspan huchanta pampachaykunqa.

¹⁹Hinaspanmi llaqtanta Tayta Dios kaynata ninqa: Saksanaykichikkama mikunaykichikpaqmi trigota, vinota hinaspa aceiteta apachimuchkaykichik; kunanmantaqa manam nacionkunapa asipayananñachu kankichik.

²⁰Norte lawmanta hamuq aqaruway urukunatapas mana imapa kanan chaki allpamanmi wischurusaq, paykunamanta punta hamuqtapas intipa qespimunan lamar qochapim heqeparachisaq, paykunamanta qepa hamuqtapas intipa seqaykunan lamar qochapim heqeparachisaq, chaypi ismuspam asnarinqaku. Hatun kaqkunatam ruwasaq.

²¹Allpapi yachaqkuna, ama manchakuspa anchata kusikuychik, Tayta Diosmi hatun kaqkunata ruwanqa.

²²Purun animalkuna, ama manchakuychikchu, chunniqpi pastokunam ikllirimunqa, llapa sachakunam rurunqa, higoswan uvaspas anchallatañam rurunqa.

²³Sión moqopi yachaqkuna, Diosnikichikpi kusikuychik, payqa yapuy paratapas tiempollanpim qosunkichik, yapuy paratapas poqoy paratapas ñawpaqpi hinam tiempollanpi qosunkichik.

²⁴Erakunapas kawsaykunawanmi huntarinqa, vino ruwana uchkukunapas llimparinqam, aceitepas llimparinqam,

²⁵Ñoqam aqaruwaypa, pinki-pinkipa, utuskurupa mikusqantapas kutichipusqaykichik, paykunataqa ñoqam tropaykunata hina contraykichikpi kachamurqaykichik.

²⁶Chaninpi saksanaykichikkama mikukuspam Tayta Diospa sutinta yupaychankichik; hatun kaqkunata qamkunapaq ruwaptinmi manaña penqaypiñachu kankichik.

²⁷Chaynapim yachankichik Israel nacionpa chawpinpi kasqayta, ñoqallam Diosnikichikqa kani, ñoqamanta hukqa manam pipas kanchu. Manañam haykapipas penqaypiqa kankichikñachu.

²⁸Chaykunapa qepantam llapa runakunaman Espirituyta chaqchurimusaq; churikichikkunam qaripas warmipas profetizanqaku, yuyaqkunam mosqonqaku, jovenkunawan sipaskunapas visionkunatam rikunqaku.

²⁹Criadaykichikmanwan criadoykichikmanpas chay punchawpim Espirituyta chaqchurimusaq.

³⁰Cielokunapipas, kay pachapipas admirakuypaq kaqkunatam ruwasaq, yawarta, ninata hinaspa suyullaña hoqarikuq qosnitam qawachisqaykichik.

³¹Manchakuypaq hatun punchawniy manaraq chayamuchkaptinmi, intipas tutayanqa, killapas yawaryanqa.

³² Pipas Diosninpaq chaskiykuwaqniytam ichaqa salvaykusaq; nisqayman hinam Sión moqopiwan Jerusalén llaqtapiqa salvakunqaku, akllakusqaykunawan kuskam salvakunqaku.