Read Biblia Revisión Chuya Qellqa 1992 – Chuya Qellqa 1992 Amós 7 Bible Online

Amós 7 - Biblia Revisión Chuya Qellqa 1992 – Chuya Qellqa 1992 bible

Amós 7

¹Tukuy Atiyniyuq Tayta Diosmi kayta rikuchiwarqa: Reypaq cosechayta tukuruptinkum michka hinasqanku wiñachkasqa, hinachkaptinmi Diosta rikurqani aqaruway urukunata uywachkaqta.

²Chay aqaruwaykuna qorakunatapas mikuyta tukuruptinkum mañakurqani: Dios Taytalláy, pampachaykullawayku, Israel llaqtaqa aschallam kaniku, ¿pitaq hatarichiwanqaku? nispay.

³Chaymi Israelta kuyapayarispan Tayta Dios nirqa: Pampachanim, manañam pasakunqachu, nispa.

⁴Kaytawanmi Tayta Dios qawachiwarqa: Ninawanmi llaqtata Tayta Dios castigarqa; hinaptinmi lamar qochata chay nina chakirachispan kay pachatapas partenta ruparurqa.

⁵Chaymi mañakurqani: ¡Dios Taytalláy, pampachaykullawayku! Israel llaqtaqa aschallam kaniku, ¿pitaq hatarichiwanqaku? nispay.

⁶Chaymi Israelta kuyapayarispan Tayta Dios nirqa: Pampachanim, manañam pasakunqachu, nispa.

⁷Tayta Diosqa qawachiwarqataqmi kaytapas: Diosmi huk perqapa ñawpaqninpi sayachkasqa albañilpa plomadan hapikusqa.

⁸Hinaspanmi tapuwarqa: Amós, ¿imatataq rikuchkanki? nispa. Ñoqañataqmi nirqani: Albañilpa plomadantam Señor, nispay. Chaymi Dios niwarqa: Kay plomadawanmi Israelpa imaynam kawsasqanta yachasaq, manañam pampachasaqñachu.

⁹Isaacpa idolokunata yupaychanan moqokunam tuñichisqa kanqa, Israelpa santuarionkunapas ñutusqam kanqa; rey Jeroboampa mirayninkunatam espadawan wañuchisaq, nispa.

¹⁰Hinaptinmi Bet-elpi kaq sacerdote Amasías, Israelpa reynin Jeroboamman willachimurqa kaynata: Amosmi contraykipi hatarirun. Israelpi runakunaqa manam tukuy ima rimasqanta aguantayta atinmankuchu.

¹¹Amosmi nichkan: “Jeroboammi espadapi wañunqa, Israelñataqmi karu llaqtaman preso apasqa kanqa”, nispan.

¹²Chaymantam Amosta qarqospan sacerdote Amasías nirqa: ¡Yaw profeta, kaymanta pasaway! mikunaykipaq ganaykuyta munaspaykiqa Judá nacionpiñayá profetizamuy.

¹³Amaña Bet-elpiqa profetizayñachu, kaypiqa reypa santuarionmi kachkan, kaymantataqmi munaychakunpas, nispa.

¹⁴Hinaptinmi Amós nirqa: Ñoqaqa manam profetachu kani nitaqmi profetapa churinchu, aswanqa ovejata michispa purun higosta huñukuqllam kani.

¹⁵Ichaqa Tayta Diosmi ovejata michichkaptiy qayaykuwaspan kamachiwarqa: “Israel llaqtayman riy hinaspa ñoqamanta willamuy”, nispan.

¹⁶Chaynaqa, Tayta Diospa nisqanta uyariy. Qanmi ninki: “Ama Israelpa contranpi nitaq Isaacpa mirayninkunapa contrapipas profetizaychu”, nispa.

¹⁷Chayraykum Tayta Dios kaynata nin: Warmikim llaqtapa chawpinpi chuchumika kanqa, churikikunam espadapi wañunqaku, allpaykitapas sorteaspam rakinakunqaku; qampas Diosta mana reqsiq runakunapa llaqtanpim wañunki, Israelñataqmi karu llaqtaman preso apasqa kanqa, nispa.