Read Biblia Revisión Chuya Qellqa 1992 – Chuya Qellqa 1992 Amós 8 Bible Online

Amós 8 - Biblia Revisión Chuya Qellqa 1992 – Chuya Qellqa 1992 bible

Amós 8

¹Tayta Diosmi qawachiwarqa canastapi poqosqa frutakunata.

²Hinaspanmi tapuwarqa: Amós, ¿imatataq qawachkanki? nispan. Ñoqañataqmi nirqani: Canasta hunta poqosqa frutakunatam, nispa. Hinaptinmi Tayta Dios niwarqa: Israel llaqtaymanmi puchukay chayaramun, manapunim pampachasaqñachu.

³Chay punchawqa temploypi takiqkunapas qaparispam waqanqaku. Achka runa wañuruptinmi mana imata rimarispa ayakunatapas llutanpi wischunqaku. Tayta Diosmi chaynata nin.

⁴Mana piniyuqkunata ñakarichispa wakchakunata tuñichiqkuna kayta uyariychik.

⁵Qamkunam ninkichik: Amalaya trigonchikta rantikunapaq llullu killa pasarunmanña; samana punchawpas taqenchikta kichaykuspa precionta miraykachispa kawsayninchikta rantikunapaq, balanzatapas menosyaykachispa engañanapaq.

⁶Wakchakunata qollqepaq rantispa yarqaymanta kaqkunatañataq chulla pares usutapaq rantinanchikpaq hinaspa trigopa pusillantañapas rantikunapaq, nispa.

⁷Tayta Diosmi Jacobpa hatun kayninrayku juraspan nin: Tukuy ima ruwasqankutaqa manam haykapipas qonqasaqchu, nispan.

⁸¿Manachum chayrayku allpapas kuyurinqa? ¿Manachum chaypi yachaq llapa runakuna waqanqaku? Mayu hinaraqmi llimparinqa, llimparispanmi Egiptopi mayu hinaraq yawyarinqa.

⁹Tayta Diosmi kaynata nin: Chay punchawmi chawpi punchaw intita tutayachisaq, punchawpacham kay pachata tutayaywan pampaykusaq.

¹⁰Fiestaykichikkunatapas waqakuyman tikraspam, takikichikkunatapas qapariyman tikrasaq; qachqa pachawan pachachispam chukchaykichiktapas rutuchisqaykichik. Sapallan wawa churinmanta waqaqkunata hina kay pachata ruwaptiymi ancha ñakakuyllapiña tukunkichik, nispa.

¹¹Tayta Diosmi kaynata nin: Hamuchkanmi punchawkuna, kay pachaman yarqayta kacharimunaypaq; manam mikuymanta yarqaytachu, nitaqmi yakumanta yakunayachikuytachu, aswanqa Diospa Chuya simin uyariymanta yarqaytam.

¹²Hinaptinmi runakuna llutanpi purinqaku, lamar qochatapas patan-patanmi tukunqaku, intipa qespimunan lawmanta intipa seqaykunan lawkamam Chuya simiyta maskanqaku, ichaqa manam tarinqakuñachu.

¹³Kuyayllapaq sipaskunam, kallpanpi jovenkunam, chay punchawqa yakumanta wañunayanqaku.

¹⁴Samariapa idolonkunarayku juraqkunapas, Danpa chaynataq Beersebapa idolonkunarayku juraqkunapas lliwmi wichinqaku, manañam haykapipas hatarinqakuñachu.