Read Biblia Revisión Chuya Qellqa 1992 – Chuya Qellqa 1992 Jonás 3 Bible Online

Jonás 3 - Biblia Revisión Chuya Qellqa 1992 – Chuya Qellqa 1992 bible

Jonás 3

¹Tayta Diosmi Jonasta huktawan rimapayaspan nirqa:

²Nínive llaqtaman riy hinaspa ñoqapa nisqayta chaypi yachaqkunaman willakamuy, nispa.

³Chaymi Jonás, Tayta Diospa kamachisqanman hina, Nínive llaqtaman rirqa. Nínive llaqtaqa kimsa punchaw puriy hatu-hatun llaqtam karqa.

⁴Chayaruspanmi Jonás tukuylla punchaw puriyta qallaykurqa kaynata willakustin: ¡Tawa chunka punchawmantam Nínive llaqta chinkachisqa kanqa! nispa.

⁵Hinaptinmi Nínive llaqtapi yachaqkuna, Diospa nisqanta uyariykuspanku, hatunpas taksapas ayunaspanku huchankumanta wanakuspa qachqa pachakunawan churakurqaku.

⁶Nínive llaqtapa reyninpas chay willakuyta uyariruspanmi, trononmanta sayarispan, pachankunata hurqokuruspa qachqa pachawan pachakuruspan uchpapa hawanpi tiyaykurqa.

⁷Hinaspam reyqa yanapaqninkunapiwan, Nínive llaqtapi kamachikurqa kaynata: Amam pipas mikunqachu, hatun uywakunawan taksa uywakunapas amataqmi pastota mikunqachu, nitaq yakutapas tomanqachu.

⁸Aswanqa lutokuspa animalkunawan kuska tukuy sonqoykichikmanta Tayta Diosta mañakuychik hinaspa mana allin kawsaynikichikmanta sapakama wanakuychik, wanakuychiktaq mana allinkuna ruwaynikichikmantapas.

⁹Diosqa icharaqpas llakipayariwaspanchik piñakuyninta sapaqchaykuptin mana puchukaruchwanchu, nispa.

¹⁰Imam ruwasqankuta qawarispanmi Tayta Dios rikururqa Nínive llaqtayuq runakuna mana allin kawsayninkumanta wanakurusqankuta, chayraykum piñakuyninta sapaqchaykuspan imam tanteasqantaqa manaña ruwarqañachu.