Read Biblia Revisión Chuya Qellqa 1992 – Chuya Qellqa 1992 Números 12 Bible Online

Números 12 - Biblia Revisión Chuya Qellqa 1992 – Chuya Qellqa 1992 bible

Números 12

¹Mariawan Aaronmi rimarqaku Moisespa contranpi Kusita warmiwan casarakurusqanrayku.

²Paykunam nirqaku: ¿Moisesnintakamallachu Tayta Diosqa rimarqa? ¿Ñoqanchiktakamapas manachum rimarqa? nispanku. Chayna rimapakusqankutam Tayta Dios uyarirurqa.

³Moisesqa llapallan runakunamantapas llumpay uchuychakuqmi karqa.

⁴Hinaptinmi Moisesta, Aaronta hinaspa Mariata Tayta Dios nirqa: Asuykamuwanaykichik carpaman riychik, nispa. Chaymi kimsanku chayman rirqaku.

⁵Tayta Diosñataqmi carpaman uraykamurqa sayaq puyupa ukunpi, hinaspam carpapa punkunman Aarontawan Mariata qayarqa. Iskayninku asuykuptinkum

⁶paykunata nirqa: Kay nisqayta uyariychik: Qamkuna ukupi profeta kaptinqa ñoqam payman visionpi rikurisaq, hinaspam mosqoyninpi rimapayasaq.

⁷Serviqniy Moiseswanmi ichaqa mana chaynatachu ruwasaq, payqa llapan serviqniykunamantapas mastam ñoqapi hapipakun.

⁸Paywanqa uya-uyapuram imam kaqta rimasaq, manam rikchanachiykunawanchu, chaynaqa ñoqa Tayta Diosta rikuwachkaptinqa ¿imanasqamá manaqa manchakurqankichikchu serviqniy Moisespa contranpi rimaytaqa? nispa.

⁹Chaymi paykunapa contranpi Tayta Dios anchata piñakuruspan pasakurqa.

¹⁰Carpamanta puyu asuriruptinmi riti hina yuraqllaña lepra onqoy Mariapa cuerponpi rikurirurqa. Aarón muyuriykuspa qawariykuptinmi Mariaqa lepra onqoywanña kachkasqa.

¹¹Hinaptinmi Moisesta Aarón nirqa: ¡Ay, taytalláy! Kay huchamantaqa amayá castigawaykuchu, muspaypi hinam kaytaqa ruwaruniku.

¹²Amayá Mariataqa saqeruychu mamanpa wiksanpi wañuruspa ismurichkaq aychayuqña naceq wawata hinaqa, nispa.

¹³Chaymi kaynata qaparispan Tayta Diosta Moisés mañakurqa: Diosnilláy, Mariata sanoyaykachinaykipaqmi mañakuyki, nispa.

¹⁴Chaymi Moisesta Tayta Dios nirqa: Uyanpi taytan toqaykuptinqa ¿manachu qanchis punchaw penqaypi kanman? Chaynaqa, campamentomanta qanchis punchawpuni qarqosqa kaspa chaymantaña kutiykamuchun, nispa.

¹⁵Chaynapim Mariaqa qanchis punchawpuni campamentomanta qarqosqa karqa. María kutimunankamam chay sitiomanta runakuna mana lloqsirqakuchu.

¹⁶Maypacham María kutiramuptinñam Hazerot lawmanta pasaspanku Parán chunniqpi samarurqaku.