Read Biblia Revisión Chuya Qellqa 1992 – Chuya Qellqa 1992 Números 13 Bible Online

Números 13 - Biblia Revisión Chuya Qellqa 1992 – Chuya Qellqa 1992 bible

Números 13

¹Moisestam Tayta Dios kaynata nirqa:

²Israelpa mirayninkunaman qonay allpata qawamunankupaq runakunata kamachiy; kamachinkiqa sapa ayllupi kamachikuqtam, nispa.

³Chaymi Parán chunniqmanta Moisés kacharqa, Tayta Diospa nisqanman hina. Kachasqankunaqa llapallankum Israelpa mirayninkunapi kamachikuqkuna karqaku.

⁴Sutinkum kaykuna: Rubén ayllumanta Zacurpa churin Samúa.

⁵Simeón ayllumanta Horipa churin Safat.

⁶Judá ayllumanta Jefonepa churin Caleb.

⁷Isacar ayllumanta Joseypa churin Igal.

⁸Efraín ayllumanta Nunpa churin Oseas.

⁹Benjamín ayllumanta Rafupa churin Palti.

¹⁰Zabulón ayllumanta Sodipa churin Gadiel.

¹¹Joseypa churin Manasés ayllumanta Susipa churin Gadi.

¹²Dan ayllumanta Gemalipa churin Amiel.

¹³Aser ayllumanta Micaelpa churin Setur.

¹⁴Neftalí ayllumanta Vapsipa churin Nahbi.

¹⁵Gad ayllumanta Maquipa churin Geuel.

¹⁶Paykunatam allpata qawamunankupaq Moisés kacharqa. Nunpa churin Oseastam Josueywan Moisés suticharqa.

¹⁷Canaán allpata imaynam kasqanta qawamunankupaq kachaspanmi paykunata Moisés nirqa: Kaymantam Neguev lawman rinkichik, hinaspañam orqoman qespinkichik.

¹⁸Imaynam allpa kasqantam qawamunkichik, chaypi yachaq runakunapas kallpasapachu icha manachu, paykunaqa asllachu icha achkachu kanku,

¹⁹imaynataq yachasqanku allpakuna, allinchu icha manachu; yachasqanku llaqtakunaqa campamentokunallachu icha murallasqa llaqtakunachu.

²⁰Chay allpaqa kawsaykunapa qespinanchu icha manachu, sachayuqkunachu icha manachu. Kallpanchakuspam chay allpapa rurunta apamunkichik, nispa. Chay wateqamusqanku punchawkunaqa uvaspa punta rurunkuna rikurimunan tiempom karqa.

²¹Rispankum allpata wateqamurqaku, Zin sutiyuq chunniqmanta qallarispa Hamat llaqtaman yaykuna Rehob llaqtakama.

²²Neguev lawman rispankum Hebrón llaqtakama chayarurqaku. Chaypim yacharqaku Ahimán, Sesai hinaspa Talmai; paykunaqa karqaku Anacpa mirayninkunam. Hebrón llaqtaqa hatarichisqa karqa Egipto nacionpi Zoán llaqtapa qanchis wata ñawpaqnintaraqmi.

²³[3]Escol wayqokama chayaruspankum, uvasta kallmantinta chaymanta pallamurqaku, chaymi iskay runakuna kaspipi hombromurqaku; apamurqakutaqmi granadakunatawan higoskunatapas.

²⁴Chay sitiotam Escol wayqowan suticharqaku, chaynataqa suticharqaku Israelpa mirayninkuna chaymanta kallmantin uvasta pallamusqankuraykum.

²⁵Allpa qawamusqankumantam tawa chunka punchawmanta kutimurqaku

²⁶Parán chunniqpi Cades lawkama. Chaypim Moisesman, Aaronman hinaspa Israelpa llapallan mirayninkunaman willaspanku allpapa ruruntapas qawachirqaku.

²⁷Willakuspankum nirqaku: Kachawasqaykiku allpamanmi chayarurqaniku, cheqaptapunipas chay allpaqa, tukuy imapa kanan allpam kasqa. ¡Kayqaya chay allpapa rurunkuna!

²⁸Ichaqa chay allpapi yachaq runakunam kallpasapakuna kasqaku, llaqtankupas hatun murallayuqkamam kasqa, hatunkaray Anacpa churinkunatapas chaypim rikuramuniku.

²⁹Neguev lawpim amalecitakuna yachasqaku, orqo lawpiñataqmi heteokuna, Jebuseokuna hinaspa amorreokuna; lamar qochapa hichpanpiñataqmi cananeokuna, hina paykunataqmi Jordán mayu lawpipas yachasqaku, nispanku.

³⁰Calebñataqmi, runakunata upallachispan Moisespa qayllanpi nirqa: Rispanchik chay allpata hapimusunchik, chaypi yachaq runakunataqa vencesunchikmi, nispa.

³¹Riqmasinkunam ichaqa nirqaku: Manam chay runakunawan peleaqqa richwanchu, paykunaqa ñoqanchikmantapas aswan kallpasapakunam, nispanku.

³²Paykunam allpa qawamusqankupa contranpi rimaspanku Israelpa mirayninkunata nirqaku: Qawamusqayku allpaqa chaypi yachaq runankunatapas mikusqam, chay llaqtakunapiqa runakunapas hatunkaray runakunam kasqaku.

³³Anacpa miraynin hatunkaray runakunatapas rikuramunikum, paykunapa qayllanpiqa aqaruway hinallam karqaniku, chayna sayayllatataqmi paykunapas qawawarqaku, nispanku.