Read Biblia Revisión Chuya Qellqa 1992 – Chuya Qellqa 1992 Números 17 Bible Online

Números 17 - Biblia Revisión Chuya Qellqa 1992 – Chuya Qellqa 1992 bible

Números 17

¹Israelpa mirayninkunata kamachinanpaqmi Moisesta Tayta Dios kaynata nirqa: Sapa ayllupi kamachikuqmanta huk tawnata mañay. Chaynaqa, chunka iskayniyuq tawnakunam kanqa; hinaspam sapakamapa tawnanpi sapa kamachikuqpa sutinta qellqanki.

³Leví ayllupa tawnanpim Aaronpa sutinta qellqanki. Sapa ayllupa kamachiqninpam huk tawna kanqa.

⁴Chay tawnakunataqa ñoqaman asuykuna carpapim Arcapa ñawpaqninpi churanki, chaypim qamkunawan tupasaq.

⁵Akllasqay runapa tawnanta ikllirachiptiymi ñoqapa qayllaypi Israelpa mirayninkuna manaña contraykichikpi rimanqakuñachu, nispa.

⁶Israelpa mirayninkunaman Moisés chayta niptinmi, sapa ayllupi kamachikuq tawnanta qorqa, chaymi chunka iskayniyuq tawnakuna karqa. Aaronpa tawnanpas paykunapa tawnanwanmi karqa.

⁷Hinaptinmi chay tawnakunata Moisés churarqa Tayta Diosman asuykuna carpa ukupi kaq Arcapa ñawpaqninman.

⁸Paqarinnintinta Tayta Diosman asuykuna carpaman Moisés yaykuykuptinmi, Leví ayllumanta kaq Aaronpa tawnan iklliramuspa waytachkasqa, hinaspam almendraskunata rururusqa.

⁹Chaymi Tayta Diospa qayllanmanta tawnakunata Moisés hurqoramurqa Israelpa mirayninkuna qawanankupaq, hinaptinmi qawaykuspanku tawnankuta sapakama hapirqaku.

¹⁰Hinaptinmi Moisesta Tayta Dios nirqa: Aaronpa tawnanta Arcapa ñawpaqninman kutiykachiy, mana kasukuq Israelpa mirayninkuna chayta qawaspa manaña contraypi rimanankupaq hinaspa mana wañunankupaq, nispa.

¹¹Chaymi Moisesqa, Tayta Diospa kamachisqanman hina ruwarqa.

¹²Israelpa mirayninkunañataqmi Moisesta nirqaku: Kunanqa pantaypim kachkaniku, llapallaykum wañurusaqku.

¹³Tayta Diospa yachanan carpaman asuykuq runa wañuptinqa, llapallaykum wañurusaqku, nispanku.